¹ Gha bagha Apolo eli ku Kolinto,Polo mu kushila kutimba misumba inene sa Asia, ikagha ku Efeso.Mukusanga Begheshibwa bamoyi,ababulagha: ² Gha mwakatishagha,mwasekelagha Muusa Musogha?Bamwakulagha: Ta tunwongwagha bakutenda buno kweli Muusa Musogha. ³ Atendagha Lupatisho ki lumwapatishibwagha ?Nu baakulagha:Lupatisho lwa Yoani. ⁴ Agho inga Polo ababula: Yoani apatishagha lupatisho lwa kw'isungula mutima,kubula bantu bakatishe ku olya ukashwa kumbusa kwaghe,u kutenda mu Yesu. ⁵ Kw'ibyo bitondo,bapatishibwagha mw'ishina lya Mukota Yesu. ⁶ Gha bagha Polo ashila kubabikila maboko,Muusa Musogha abikilagha,nu batendagha mu mitendeshi ningi,nu kulisha bitondo bya bulenganya. ⁷ Babagha anga bantu ikumi na babili . ⁸ Kushila agho,Polo ingilagha mu Sinakoki , u mwatendelagha bwasibwasi.Mu myeshi esatu,Polo egheshagha bitondo bya bukota bwa Ghongo,imbikagha akulhuta ba bamwongwililagha. ⁹ Tondo,ubo bwabagha bamoi na mitima sakandwa nu site katisha,intuchagha mubo,kulekanucha begheshibwa,nu kweghesha busi na busi ku likolo lya muntu ukumanwa Tilanusi. ¹⁰ Ibyo byatingagha mu myaka imbili,bubo bansai babagha mu Asia,Bayuda nu Bagiliki bongwililagha kitondo cha Mukota. ¹¹ Nu Ghongo akitagha bitangalo bingi kutingila Polo, ¹² buno asundagha basambi nshulu sitilagha ku mubili waghe,nu nsambo salamagha nu basumbu kutuka. ¹³ Batibiti bamoyi ba basumbu ba Bayuda ba kutingatinga, baghelekagha kwasa ishina lya Yesu, ku babo babagha na basumbu,mu kutenda: Kw'ishina lya Yesu uku sambalwa na Polo,tuka! ¹⁴ Ba bakitagha ubo,babagha bana mutubakamu ba Sheva,Muyuda, umoyi ku bisankogha banene. ¹⁵ Isumbu lyabakulagha:Nkumana Yesu, nu nkumana Polo u nayi? ¹⁶ Nu muntu wabagha n'isumbu indekelagha kubo,abaghimbagha maghala,nu ku babasha,nu batukagha lubilo mweso numba beli munkanka nu babeleka. ¹⁷ Ibyo byamanwagha na Bayuda bansayi nu Bagiliki bansayi bikalagha ku Efeso,nu babo bansayi bwakatwagha na boba,nu ishina lya Mukota Yesu lya tatwagha. ¹⁸ Bengi ku babo bakatishagha,bashwagha kusambala nu kutenda bwasibwasi bi bakitagha. ¹⁹ Nu bamoyi ku babo baghilha,mu kushwa na bitabo byabo babighishagha ku miso ma bantu:Byabagha binakwile bichele anga elefu makumi matano ma bikulo. ²⁰ U bwasandabanile kitondo cha Ghongo na bwangato nu mpumba. ²¹ Gha tingagha ibyo bitondo,Polo alenganyagha kwenda ku Yelusalema,mu kutinga ku Makedonia nu Akaya.Itendyagha:Gha nkika ko,bu busogha nubo nike ku Loma. ²² Asingilagha ku Makedonia babili ku bakiti baghe,Timote nu Elashito,nu akitagha lingo bindi bikeke ku Asia. ²³ Mwebyo bindi,kwabagha lwayo lunene,ku bitondo bya Mukota. ²⁴ Muntu umoyi ukumanwa Demetilio,mobaki na bikulo,tusumilo twa Diana,walighagha bakiti baghe ba mulimo bikulo bingi. ²⁵ Abakulumanyagha, ghamoyi na babagha na nkashi emoyi nu kutenda: O bantu,kughuma kwitu , kwatuka mu lino itumbi; ²⁶ nu mu kumana nu kwongwa buno ,ta ku Efeso kw'inene,tondo mu Asia insayi,ghoso Polo abuluta bantu bengi mu kutenda buno,ghongo bakukitwa na maboko ma bantu ta ba Ghongo. ²⁷ Mabi matuka kwebyo,tabuno itumbi litu lishile,tondo lingo kasumilo ka ghongo munene Diana kabengwe,nu bukota bwa olya ukwelwa mu Asia nu mu kisi kinsayi bushilile. ²⁸ Mukuba bitondo ibyo bya bashibucha,bakughagha bubibu: Diane wa Efeso u munene ! ²⁹ Musumba unsayi wabagha na kabilikito.Batibitilagha bo bansayi ku mulungu nu babulutilagha gho Gayo,nu Alisitaliko bantu ba Makedonia,banabo ba lughendo ba Polo. ³⁰ Polo ashimagha indoshe kweli bantu,tondo begheshibwa bamunanyagha; ³¹ bamoyi ku bisa Asia babo babagha binda baghe bamusingilagha bantu bamunanye endaghe mu mulungu. ³² Bamoyi bakughagha bubuno nu bango bubulya,kubuno lwayo lwabagha mu musanganano,nu bengi tabamanagha ki chasulagha bakulumana. ³³ Agho batuchagha Likisandele mu bantu u wenshwagha kubusho na Bayuda,nu Likisandele ,mu kwimika kuboko alondagha kutenda na bantu. ³⁴ Gha bamanagha buno Likisa eli Muyuda, bansayi bakughagha anga s'imbili: Diana wa Baefeso u munene! ³⁵ Mukushila kubibya bantu, mutili atendagha:"Bantu ba ku Efeso,nayi utekumana buno musumba wa mulangi wa kasumilo ka keko Diana munene nu kimbuli chaghe chatuka kw'ighulu? ³⁶ Ubo tabunanwa,mwema ku koba,nu mukitaghe kena lubilolubilo. ³⁷ Kubuno mwashwile na bantu,batakitile bubi,nu tababengile ghongo witu wa mukashi. ³⁸ Ndi Demeteleo nu bakiti baghe bite bya kutalikila muntu,kweli busi bwa bitondo;ba manane ku matenda. ³⁹ Nu ndi mwite bingo bitondo,bikakalwa mu musanganano. ⁴⁰ Tunashwa kutalikilwa buno beshwe u twalubile lwayo ku bino byatinga buno busi,kubuno taku nu kitondo chasula bano bantu bakulumana. ⁴¹ Kyebyo bitondo,alaghagha musanganano.