¹ Gha binde lwayo lwashila,Polo akulumanyagha begheshibwa,nu,kushila kutenda nabo,abalaghagha nu kwenda ku Makedonia. ² Atimbagha mwecho kisi ,mu kweghesha begeshibwa bitondo bingi. ³ Nu endagha ku Bagiliki,u kwatinjagha myeshi esatu.Gha londagha kwenda ku Sulia,Bayuda bamuteghagha.Agho alenganyagha ku kuluka ku Makedonia. ⁴ Bamwelekeshagha ku Asia : Sopatele wa Beloya,musikila wa Pilusi,Alisitaliko nu Sikondo wa Tesalonika,Gayo wa Delebe,Timote nu Tushiko nu Tolofimo,bantu ba ku Asia. ⁵ Babo bendagha kubusho,nu batulindilagha ku Tolowa. ⁶ Ku beshwe,kushila bindi bya tumpampa bitite lughayo,beshwe twendagha ku Filipi,nu,mu ku bindi bitano,twa basangagha ku Tolowa,u ku twatinjagha bindi mutubakamo. ⁷ Busi butangi bw'iyinga,twakulumanagha tulye kampampa.Polo ,wabagha wa kwenda munindu,atendagha na begheshibwa kwikila mu kantighi na kindi. ⁸ Kwabagha tala ningi mu chumba cha kw'ighulu ku twabagha mo. ⁹ Agho ghabagha musikila umoyi wamanagwa Etiko,etamilagha kw'indilisha,mu kuyama bubibu nu Polo akutenda; mu tulo twingi,akolokagha tukila lutalo lwisatu kwika ghansi,nu imaluchwagha akwile kalayi. ¹⁰ Tondo Polo,mu kukumba amukumbamilagha ko nu kumukata mu maboko maghe,nu kutenda:mughanagheghanaghe,kalamo kaghe kecheli muwe. ¹¹ Ghabinde abakama,aketulaketulagha kampampa nu kulya,nu atendagha bingo bingi kwikila nindunindu,kushila agho endagha. ¹² Musikila ekilwe nu alama kalayi,nu wabagha musaghu wa mboghimboghi. ¹³ Beshwe twendagha kubusho kwa Polo na bwato,nu twimalagha ku Asosi ,u ku twalaghanagha twendele ghamoi nawe kubuno lughendo lwaghe lwabagha lwa maghulu. ¹⁴ Gha tusangagha ku Asosi,twamwindagha mu bwato,nu twendagha ku Mutilene. ¹⁵ Agho,mu kutinga mu kitatenge,twikagha munindu ku maleshilya na Kioso.Gha chagha busi,twikagha ku Samosi,nu bwandele, twikagha ku Mileto. ¹⁶ Polo ashimagha kutinga ku Efeso,ta kwimala ko,kubuno anatinja nkungu mu Asia;kubuno abagha akutibitila, ndi akosha, ike ku Yelusalema busi bwa Pentekote. ¹⁷ Kutuka ku Mileto,Polo asingagha bantu ku Efeso bamane bakungu ba Kanisa. ¹⁸ Gha bikagha kweli,ababulagha:Mukumana buno tukila busi butangi bun'ingilagha ku Asia,nshashighile kwenda ghamoyi na benywe , ¹⁹ mu kukolela Mukota mu kwimbotya ghamoyi na bisoshi,nu mu nkatighi na malingiko manteghagha Bayuda. ²⁰ Mukumana buno nshababisagha kena ku bya bimwashima,nshakwagha boba kubasansila kitondo cha Ghongo nu kubeghesha bwasibwasi nu mu mashumba, ²¹ kubula Bayuda nu Bagiliki kw'isungula mitima kuli Ghongo nu lukatisho kweli Mukota witu Yesu Kilishitu. ²² Nu lelo lola,mu kukandwa na Muusa,nenda ku Yelusalema,shikumana byanikile ko; ²³ tughu musumba ku musumba Muusa Musogha wankengesha buno miyololo nu minubo sa ndindila. ²⁴ Tondo nshinakita champa ku kalamo kani,anga kanabinde ka mutali munene,kubuno nishililishe lughendo lwani na mboghimboghi,nu nkashi sa Ghongo sineleshebwagha na Mukota Yesu,kusansa musaghu musogha wa mpang'inene sa Ghongo. ²⁵ Nu lelo lola,nkumana buno ta mukandola lingo ku chaso chani, kwinu benywe bansayi kunatingagha kweghesha bukota bwa Ghongo. ²⁶ Uchasula nababula buno nenga kubushi bwa mikila sinu benywe bansayi. ²⁷ Kubuno nabasambalinde binsayi bya Ghongo nu nshababisile kena. ²⁸ Mwindange benywe b'inene,nu kikembe kinsayi kimweleshibwe na Muusa Musogha buno mu kilange,buno mucheleshe indya,kiyeleshagha winene kutingila mikilha saghe . ²⁹ Nkumana buno kumbusa kwani ,mu benywe mukatuka mpagha si takashighilila kikembe, ³⁰ nu mukantighi na benywe mukimala bantu bakeghesha bitondo bya manko,buno bimbulutile beghesha. ³¹ Mulole busogha ,mu kukengela mu myaka esatu,nshashighagha kutenda na muntu umoyi moyi ku benywe busi nu kindi na bitengetenge byani. ³² Nu lelo nabashigha mu maboko ma Ghongo nu mu kitondo cha mpang'inene,ku ghoso unabakokomesha nu kubelesha mwandu ghamoyi na bansayi basanana. ³³ Nshabagha na nkasa sa bikulo,ali nolo ali nshulu sa muntu, ³⁴ Mukumana benywe binene buno maboko mani u maneleshagha bi nashima ghamoyi na bantu ba nabagha nabo. ³⁵ Nabaloshagha na menge mansayi buno mu kukita nkashi u bunimika basoshu,nu kukengela bitondo bya Mukota,watendagha w'inene: Kweli ighuma linene kwelesha bantu kutinga kweleshibwa. ³⁶ Gha shilagha kutenda ubo,akomagha mashwe ,nu ing'asegha ghamoyi nabo bansayi. ³⁷ Nu bansayi batuchagha bitengetenge ,nu bansayi bamukumbakumbagha Polo, ³⁸ bamukumbatilagha,ghamoyi nu kulila mu mitima mu kukengela bitondo bya babulagha buno ta bakamumona ko lingo.Nu bamwelekeshagha kwika kw'imbungo.