¹ Kushila agho,Polo atukagha ku Atene nu kwenda ku Kolinto. ² Asangagha ko Muyuda umoyi ukumanwa Akila,abutwa ku Ponto,ikagha ku Italia ghamoyi na mughole waghe Pilisila,kubuno Kolode atinjagha mubiko buno Bayuda bansayi batuke mu Loma. Ikalagha nabo ghamoyi; ³ nu obo bubakitagha nkashi emoyi,ikalagha kwabo nu kukitila nkashi ko;babagha baluki ba hema. ⁴ Polo egheshagha mu sinakoki mu sabato insai,kulhuta Bayuda nu Bagiliki. ⁵ Tondo ghikagha Sila nu Timote ku Makedonia,imbikagha mu kitondo ,kulosha Bayuda buno Yesu u Kilishitu. ⁶ Mwa mu kunana Polo nu kumutuka,ghono atitulagha nshulu saghe bubibu, nu kubabula buno mikilha sinu sibe ku matwe minu.Ine nenga lyani.Tukila lelo, nenda ku bingo bilongo". ⁷ Mu kutuka agho ingilagha kweli umoyi ukumanwa Yusto,muntu ukukwa Ghongo boba nu numba saghe sabagha salanda na Sinakoki. ⁸ Agho,Kilipo mukulu wa sinakoki akatishagha Mukota ,ghamoyi na bantu ba mu numba saghe. Nu Bakolinto bengi babongwililagha Polo bakatishagha nubo,nu kupatishwa. ⁹ Mukindi,Mukota atendagha na Polo mu kalolesho:Ntukwe boba,tondo tenda,nu ubibaghe, ¹⁰ kubuno nili ghamoyi nowe, nu muntu ntakakukata ko buno akukite bubi; Tenda,kubuno,nite bantu bengi mu ghuno musumba. ¹¹ Ikalagha agho mwaka umoyi nu myeshi mutuba,ekweghesha Bakolinto kitondo cha Ghongo. ¹² Mu bindi bya Galio wabagha Mukulu wa musumba wa Akai,Bayuda balhubagha ishibo kuli Polo nu kumwicha ku tulubinali, ¹³ nu kutenda:"Ghono muntu akulutha bantu belele Ghongo utalingimana na mubiko . ¹⁴ Polo gha londagha kutenda,agho Galio abulagha Bayuda:"Ndi binabinde tabyasanana ali bitondo bibi,inabongwilinde busogha,e Bayuda; ¹⁵ Tondo ndi myango ku kitondo,ku mashina,nu ku mulembe winu ibyo bya balola;Nshikushima nibe shushi w'ibyo bitondo." ¹⁶ Nu abasingagha ku tulubinali. ¹⁷ Agho bansayi bakatagha Sositene,mukulu wa Sinakoki, bamupundagha ku miso ma tulubinali nu Galio ntakitagha kena. ¹⁸ Polo ikalagha ku Kolinto bindi bingi.Kushila agho,alaghagha mibuto nu kwenda ku Silia ghamoyi na Pilisila nu Akila,gha shilagha kw'imbegha itwe gha Kenkulia,kubuno indumbishagha. ¹⁹ Bikagha ku Efeso,nu Polo ashighagha ko ba bamwelekeshagha. Mu kwingila mu Sinakoki,atendagha na Bayuda, ²⁰ bamuseghagha atinje bingo bindi . ²¹ Tondo ntimilagha,nu abalaghagha mu kutenda :Bubusogha nitinje kisaghulo ki kushwa ku Yelusalema.Nkakuluka kuno, ndi Ghongo ashima.Nu atukagha ku Efeso . ²² Mu kutuka ku Kaisalia abakamilagha ku Yelusalema,nu mu kushila mu kukesha Kanisa samba,akumbilagha ku Antiokia. ²³ Ghabinde atinja bindi bikeke ku Antiokia,Polo endagha ,atimbagha Galatia,Filigila mu kukokomesha lukatisho lwa begheshibwa. ²⁴ Muyuda umoyi ukumanwa Apolo wabutwa mu ALekisandulo,muntu ukumana kutenda nu washima kitondo cha Ghongo,ikagha ku Efeso. ²⁵ Akulagha mu nsila sa Mukota,nu wakokomesha mu lukatisho, asambalagha nu kweghesha bya bulili ku bya Yesu abagha akumana tughu lupatisho lwa Yoani. ²⁶ Atendagha bwasibwasi mu sinakoki.Akila nu Pilisila,mu komwongwilila,babagha nawe,nu bamuloshagha busoghabusogha nsila sa Ghongo. ²⁷ Bwa londagha kutinga ku Akaya,mibuto sa mweleshagha maghala nu batililagha Begheshibwa bamusekele busogha.Gha binde ika,ku mpang'inene sa Ghongo,abagha musogha ku bakatisha. ²⁸ Buno,ananagha Bayuda mu kubalosha bwasibwasi kutingila kitondo cha Ghongo buno Yesu u Kilishitu.