¹ Bakobe balole bakota babo anga bemanwa kutatwa,kubuno ishina lya Ghongo nu meghisha mitu manashwa kubengwa. ² Nu babo bite bakota bakatisha bababengaghe,mu kubakata buno beli banabo;Tondo babakitile busogha kubuno beli bakatisha nu nshimwa binkatisha ku busogha bwano mu kubakitila busogha .Eghesha ibyo bitondo nu bikatililwe. ³ Ndi umoyi eghesha meghesha mabi,nu ntikatilisha mu bitondo bisogha bya Mukota witu Yesu Kilishitu,nu meghesha mayangana na kw'isananya, whoso nti isalilana na butumbitumbi,ntakumana kena, nu ite lusambo lwa mbusha nu myango sa bitondo,u mukutuka kwitata,nsaki,kushingila bango bitondo,manungunungu mabi, ⁵ myango sa bantu batakwongwana ko,sitite bulili,nu mukumana buno busanana bweli nsila sa kughuma. ⁶ Bulili,kusanana ghamoyi na kuboghabogha seli nsila sa kughuma; ⁷ Kubuno tatwashwile na kena mu kisi n'ububo tatu kaluka na kena; ⁸ nu ndi twite india nu nshulu bingi kwitu ibyo. ⁹ Tondo babo bakulonda kughuma,bingila munsila sa kughelekwa,bakatwa mu kategho,nu mulenganya,mu nkasa sa bughasanga,sikwicha bantu mu minubo nu kushimila. ¹⁰ Kubuno kushima bikulo u mashina ma mabi mansayi;nu bamoyi kuba nabyo,bendile kulayi na lukatisho ,nu bindekinde bo binene mu kaya. ¹¹ Kobe,muntu wa Ghongo, tina ibyo nu londa bulili,busanana,lukatisho,lutundo,kulindila bwingi,kubota. ¹² Lwana bita bisogha bya lukatisho, katilila kalamo ka milyalya,kawamanilwe ko ,nu kuko witendinde busogha munkatighi na bantu bengi. ¹³ Nakukakisha, ku miso ma Ghongo olya ukwelesha binsayi kalamo,nu mu miso ma Yesu Kilishitu olya witendelagha busogha mu miso ma Pontio Pilato,bika busogha nkakisho mu mutima wobe, ¹⁴ ikala nu ubaghe na kamanililo kabi,ubaghe na mutima wina, utasungulwa kwikila gha kamoneka ko Mukota witu Yesu Kilishitu. ¹⁵ ukindosha w'inene mu kindi chaghe Wakasanilwa,we u nene binsayi Mwami wa Bami,nu Mukota wa Bakota. ¹⁶ W'inene ntakakwa,wikala mu chengeshi kitanashighelelwa ko,utalolilwe ko na muntu nu ntanakoshwa kumoneka ko,kwaghe kube lukumbu nu bwangato bwa milyalya.Amina! ¹⁷ Kakisha batumba ba bino bindi,babaghe batumbitumbi nu babikaghe malemalilo mabo mu butumba bwa kutinga , tondo babike mo mu Ghango,ukutwelesha binsayi bingi buno tubogheboghe nabyo. ¹⁸ Bakakishe buno bakite bisogha,nu babe batumba mu myanya nsogha ,babeghanye na bango butumba bwabo,nu bakomye na bango, ¹⁹ nu bakunsumanye mu bindi bikashwa,butumba butakashila,buno beleshibwe kalamo ka bulili. ²⁰ Timote,langa butumba bweli mu mutima wobe,shigha matenda mengi ma bulyabulya ma takatisha Ghongo, ²¹ nu nsaki sikukita bamoyi babo bashighile lukatisho.Mpang'inene sa Ghongo sibe ghamoyi nowe!