¹ Twendagha,mu kushighana nabo, kwika ku Kose,munindu twikagha ku Lode nu kutuka agho twikagha ku Patala. ² Mu kusanga bwato mu kusoka kwenda ku Fenesia,twabakamagha mubo nu kwenda. ³ Mwa mukolola kakishi ka Kipulo,twakashighagha mu mbokwa,mu kwenda mu kibe cha Sulia,nu twasokelagha ku Tilo,u kwabagha kukushigha bwato mishigho. ⁴ Twasangagha begheshibwa nu twikalagha ko bindi mutubakamo. Begheshibwa,bite Muusa Musogha,bananiagha Polo ku bakama ku Yelusalema. ⁵ Tondo,mu kulola bindi mutubakamo byatinga,twalenganyagha kwenda,nu bansayi batwelekeshagha ghamoyi na bakashi babo nu bana babo,kwika kushinda musumba.Twakomagha mashwe ku muse,nu twaseghagha. ⁶ Nu mukuba twashighana,twingilagha mu bwato nubuo bakulukagha kwabo. ⁷ Mu kushila kutuka mu bwato,twendagha ku Tilo ku Tolemai,u kutwendagha kukesha bisa kwitu nu kutinja nabo kindi kimoyi. ⁸ Mu nindu twendagha ku Kaisalia.Gha twingilagha mu numba sa Filipo musanshi wa kitondo cha Ghongo wabagha umoyi ku babo mutubakamo,twayamagha kwaghe. ⁹ Abagha na bikumi binayi bikutucha bitondo bya bulenganya. ¹⁰ Ubo butwakitagha bindi bingi agho, mulenganya umoyi ukumanwa Agabosi, atukagha ku Yudea ashwagha kutulonda. ¹¹ Atolagha mutunda wa Polo,inkandagha maghulu nu maboko,nu kutenda :Lola byatenda Muusa Musogha:Nene uno mutunda,Bayuda bakamukanda ku Yelusalema,anga buninkanda gho ,nu bakamwesana ku maboko ma batakatisha. ¹² Mu kwongwa kubo, beshwe nu abo bango ba kicho kishiki,twananyagha Polo kwenda ku Yelusalema. ¹³ Aakulagha: Kiki ki mukukita,mu kulila nu mukunita mutima?Nimila,ta kukandwa umpanga,tondo ku kwila ku Yelusalema kw'ishina lya Mukota Yesu. ¹⁴ Ubo bwatashimagha kongwa,twananagha ku mukakisha,nu twatendagha:Kushima kwa Mukota ku belelele. ¹⁵ Kushila ibyo bindi,twalongomanyagha lughendo nu twabakamagha ku Yelusalema. ¹⁶ Begheshibwa bamoyi ba ku Kaisalia bendagha ghamoyi na beshwe,nu kutwicha kwa muntu ukumanwa Nasoni wa kakishi ka Kipulo,mwegheshibwa mukungu,u kutuna yamile. ¹⁷ Gha twikagha mu Yelusalema,bisakwitu batusekelagha na mboghimboghi. ¹⁸ Munindu,Polo endagha ghamoyi na beshwe kuli Yakobo,nu bakungu bakulumanagha gho . ¹⁹ Mu kushila kubakesha ,abaghanikishagha bingi byakitagha Ghongo mu bilongo kutingila mulimo waghe. ²⁰ Mu kumwongwilila,baghanulagha Ghongo.Nu bamubulagha :Walola mubuto, maelefu manga ma Bayuda bakatishishe,nu bansayi bakokomesha mu mulembe. ²¹ Nu bongwile buno ukweghesha Bayuda beli mu bilongo buno bashighe bya Musa,mu kubabula tabamonye lingo bana nu balembanaghe na ntungo . ²² Tukite ki? Tukumana buno kikembe chakulumane ,kubuno bamana buno wikile. V 23 Uchasula,kita bitukukubula mu beshwe muli balume banai balumbinde; ²⁴ Batole ghamoyi nowe,iyenje ghamoyi nabo,beleshe bibite nkasa inga bamana kubeghwa matwe.Nu bansayi bamane buno byatendwagha kw'ishina lyobe byeli bya bwisa,tondo uwe nuwe ukuyangana na mu mulembe. ²⁵ Ku Babilongo babo bakatishishe,twakalagha lwango lwa kubatilila binanye nama sa tulwa ku byeko,nu mikilha,nu nama si nkwila,nu matensha. ²⁶ Agho atolagha abo bantu,iyenjagha ,nu munindu ingilagha nabo mu numba sa kukumbamila buno atende busi bukabelelela kwiyenja kwabo,nu mutulo wabo. ²⁷ Mu kushila bindi mutubakamo,Bayuda ba ku Asia gha bamonagha Polo mu numba sa kukumbamila,bindagha mu bantu mulenganya mubi , ba mukatagha, ²⁸ mu kukugha:Bantu Baisilaeli,mutukashe! Lola ,muntu ukweghesha kunsayi nu kisi kinsayi akutenda bubi ku bantu, mulembe nu kishiki kino; Ingishishe Bagiliki mu numba sa kukumbamila nu akwenegha kishiki kino chasanana. ²⁹ Kubuno bamulolagha ko kalayi mu musumba ghamoyi na Tolofime wa kuko ku Efeso,balenganyagha buno Polo amwingishishe mu numba sa kukumbamila. ³⁰ Musumba unsayi wimalukagha,nu bantu batukagha kunsayi. Bamukatagha Polo,nu bamubulutilagha kumbugha kwa numba sa kukumbamila,numbi insayi,sighalaghwa. ³¹ Ubo bubalondagha ku mwita,lwayo lwikagha kuli mukulu munene wa basula,nu Yelusalema insayi waghulubanagha. ³² Mwako kaluma, atolagha basula,nu kutibitila ku beli.Mu kumona ku Mukulu wa Basula ghamoyi na basula,bashighagha kupunda Polo. ³³ Agho mukulu wa Basula ashighelela,amukatagha,nu amukandyagha miyololo imbili.Nu abushagha we u nayi,nu ki chakitile. ³⁴ Tondo mu kikembe,bamoyi bakughagha bamoyi bubuno, nu bango bubo .Indagha kwongwa bamoyi, kulwayo lwingi,akakishagha bamwiche mu lusu lunene. ³⁵ Gha binde Polo emwagha na bipundo,ekwagha na basula kutingila bubibu bwa kikembe; ³⁶ Kubuno bantu bengi bashwagha mu kukugha:Mu mwite! ³⁷ Mu kwingila mu lusu lunene,Polo abushagha mukulu wa basula: Nimilwa kukubula kitondo kimoyi?Mukulu wa basula akulagha: Ukumana kigiliki? ³⁸ Ntweli ghoso mu Misili wasolobokile mu bino bindi,nu wendile mu kalula na bisungu elefu enayi? ³⁹ Inga Polo atenda:Nili muyuda wa Talaso ku Kilikia,muntu wa mu musumba musogha nu munene.Nshighilile ,nakusegha nitende na bantu. ⁴⁰ Mukulu wa basula mu ku mwimila,Polo ,imalagha gha toghama,ashimilagha bantu na mughombo .Kwabagha kakobi kanene,nu Polo mu kutenda mu kiebulania,ababulagha: