¹ Ntusughile bubibu mukungu,tondo mwane anga so, ana basikila anga bisakwinu ; ² bakungu ba bakashi anga ba noko, babo beli baghunsa anga babitu bobe, mu kusanana. ³ Aansagha basumbakashi ba beli ba bulili . ⁴ Ndi musumbakashi ite bana ali bisukulu, babo,bayange nsila sa kusanana kweli bisakwabo,nu bakitile babuti babo kuyangana na bya bibegheshibwagha nabo; buno ubo bwaswaghila Ghongo. ⁵ Olya weli musumbakashi wa bulili,n'olya w'ikala mubo w'inene,akulelemila Ghongo nu akokomesha musi nu kindi mu kwema na lukakisho nu masegho. ⁶ Tondo olya weli mu nkasa sa bya kisi,nti mukuyi kilo anaba akutenja. ⁷ Tenda ibyo bitondo bwasibwasi ,buno banashwa kusughilwa. ⁸ Ndi muntu inda ku kunga byaghe busogha,nu tanga bibyo bya mubuto waghe,nti anana lukatisho, nu nti aba mubi kughimba utekatisha. ⁹ Nu musumbakashi buno aghanswe,ntabaghe na myaka kunsi kwa makumi mutuba, nu wasongwagha tughu na mulume umoi, ¹⁰ aghanulwa ku myanya nsogha ; wakushagha bana,wasekelagha bagheni,woghyagha basanana maghulu,akitilagha mponga betite kena,akitagha bisogha binsayi. ¹¹ Tondo nana basumbakashi baghunsa,kubuno nkasa sa mubili wabo sinabalekanucha na Kilishitu,nu nti bashima kusongwa, ¹² nu nti bighaya bo binene mu kushigha indaghi lyabo litangi. ¹³ Ghamoyi nobo,tabakukita mulimo lingo,ise batingitingi bemi,nu ta kwinda kukita nkashi umpanga,tondo bisa kughamba bango nu kutendatenda bitondo bitanatendwa. ¹⁴ Nkushima lino bakinga basongwe,babute bana,bimalile mashumba mabo, mughini anashwa ku benegha; ¹⁵ kubuno bamoyi kubo bashighile nsila sabo nu kuyanga Kahinga. ¹⁶ Ndi mukatisha wa mulume ali wamukashi ite basumbakashi,abakashe, Kubuno Kanisa kekaghe mushigho,inga kamana kukasha basumbakashi babo ba bulili. ¹⁷ Bakungu bakwimalila bango busogha,babe na lwanso ngendw'imbili,tanga babo bite mulimo wa kunsasa kitondo cha Ghongo nu kweghesha. ¹⁸ Kubuno kitondo cha Ghongo chatenda:"Ntu nanie mpunda kulya ku byakukitila mulimo.Nu muntu wa mulimo emana kweleshibwa indigho lyaghe. " ¹⁹ Wimilaghe kutalikilwa kwa mukungu ndi ta ku kanywa ka bantu babili ali ka basatu. ²⁰ Babo bakukita bwaghi, mubasughile mu miso ma bansayi kubuno babo nubo bakwe boba. ²¹ Na kubulilila mu miso ma Ghongo,mu miso ma Yesu Kilishitu, nu miso ma Baghenshi basombolwa,yangilila bino bitondo nu ta kwaghya muntu ,nu kita byo mu kuta kughalamila muntu. ²² Utibitilaghe kubikila muntu maboko,ntusangilaghe na muntu bwaghi bwaghe; u w'inene wiyengye mutima. ²³ Wikalaghe kunywa masi umpanga;tondo nywa maku makeke,kubushi bwa lusambo lw'ishitoma lyobe nwengo mbabasho sa mubili. ²⁴ Bwaghi bwa bantu bamoyi bukumoneka ko nu tabukughayibwa,bwa bango bukwindosha ku bindi bingi. ²⁵ Ubo nubo,mikolo nsogha sikwindosha,nu lya mabi sikwimbisa.