¹ Polo endagha ku Delebe nu Lisila.Nu lola,uko kwabagha mwegheshibwa umoyi ukumanwa Timote,mwana wa mukashi umoyi wa Muyuda wakatisha nu'ise Mugiliki. ² Mibuto sa Lisila nu Ikoni bamutenenekelagha busogha. ³ Polo alondagha kwenda nawe;nu mu kumukata,amumonyagha bwali bwa munganga,kubuno Bayuda babagha agho bamanagha buno ise eli Mugiliki. ⁴ Mwa mukutinga mu misumba,bakakishagha mibuto siyangilile busogha bitondo bi babulwagha na ntumwa nu bakungu ba Yelusalema. ⁵ Tunisa twakokomeshagha mu lukatisho,nu ighanso lya bantu lyabagha lwingi busi na busi. ⁶ Mukuba Muusa Musogha abanania ku sambala kitondo ku Asia,batingagha Filigia nu mu kisi cha Galatia. ⁷ Gha bikagha bwighi na Misia,bashimagha bingile mu Bitinia;tondo Muusa wa Yesu wabananilagha. ⁸ Agho,babakamilagha ku Misia,nu kukumbila ku Tolowa. ⁹ Mukindi, Polo abagha na kalolesho,muntu umoyi wa Makedonia amwikilagha nu kumulilila :Tinga ku Makedonia,shwa utukashe! ¹⁰ Kushila ako kalolesho ka Polo,twalondagha agho lino twende ku Makedonia,mu kumana buno Mukota atumana ko kusansa musaghu musogha. ¹¹ Mu kutuka ku Tolowa,twendagha bulingilingi ku Samotalase,nu bwachagha busi twikagha ku Neapolishi. ¹² Kutuka agho,twendagha ku Filipi musumba musoki wa Makedonia,wabagha mu bukobe.Nu twatinjagha bindi bikeke mu ghoso musumba. ¹³ Busi bwa sabato,twendagha kumbugha ,ku lusi ku twamanagha buno kweli kishiki cha masegho.Twabundagha ghansi nu twatendagha na bakashi ba babagha bakulumanile. ¹⁴ Umoyi kubo ukumanwa Lidia,mughushi wa nshulu,wa musumba wa Tiatila,abagha mukashi u kukwa Ghongo boba,nu ukumwongwilila.Mukota amweleshagha mulenganya musogha wakongwilila bikutenda Polo. ¹⁵ Gha shilagha kupatishibwa we nu bantu ba numba saghe,atuseghagha :Ndi mwalola nakatisha mu Mukota,mwingile nu numba sani nu mwikale mo.Nu atukakishagha na bitondo byaghe. ¹⁶ Bu twabagha tukwenda mu kishiki cha masegho,mukiti umoyi wa mukashi wabagha n'isumbu lya bulighi,mu kubukisha bantu,abeleshagha bikulo bingi,ashwagha ku tweli, ¹⁷ nu kutuyanga,Polo nu beshwe akughagha: Bano bantu beli bakiti ba Ghongo wa mw'ighulu,nu ba kubalosha nsila sa lonio. ¹⁸ Akitagha ubo bindi bingi.Mu kukutwa kwa Polo akebatukagha ,nu abulagha musunbu: Nakukakisha,mw'ishina lya Yesu Kilishitu,mutuke mo. Nu mwako kaluma atukagha. ¹⁹ Bakulu ba ghoso mukiti mukashi,gha balolile buno malelamilo mabo ma shila,bakatagha Polo nu Sila,nu kubabulhutila ku mulungu kweli bisa mbansa . ²⁰ Babaloshagha kuli basushi nu kutenda:Bano bantu babulughanya musumba witu; ²¹ beli Bayuda,nu bekweghesha ntungo sitimilwa kusekelwa ali kuyangwa na beshwe Baloma. ²² Bantu ba bashibukilagha,nu bashushi mu kuba babatucha nsulu sabo,ba kakishagha bapundwe na tuti. ²³ Mu kuba bashila kubapunda binkune,ba balekelagha mu kahombo,nu kukakisha mulangi wa kahombo abalange busogha. ²⁴ Mulangi wa kahombo,kushila kusekela ulo lukakisho,abalekelagha mu kahombo ka mwa munda,ba bakandagha maghulu na miyololo. ²⁵ Mu katighi na kindi, Polo nu Sila babagha bakusegha nu kwemba nembo sa kutata Ghongo,nu ba babagha mu kahombo ba bongwililagha. ²⁶ Agho,kalingini kanene katingagha nu bisusu bya kahombo bya tengagha bubibu;Mwako kaluma,numbi insayi sighukagha,nu miyololo insayi si bakandwagha sa ketukagha. ²⁷ Mulangi wa lumbi abukagha,nu kulola buno numbi sa kahombo sighukilwe,atomolagha mwele waghe mu lubho buno iyite mu kulenganya buno bakandwa batina. ²⁸ Tondo Polo akughagha bubibu:Ntw'ikite bubi, beshwe bansayi tuli ghano. ²⁹ Agho mulangi,mu kwema chengeshi,ingilagha lubilo,nu mu kughilimila,indekelagha mu mashinshi ma Polo nu Sila; ³⁰ Abakukulagha,nu kutenda:Bakota, nikite ki n'one ? ³¹ Polo nu Sila bamwakulagha : Katisha Mukota Yesu ,nu ukona,uwe nu bantu bansai ba mu numba sobe. ³² Nu bamusambalilagha kitondo cha Mukota,nu bansayi babagha mu numba saghe. ³³ Mwecho kindi,endagha kwaghe ghamoyi nabo,abasughagha byulu,nu apatishwagha, we nu bansayi babagha mu numba; saghe. ³⁴ Mu kubicha kwaghe,abeleshagha indya,aboghaboghagha na bisakwabo ku buno bakatisha Ghongo. ³⁵ Mu musi,basushi basingagha bantu babule mulangi wa kahombo: Shighilila abo bantu. ³⁶ Nu mulangi wa kahombo asambalilagha Polo ibyo bitondo:Basushi basingile buno mushighililwe;kashi: mukukuke,nu mwende na boolo. ³⁷ Tondo Polo abulagha ba basingwagha: Mukushila kutupunda na tuti gha mulungu nu kwinda kughayibwa, beshwe Baloma,batulekinde mu kahombo, nu bise batutucha mo mu lubisobiso ! Ta bukuba ubo.Bashwe bo binene kutukandula ! ³⁸ Ba basingwa basambalilagha basushi ibyo bitondo,ba ghanaghanagha kubuno beli Baloma. ³⁹ Bashwagha kubabonga,nu ba bakandula nu kubema batuke mu musumba. ⁴⁰ Mu kuba batuka mu kahombo,bingilagha mu numba sa Lidia ,nu kushila kulola nu kutenda na bisakwabo,bendagha.