¹ Mu Kanisa ka Antiokiya mwabagha balenganya nu beghesha :Balanaba,Simeoni wamanaghwa Nigeli,Lukusu wa ku Kulene,Manahenu wa kulagha ghamoyi na Helode Mukota,nu Saulo. ² Gha babagha bakukitila Mukota milimo,mu kashi sabo nu mu masegho ma kw'inanya indya,Muusa Musogha atendagha: Mumbikile banasombola Balanaba nu Saulo ku mulimo u nabamaninde. ³ Agho ,ghabashilagha kw'inanya indya nu kusegha,bababikilagha maboko,nu kushigha bende. ⁴ Balanaba nu Saulo,u basingwagha na Muusa Musogha bakumbagha ku Seleuki, nu kutuka agho bendagha ku kakishi cha Kipulo. ⁵ Kwika ku Salamine,basansagha kitondo cha Ghongo mu Sinakoki sa Bayuda.Bakashwagha na Yoani. ⁶ Gha bashilagha kutimba kakishi kwikila Pafosi,basangagha mughilha umoyi, mu Yuda mulenganya wa manko , wamanaghwa Balayesu. ⁷ wabagha ghamoyi na mukulu Selegwa Polo muntu wa bwenge.Ghoso amanagha Balanaba nu Saulo,nu aloshagha buno akushima kwongwa kitondo cha Ghongo, ⁸ Tondo Elimasi, mughilha u bwatenda ishina lyaghe,ntabasiminde, kubuno alondagha atuche mukulu mu lukatisho. ⁹ Agho Saulo,u kumanwa lingo Polo, wisalilanagha na Muusa Musogha, amwengeleshagha bubibu,nu kutenda : ¹⁰ Muntu wa kwengelela bango nu wa bwimbi,mwana wa Kahinga,mughini wa bya bulili,ntukashigha ku bighya nsila nsogha sa Mukota? ¹¹ Lelo lola,kuboko kwa Mukota kweli nowe,ukaba kyuku,nu ku bindi bilebe ntukalola ku musi. Agho bulimaswa nu kantolompishi byamwikilagha.Nu alondagha ,mu kukitakita, bantu ba kumulosha nsila. ¹² Agho ,mukulu kulola byatinga,akatishagha, mu kuba ashimitwa na megheshi ma Mukota. ¹³ Polo nu banabo ba lughendo,gha batukagha Pafo,bendagha ku Pelege sa Mpafilia.Yoani abashighagha,nu kukuluka ku Yelusalemu. ¹⁴ Kutuka Pelege bendagha,nu bikagha ku Antiokia sa Pisidia.Mu kwingila mu Sinakoki busi bwa sabato,bikalagha ghansi. ¹⁵ Mu kushila kusoma kitabo cha mulembe nu cha balenganya,bakulu ba Sinakoki babasingagha kutenda: Bisakwitu,ndi mwite kitondo cha kubula bantu,mukitende. ¹⁶ Polo imalukagha,nu mu kubakobya na kuboko,ing'atenda:Bantu ba Isilaeli,nu benywe bakukwa Ghongo boba mwongwilile! ¹⁷ Ghongo wa kilongo cha BaIsilaeli asombolagha batata.Akitagha abo bantu beeme ,bindi binsayi mu bikalagha mu Misili,nu abatuchagha mo na mughombo wa maghala. ¹⁸ Abeleshagha indya myaka anga makumi manayi mu kalula; ¹⁹ nu,mu kushila kushicha bilongo mutubakamo mu kisi cha Kanana,abeleshagha kisi kibe chabo. ²⁰ Kushila agho,mu myaka anga maghana manayi,abeleshagha Bashushi, kwikila mulenganya Samweli. ²¹ Agho bemagha babe na mwami.Nu Kalagha abeleshagha, mu myaka makumi manai,Saulo,musikila wa Kisi,wa mu kikanga cha Benyamina; ²² kushila kumunana,abimikilagha mwami Daudi,watenenekelagha:Namona Daudi,musikila wa Yese,muntu mu mumulenganya wani ,akakita iyakulo lyani. ²³ Mu kibuti cha Daudi kulembana n' indaghi lyaghe,u mwatukishe Ghongo,Monia ,u Yesu. ²⁴ Ghabagha ntika,Yoani asansagha lupatisho lwa kw'isungula mitima ku kilongo kinsayi cha Isilaeli. ²⁵ Nu ghabagha Yoani ashila lughendo lwaghe,atendagha: Nshili olya u mukulenganya ko;tondo lola,kumbusa kwani kukushwa olya u nshinakosha kusunula mishighi sa bilato byaghe. ²⁶ Bisakwitu,bana ba kilongo cha Bulaimu,nu benywe bekukwa Ghongo boba,ku benywe u kwasingwa icho kitondo cha lonio. ²⁷ Kubuno bantu ba Yelusalema nu bakungu babo ta bamanagha Yesu,nu,mu ku mwaghya , babelelelinde bitondo bya balenganya bikusomwagha busi bwa sabato. ²⁸ Anga bubo tabasangagha muwe kitondo kinamwicha ku lukwo,baseghagha Pilato amwitye. ²⁹ Nu mu kushila kubelelela binsayi byatilwagha kuwe,bamutuchagha ku musalaba nu kumukunda. ³⁰ Tondo,Ghongo amutuchagha ku bakuyi. ³¹ .Indoshagha bindi bingi ku babo bendagha nabo ku Galilaya kwika ku Yelusalema, nu beli lelo bateneneki baghe kuli bantu. ³² Nu,beshwe tukusansa musaghu musogha w'indaghi lyeleshibwagha ba tata, ³³ Ghongo abibelelela ku beshwe bana bitu,mu kutucha Yesu mu bakuyi,anga byatililwe mu Kitabo k'imbili cha nembo: Uli Mwana wani,nakubuta buno busi. ³⁴ Amutuchagha ku bakuyi, buno ntakakuluka lingo ko,ubwabulagha bantu bwasibwasi mu kutenda:Nkabelesha mpanga'inenesa sanana salaghwagha kuli Daudi. Eso mpanga'nene seli sa bulili. ³⁵ Uchasula atenda lingoghango :Ntukimila wasanana wobe abole. ³⁶ Tondo,Daudi ,mu bindi byaghe,ghashighagha kukita mulimo kulembana na mulenganya wa Ghongo,akwagha,asangagha bise,nu abolagha. ³⁷ Tondo ghoso watuchwagha ku bakuyi na Ghongo ,ntabolile. ³⁸ Bisakwitu ,mumane buno , kutingila we,ukuli bushighilishi bwa bwaghi bwabasambalilwa, ³⁹ Nu nawe wakatisha aghanswe ntiashilililwa ku binsayi bitana shilililshwa kutingila mulembe wa Musa. ⁴⁰ Ububo, mulole busogha binabikila bibyo byatendilwe na balenganya: ⁴¹ Mulole baghanshi, mughaneghane nu mushimile; kubuno mu bindi binu,nakole kitondo,kitondo tamukakikatisha ndi babula cho. ⁴² Gha bakukukagha,babemagha batende ibyo mu saboto sa kushwa; ⁴³ nu, kushila musanganano,Bayuda bengi nu ku bakatisha ba bilongo babo basanana bulili bayangagha Polo nu Balanaba,batendagha nabo,nu kubema bakokomeshe mu mpang'inene sa Ghongo. ⁴⁴ Mu sabato sashwagha, elyanga musumba unsai wakulumanagha buno bongwilile kitondo cha Ghongo. ⁴⁵ Mu kulola kwabo bantu bengi,Bayuda bayongwagha, bananagha bikutenda Polo,mu kumukongobanya nu kumutuka. ⁴⁶ Polo nu Balanaba ba babulagha na bulili bunsai:Benywe umunasambalindwe tanga kitondo cha Ghongo;tondo bumwakinana,nu mwindola benywe binene tamwatunganana kuba na kalamo ka milyalya,lola,twaghalukila bingo bilongo. ⁴⁷ Kubuno u butwakakishwagha na Mukota : Nakwimikagha buno ube chengeshi cha bilongo, weke lonio kwikila kushinda kisi. ⁴⁸ Mu kongwa kobo,bingo bilongo baboghaboghagha,baghanulagha kitondo cha Mukota,nu bansayi babikilwagha kalamo ka milyalya,bakatishagha. ⁴⁹ Kitondo cha Mukota cha sandabanagha mu kisi kinsayi. ⁵⁰ Tondo Bayuda bendagha lwango na bakashi beme nu bakulu ba musumba; balondagha kwita Polo nu Balanaba, nu babatibitagha mu kisi chabo. ⁵¹ Polo nu Balanaba babatitulilagha mukungu wa manshishi mabo , nu bendagha ku Ikona, ⁵² nu begheshibwa bo,ba boghaboghagha nu kwisalilana na Muusa Musogha.