¹ Bisakwitu nu batata,mwongwilile bi'nkutenda : ² Mwa mukongwilila akutenda nabo mu kiebulania,bakobagha bubibu.Nu Polo atendagha: ³ Nili Muyuda,nabutwa ku Talaso sa ku Kilikia,tondo nakulila mu ghuno musumba,nu kwegheshibwa ku maghulu ma Gamalieli mu kumanilila busoghabusogha mulembe wa batata,nene mpumba sa ku kolela Ghongo,anga bumweli nu benywe. ⁴ Na naghagha bubibu mano megheshibwa,kukanda nu kulekela mu kahombo balume nu bakashi. ⁵ Sankogha munene, mu lusu lunsayi lwa bakungu bakuntenenekela.Neleshibwagha nabo maluba ku bisakwitu beli ku Damasiki, u kunendagha buno nishwe na bakandwa ku Yelusalema ba banasange ko nu niba nubye. ⁶ Bu nabagha mu lughendo,nu kwika bwighi na Damasiki,mwako kaluma,mu kantighi na musi,kwatukagha kw'ighulu chengeshi kinene chasanagha gha neli. ⁷ Naghawa ghansi,nu nongwagha ishuki likumbula:Sauli,Sauli ki chasula waninubya? ⁸ Nabushagha: Uwe nayi Mukota?Nu ambulagha: Ine Yesu wa Nasaleti,u ukunubya. ⁹ Babo babagha n'ine,balolagha busogha kwecho chengeshi,tondo tabongwagha kweli ishuki lyatendagha nine.Agho,natendagha:Nikite buni Mukota? ¹⁰ Nu Mukota ambulagha :Imaluka,nda ku Damasiki,nu bakubule bya kukita. ¹¹ Bu nabagha nshikulola ku kena,kutingila chengeshi,ba nabagha nabo,bankantililagha mu kuboko,nu nikagha ku Damasiki. ¹² Nu mutu umoyi,Anania, wa kokomesha mu mulembe,nu Bayuda babagha ku Damasiki bamutenenekelagha,bikagha ku neli, ¹³ nu kumbula:Sauli, mwisakwitu,shibula miso.Mwako kaluma,nashibukagha miso nu ku mulola ko . ¹⁴ Ambulagha:Ghongo wa batata akusombolile buno umane byashima ,nu kulola muntu wa bulili, mukwongwa bitondo mu kanywa kaghe; ¹⁵ kubuno muteneneki waghe ,ku bantu bansayi ku bitondo bi ukalola ko nu kongwa ko. ¹⁶ Nu lola,ki kiukulindila?Imaluka ,patishibwa,nu ushighililwe bwaghi bobe ,mu kumana ishina lya Mukota. ¹⁷ Mu kukuluka ku Yelusalema,anga bunabagha nkusegha mu numba sa kukumbamila,nakalikagha kalengwe, ¹⁸ nu nalolagha ku Mukota u kumbula:Tibitila,nu tuka mu Yelusalema lubilo,kubuno tabakasekela buteneneki bobe kw'ishina lyani. ¹⁹ Nu Ine nkutenda: Mukota,bakumana bunalekelagha mu kahombo nu kupundya bantu na tuti mu ma sinakoki,babo bakatisha muwe,nu ²⁰ gha bitagha Setefano,muteneneki wobe,nabagha agho,nu nimilagha milenganya sabo,nu nalangagha nshulu sa ba bagha baku mwita. ²¹ Agho ambulagha :Nda,nkakusinga bulayi ku bilongo. ²² Bamwongwililagha kwikila kicho kitondo.Tondo bakughagha mu kutenda:Tucha gha kisi muntu anga ghoso!Nta nema kuba ko. ²³ Nu balekelagha lingo milenge,kuta nshulu sabo,nu kulenja mukungu mu mpena. ²⁴ Mukulu wa basula akakishagha bingishe Polo mu lusu lunene,nu bamubushe mu kumupunda, buno bamane ki chasula ba mukughila. ²⁵ Gha bamususulagha,Polo atendagha na sula wabagha agho: Mwimila kupunda na tuti muntu wa Muloma nu nta ghayibwe? ²⁶ Kwebyo bitondo,sula endagha kweli mukulu wabo nu ku mukengesha,mu kubula: Ki kiwakita ?Ghono muntu eli Muloma. ²⁷ Nu ghoso mukulu wa basula ,mu kwika abushagha Polo:Mbule,uli muLoma?Polo amwakulagha :Naki. ²⁸ Mukulu wa basula atendagha lingo: Nti kutingila bikulo bingi u munabinde Muloma.Nu Polo ing'amubula: Nili muLoma wa kubutwa. ²⁹ Agho lino babagha bakumubusha biyendelagha,nu Mukulu wa basula mu kumana buno Polo eli Muloma,akwagha boba kubuno amukandyagha. ³⁰ Mu nindu ,mu kulonda amane busogha ki chasulagha Bayuda bamutalikila,Mukulu wa basula amukandulagha nu akakishagha Basankogha banene nu lusu lwa matenda bakulumane; nu mu kukumbya Polo,amubikagha gha katighi nabo.