¹ Kuko Ikone,Polo nu Balanaba bingililagha bo bansayi mu Sinakoki sa Bayuda, begheshagha,nu bantu bengi ba Bayuda nu Bagiliki bakatishagha. ² Tondo Bayuda batakatishagha bindagha mu bantu milenganya mbi ku babo bakatisha. ³ Bikalagha bindi bingi ku Ikone,mu kutenda na bulili bunsayi,bakatilindwe na Mukota,watenenekelagha kitondo cha mpanga inene,nu wimilagha bikitwe na maboko mabo,bighanaghana nu bitangalo. ⁴ Bantu ba musumba bimbeghanyagha mo :bamoyi ku Bayuda nu bango ku ntumwa. ⁵ Bu babagha na lwango lumoyi na bami babo,betekatisha nu Bayuda basaghalukagha buno babeneghe nu kubalekela makoyi, ⁶ Polo nu Balanaba mukumana ubo,bimbisagha mu misumba sa Likania, Lisila,nu Delebe,nu mu myelo sa bwighibwighi. ⁷ Nu basansagha ko Musaghu Musogha . ⁸ Ku Lisila,kwabagha kasokoluma kamoyi ka maghulu,tukila kubutwa kwaghe,nu ntendagha. ⁹ Ongwagha Polo akutenda,nu Polo,mu kumwengelesha bubibu,nu kulola buno ite lukatisho lunasula alama, ¹⁰ atendagha bubibu: Imala busogha , bulingilingi na manshinshi mobe.Nu alengagha nu kutabanga. ¹¹ Mu kulola bwakita Polo,bantu batendagha mu mitendeshi sa Likania: Byeko byasusana bantu bika kwitu. ¹² Bamanagha Balanaba buno u yupitele,Polo Melekile,kubuno we u wabagha u kutenda. ¹³ Sankogha wa yupitele wabagha na numba sa kukumbamila gha mwingilo wa musumba,ashwagha na nkambu ghamoi na mishighi ku mingilo, ashimagha buno bantu batuche binsansa. ¹⁴ Ntumwa Balanaba nu Polo,ghabongwagha kobo,batagha nshulu sabo ,nu bendagha lubilo mu nkatighi na bantu,nu kutenda bubibu : ¹⁵ mu kukugha: O bantu,ki chasula mwakita ubo?Nu beshwe tweli bantu anga benywe,nu,mu kubikisha musaghu musogha,twabema mushighane na bitondo bya tughutughu,buno mughalukile Ghongo wabumbagha ighulu,kisi,kitatenge nu binsai byeli mo. ¹⁶ Ghoso Kalagha,ku myaka satingagha, ashighililagha bilongo binsai biyange nsila sabo , ¹⁷ bwa ntakobagha kuteneneka buno we u nayi mu kukita busogha,nu mukulocha mbula kutuka kw'ighulu nu bindi bisogha bya milimo,mu kubelesha indya lingi nu kwisasha mitima sinu mboghimboghi. ¹⁸ Kwebyo bitondo,bananyagha bantu bubibu kubelesha kisansa. ¹⁹ Agho kwatukagha ku Antiokia nu ku Ikone,Bayuda bimilwagha na bantu nu kushila kulekela Polo makoyi,bamubulutilagha kushinda musumba ,mu kulenganya buno akwa. ²⁰ Tondo,mu kutimbwa na begheshibwa imalukagha,nu ingilagha mu musumba.Ghachagha busi,bendagha ku Delebe ghamoyi na Balanaba. ²¹ Ghabashilagha kweghesha ghoso musumba,nu kwimika bagheshibwa bakeke ,bakulukagha ku Lisile,ku Ikone,nu ku Antiokia, ²² mu kukokomesha lukatisho mu mitima sa begheshibwa,kubema bakatilinde lukatisho,nu mukutenda buno kutingila minubo ningi u butukingila mu bukota bwa Ghongo. ²³ Bimikagha bakungu mu Kanisa kamoyi kamoyi ,nu kushila kusegha nu kwinanya indya mu masegho ,ba babikagha mu maboko ma Mukota,ubakatishagha. ²⁴ Mu kutinga mu Pisidia,bendagha mu Mpafilia, ²⁵ basansagha kitondo ku Peleje,nu bakumbilagha ku Ataliya. ²⁶ Kutuka agho bendagha ku Antiokia ,kubabakishwagha kutingila mpanga inene sa Ghongo ku milimo sibakitagha. ²⁷ Mukuba bika,bamanagha Kanisa,nu baghanikishagha binsayi byakitagha Kalagha nabo,nu buno bwighulinde bilongo lumbi lwa lukatisho. ²⁸ Nu bikalagha bindi bingi ghamoyi na begheshibwa.