Kikando 15
1
Bantu bamoyi,batukagha ku Yudea,begheshagha bisakwabo,mu kubabula:Ndi tamumonywa bwali bwa munganga kulembana na milembe sa Musa,tamunakosha kona.
2
Polo nu Balanaba babagha na lukakala nu myango ;nu mibuto sakalagha lwango, buno Polo nu Balanaba, nu bamoyi kubo, bende ku Yelusalema kuli ntumwa nu bakungu bashililishe icho kitondo.
3
Gha bagha Kanisa kashila kubelekesha,bendagha kutinga Fenesia nu Samalia,mu kughanikisha kughaluka kwa bilongo,nu bichagha mboghimboghi inene ku bakatisha bansayi.
4
Mu kwika ku Yelusalema,basekelwagha na Kanisa,ntumwa nu bakungu,nu baghanikishagha binsayi byakitile Ghongo ghamoyi nabo.
5
Agho bamoyi ku Bafalisayo,ba bakatishagha,b'imalukagha nu kutenda buno bwatunganana kumonyampala sa munganga bakatisha ba babilongo nu kubakakisha bayange bya byatendwa mu mulembe wa Musa.
6
Ntumwa nu bakungu bakulumanagha buno batinge mwecho kitondo.
7
Mu myango nene ,Petelo imalukagha nu kubabula:Bisakwitu ,mukumana buno tukila kalayi Ghongo akitile kusombola gha musamba ,buno, kutingila kanywa kani,bilongo byongwe musaghu musogha nu bakatishe.
8
Nu Ghongo,u kumana mitima,abatenenekelagha, mu kubelesha Muusa Musogha anga beshwe;
9
ntakitagha katobololo gha twasambana nabo,mu kwengya mitima sabo kutingila lukatisho.
10
Lelo,buni bumukugheleka Ghongo, mu kwecha begheshibwa mushigho walibanwagha na batata nu beshwe
11
Tondo ku mpang'inene sa Mukota Yesu u butwalenganya buno t'onile ,anga bo nubo.
12
Musanganano unsayi wakobagha,nu kongwilila Balanaba nu Polo,babagha bakughanikisha bitangalo nu bighanaghana bya kitagha Ghongo kubatingila mu kantighi na Babilongo.
13
Gha bashilagha kutenda,Yakobo atendagha ,nu kubabula:Bisakwitu,munongwilile!
14
Simoni aghanikisha bwengeleshagha tanga Ghongo mu bilongo buno asombole kilongo kimoyi kimanwe mw'ishina lyaghe.
15
Nu ghamoyi nobo,bitondo bya balenganya byalingimanagha anga bwatililwe:
16
Kushila agho ,nkakulukila, kw'imika numba sa Daudi sendukile ,nu kusibika lingo nsogha,
17
kubuno bashighalagha ba bantu balonde Mukota,nu bibyo bilongo binsayi bikutekulwa kutingila ishina lyani,u bwatenda Mukota,wakita bino bitondo.
18
Nu bikumanililwa kutingila we mu milyalya.
19
Uchasula nimila ninengo takuli bya kunubya babo ba Bilongo bakughalukila Ghongo,
20
tondo batililwe buno binanye na kwela byeko,nu matensha,nu kulya nama sikwila.
21
Buno,kulingila ngiso ningi ,Musa ite bantu mu misumba bakusambala bitondo byaghe , bikusomwa bindi binsayi mu masinakoki busi bwa sabato .
22
Agho ,bwaswaghilagha ntumwa nu,bakungu, nu Kanisa kansayi, basombole bantu bakusingwa ku Antiokia ghamoyi nu Polo nu Balasaba,Yuda ukumanwa Balanaba nu Sila,balume bamanililwagha na mibuto.
23
Babeleshagha maluba matililwa buno: Ntumwa,bakungu nu bisakwitu,ku bisakwitu beli ku Antiokia,ku Sulia,nu ku Silisi,samba !
24
Mu kwongwa buno bantu bamoyi batukagha kwitu ,nu tatwabeleshishe lukakisho lwampa, bayungyayungyagha mitima sinu,na bitondo byabo bingi,
25
mu kushila ku kulumana,twalolile busogha tusombole bantu nu kubasinga kwinu ghamoyi na nshimwa situ Balanaba nu Polo,
26
babo bantu besanile kalamo kabo kw'ishina lya Mukota witu Yesu-Kilishitu.
27
Twasinga kwinu Yuda nu Sila, bakambasambalila na kanywa kabo ibyo bitondo bimoyi.
28
Kubuno bwaswaghila Muusa Musogha nu beshwe,tubechaghe ungo mushigho ute musogha ,
29
kumana kunana kulya nama satulilwa byeko,nu mikila,nu nama sikwila,nu matensha,u bitondo bimwaseghwa mwindange nabyo.Maghala.
30
Agho nugho,mu kushila kulagha Kanisa,bendagha ku Antiokia kwicha ko maluba mu musanganano.
31
Mu kushila ku masoma,mibuto saboghaboghagha na bitondo byabagha mumo bya beleshagha maghala.
32
Yuda nu Sila babagha nubo balenganya,ba bakokomeshagha mitima na matenda mabo.
33
Mu bindi bikeke,mibuto sabashighagha na boolo nu kukuluka ku babo babasingagha.
34
Tondo,Sila alolagha busogha kushighala.
35
Polo nu Balanaba bikalagha ku Antiokia ,mu kweghesha nu kusansa ,ghamoyi na bango, musaghu musogha wa Mukota .
36
Bindi bikeke byatingagha,Polo abulagha Balanaba:Tukuluke kusona bisakwitu mu misumba insayi kutwasansagha kitondo cha Mukota,tulole buni bubeli.
37
Balanaba alondagha kwenda na Yoani ukumanwa Maliko;
38
tondo Polo alolagha busogha bendaghe na muntu wabashighagha kalayi ku Mpanfilia,u tabelekeshagha mu mulimo wabo.
39
Mu kwinda kongwana balekanukagha.Nu Balanaba, mu kutola Maliko bendagha nawe ku kakishi ka Kipulo.
40
Wasingwagha na mibuto ku mpanga nene sa Mukota,Sila asombolwagha na Polo nu kwenda nawe.
41
Batimbagha Sulia nu Kilikia, mu kw'imika Tunisa.