¹ Polo nu Sila batingagha mu Amutufolo nu Apolonyo,nu bikagha ku Tesalonika,kwa bagha sinakoki sa Bayuda. ² Anga tungo saghe ,Polo ingilagha mo .Mu Sabato isatu,endagha myango nabo kutingila kitondo cha Ghongo, ³ mu kubasambalila buno Kilishitu ema kunuba nu kutuka ku bakui.Nu ababulagha,whoso Yesu unkubabulagha , u Kilishitu. ⁴ Bamoyi kubo bimilagha nu kuyanga Polo nu Sila,ghamoyi na Bagiliki bengi bakukwa Ghongo boba,nu bakashi bengi ba myanya nsogha. ⁵ Tondo Bayuda ,bayongwa bakulumanyagha bantu ba bikembe bikembe,nu balishagha lwayo mu musumba.Bingilagha mu numba sa Nasoni,nu balondagha Polo nu Sila, buno babiche kweli abo bantu. ⁶ Gha bindagha kubamona,babulutagha Yasoni nu engo mibuto kweli bakali ba mbasa ba mu musumba,mu ku kugha: Abo bantu ba bulughanya kisi kinsayi,bikile ghano nugho,nu Yasoni abasekinde. ⁷ Bakukola bitondo bitalembana na byatendwa na Mwami ,mu kutenda buno kuli ungo Mwami u Yesu. ⁸ Kwebyo bitondo,bashibuchagha bantu nu bakali ba mbasa, ⁹ bananagha kushighilila Yasoni nu ba bango kwikila mpina si babeleshagha musanga. ¹⁰ Agho mu kindi,mibuto sa shighililagha Polo nu Sila bende ku Belea.Mu kwika kwabo ,bingilagha mu sinakoki sa Bayuda. ¹¹ Abo Bayuda babagha na mitima nsogha kughimba ba ku Tesalonika; Basekelagha kitondo na nkasa insayi,nu bendagha baghonsola kitondo cha Ghongo bindi binsayi buno bulole bi babulwagha ndi byeli bya bulili. ¹² Bengi kubo bakatishagha ghamoyi na bakashi bengi ba Bagiliki ba bamanililwa,nu balume bengi. ¹³ Tondo gha managha Bayuda ba ku Tesalonika buno Polo akusansa kitondo cha Ghongo ku Beloya,bashwagha kubulughanya bantu. ¹⁴ Agho ,mibuto songolochagha Polo mu ungo muse wa kitatenge;Sila nu Timote bashighalagha ku Beloya. ¹⁵ Ba belekeshagha Polo bamwichagha ku Atene.Nu bakulukagha,kusambalila Sila nu Timote buno bamusange lubilo. ¹⁶ Bwabagha akubalindila ku Atene, Polo onganwagha mu kulola ku byeko bisala mu ghoso musumba. ¹⁷ Mu sinakoki atendagha na bayuda nu bantu bakukwa Ghongo boba, nu bindi binsayi mu mulungu ghamoi nabo basangagha. ¹⁸ Ngatu umoyi sa ba Epukilo nu Sitoini batendagha nawe.Bamoyi bamubulagha:Buni bwatenda mano matenda?Bango,ku mongwa akughanula Yesu nu kutuka ku bakuyi,batendagha:Akutenda ku byeko bya kulayi. ¹⁹ Agho bamukatagha,nu kwenda nawe ku Alopago mu kutenda:Tunashima tumane bino biukutweghesha . ²⁰ Kubuno ukutongwisha ku bitondo bya kulai.Tukushima tumane u bikiki ibyo. ²¹ Tondo,bantu ba Atene nu basumba babesagha ku Atene bendagha batinja nkungu sabo mu kutenda nu mu kwongwilila bitondo. ²² Polo,mukantighi na Alopago atendagha :Benywe bantu ba Atene,nabamona ko anga bantu b'indini. ²³ Kubuno,mu kutimba musumba winu,nu kulola bikayi bya kutungilila ,nasangile kasasa ka melelo kamoyi gha tilwa: Kuli cheko kitekumanwa ! Bimukwela nu tamukubimana, u ki nkubasambalila. ²⁴ Ghongo wabumbagha kisi kinsayi nu binsayi byeli mo,Mukota w'ighulu nu wa kisi,ntakwikala mu numba sa kukumbamila sobakwa na maboko ma muntu; ²⁵ Nta kukitilwa milimo na maboko ma bantu,anga olya wite nkasa sa kikayi kilebe,we ,ukwelesha bansayi kalamo,kwisa,nu bikayi binsayi. ²⁶ Abumbagha bantu bansayi ,batuka mu mikilha emoyi,b'ombule mu kisi kinsayi,nu abikile bindi byabo ,nu gha bana shindila; ²⁷ Ashimagha balonde Mukota,nu bakite maghala ma kumumona ko mu ku kitakita,nu nteli bulayi n'omoyi ku beshwe, ²⁸ kubuno muwe twite kalamo,kutengya,nu kuba.Nu u byatendwagha nubo na batili binu :Kwaghe tuli kilongo. ²⁹ Agho lino mu kuba kilongo cha Ghongo,tatunakosha kukatisha buno Ghongo asusana nolo,na kakulo,ali ikoyi,bya tulilwe na batumbi. ³⁰ Ghongo,nta kughansa bindi bya bukongolo bwitu,akutenda na bantu bansayi,ku bishiki binsayi ,binsungule mu mitima, ³¹ Kubuno abikile kindi kimoyi cha kughaya kisi kuyangana na bulili,kutingila muntu wasombolagha,weleshagha bansayi kamanililo mu kumutucha ku bakuyi.. ³² Gha bongwagha akutenda ku bya kutucha ku bakui,bamoyi basekagha ,nu bango batendagha :Tukakongwilila bungo busi. ³³ Agho Polo atukagha munkatighi nabo. ³⁴ Bamoyi kubo bamuyangagha nu kukatisha,Denisi muntu wa Alopago,mukashi umoyi wamanaghwa Damali nu bango ghamoyi nabo.