¹ Polo mu kughensha lusu lwa matenda,atendagha: Bisakwitu,nti ku mulenganya wani musogha,u kunikila mu miso ma Ghongo... ² Anania,we Sankogha munene akakishagha ku babagha bwighi nawe bamupundile ku bushundo. ³ Agho Polo amubulagha:Ghongo akakupunda ,e kisusu chenga! Wabundile buno u niaghy e,nu wenda bulai na mulembe buno bampunde! ⁴ Ba babagha bwighi nawe bamubulagha:Watuka Sankogha munene wa Ghongo ! ⁵ Nu Polo ing'atenda:Bisakwitu ,nshamanagha buno eli Sankogha munene;kubuno bwatililwe :Ntukatenda bubi ku mwami wa kilongo chobe. ⁶ Polo ,mu kumana buno mu musanganano muli Basadukayo nu Bafalisayo,atendagha bubibu:Bisakwitu,nili mufalisayo ,mwana wa mufalisayo;nti kutingila malelamilo ma kutuka ku bakuyi u chasula naghibwa . ⁷ Mu kushila kutenda ubo,kwabagha myango gha sambana Bafalisayo nu Basadukayo,nu musanganano wimbeghanyagha mo, ⁸ kubuno Basadukayo bakutenda buno takuli kutuka ku bakuyi,nu takuli mughenshi ali basumbu,tondo Bafalisayo bo bimila ibyo bibili. ⁹ Kwabukagha lwayo lunene,nu basanshi bamoyi ba bimila Bafalisayo bakitagha myango inene,nu kutenda:Tatwamona ku kibi mu ghono muntu,nampu musumbu ali mughensi umoyi u kutenda nawe. ¹⁰ Bwabagha lwayo lwa kwengukana lwabagha lwingi,nu mu kukwa boba buno Polo anakokwakokwa,na bantu,amanagha basula bamutuche mu katighi nabo ,nu bende nawe ku lusu lunene. ¹¹ Mu kindi,Mukota ikilagha Polo,nu ku mubula:Ntukwe boba;kubuno buwantenenekelagha ku Yelusalema,wemana kuntenenekela lingo ku Loma. ¹² Mu busi kucha,Bayuda bakalagha lwango nu kwindumbisha binene buno ta bakalya nu kunywa ndi tabita Polo. ¹³ Ba bakalagha ulo lwango, babagha bengi ku makumi manayi, ¹⁴ nu bendagha kuli basankogha banene nu bakungu,ba babulagha buno:Twindubishe buno ta tukalya kena nu kunywa ndi ta twita Polo. ¹⁵ Uwe lola,ghamoyi na lusu lwa matenda,mubule mukulu wa basula,amwiche ku weli,buno ukulonda busogha ki chasula atuka ku tweli,nu ghabe ntika ku weli,nti twamwita. ¹⁶ Mwighwa wa Polo,mu kuba amana itebo ,endagha mu lusu lunene amutonde Polo. ¹⁷ Polo amanagha umoyi ku basula,nu kumubula :Icha ghoso musukila kuli mukulu wa basula ,kubuno ite kitondo cha kumusambalila. ¹⁸ Sula endagha ghamoyi n'oso musikila nu kumwicha kuli mukulu wa Basula nu kutenda :Mukandwa Polo animanagha,ni kwikishe ghono musikila,ite kitondo cha kukubula. ¹⁹ Mukulu wa basula akatagha ghoso musikila mu kuboko nu endagha nawe kwitunda,amubushagha : Kiwite cha kunsambalila? ²⁰ Aakulagha:Bayuda balaghanile buno bakweme buno umwiche Polo munindu mu lusu lwa matenda ,anga unashima kumana bingi kuwe. ²¹ Ntubongwililaghe, kubuno bengi ku makumi manayi kubo bamuteghile itebo,nu bindumbilishe kwinda kulya ali kunywa ndi tabamwita; lola bikalile ,nu bakulindila tughu mulenganya wobe umpanga. ²² Mukulu wa basula akuluchagha musikila nu kumukakisha ntasambalile muntu kw'ibyo bitondo. ²³ Agho,amanagha babili ku balangi ba basula, nu kubabula: Mwikalagha mukengele,mu sa mwenda sa kindi,mwatolagha basula maghana mabili,nu makumi mutuba beli ku mpunda,nu bite misungu maghana mabili,mwende nabo ku Kaisalia. Mwekele nu Polo bya kumweka ko,kubuno ike busoghabusogha kuli Felisi,Mukulu wa musumba. ²⁵ Atilagha maluba mweli bino bitondo: ²⁶ Kolode Lusiasi ,Samba kwa ku weli Uwe Felisi Mukulu wa musumba! ²⁷ Ghoso muntu wakatwagha na Bayuda,akulonda kwitwa nabo,mu kumana buno eli Muloma,nashwa na basula kubatucha we, ²⁸ Mu kulonda nimane ki chasula bamutalikila,namwichagha mu lusu lwa matenda. ²⁹ Nasangile buno bamutalikinde ku bitondo bya mulembe wabo,tondo ntakitile kibi kinasula akwa ali kukandwa. ³⁰ Mukongwa buno Bayuda bamutegha,namusingagha kobe,mu kulosha buno babo bamutalikinde bashwe kukubula uwe w'inene.Maghala. ³¹ Basula kuyangana na lukakisho lubeleshwagha,batolagha Polo,bendagha nawe mu kindi kwikila ku Antipatuli. ³² Munindu, bisa mpunda bendagha nawe ,nu bango bakulukagha. ³³ Gha bikagha ku Kaisalia,bisa mpunda bichagha maluba kweli mukulu wa musumba,nu bamuloshagha Polo. ³⁴ Mukushila kusoma maluba,mukulu wa musumba abushagha ndi Polo eli wa musumba ki.Gho ngwagha buno eli wa Silisia: ³⁵ Amubulagha: Nkakongwilila gha kika babo bakutalikilagha.Nu akakiishagha buno bamulange mu lusu lwa Helode.