¹ Agho lino, Kilishitu mu kunuba mu mubili,nu benywe mube n'oso mulenganya umoyi.Kubuno ghoso wanubagha mu mubili ashilile binsayi bya bwaghi, ² buno abe gho ta kuyangana na nkasa sa bantu,tondo na bwa bwashima Ghongo,mu bindi byashighala echeli mu mubili. ³ Bulili, bwingi ubo,byakitwagha mu bindi byatingagha byabashima batakatisha,mukukita bitaswagha, nkasa sa mubili,bulefi,mu kulya nu kunywa bingi,nu kwela basumbu. ⁴ Nubo mwalolwa buno mweli bango bantu,buno tamukuyangana nabo mu malimbya,nu babashingila bitondo. ⁵ Bakasambala binsayi kweli ghoso ukughaya beli gho nu bakwile. ⁶ Kubuno musaghu musogha wasanswagha ku bakwile,kubuno mukushila kwaghibwa anga bantu bite mubili,beli gho mu Muusa kuyangana na Ghongo. ⁷ Kushilha kwa binsayi kweli bwighibwighi.Mube kashi bengegha nu betite butughu ,mwikale mu masegho. ⁸ Kubusho kwa binsayi,mushimane bubibu, kubuno,lutundo lukubukila bwaghi bwingi. ⁹ Musekelane ta ghamoyi na manungunungu. ¹⁰ Anga bantu bakubeghanya mpanga'inene sa Ghongo,omoyi moyi ku benywe akitile bango kuyangana na lukaso lweleshibwe na Ghongo. ¹¹ Ndi umoyi a kutenda,atende anga wite misaghu watuka kweli Ghongo; ndi muntu akita mulimo wa Ghongo,akite gho kuyangana na maghala ma mwelesha Ghongo,buno mu binsayi Ghongo atatwe,kutingila Yesu-Kilishitu,we uwite lukumbu,nu bwangato,mu nkiko nu nkiko.Amina! ¹² Nshimwa sani,mubaghe anga kitondo kimutekumana u chabikila,mutulha wa kaya weli munkatighi na benywe buno ubalingike. ¹³ Mubogheleboghele kibhu kimwite mu minubo sa Kilishitu,buno mube na mboghimboghi nu kyelele lukumbu lwaghe gha lukamoneka ko. ¹⁴ Ndi mwatukwa kubushi bwishina lya Kilishitu,mwakasanilwa,kubuno Muusa wa lukumbu,Muusa wa Ghongo weli kwinu. ¹⁵ Bulili,takube umoyi ku benywe ukunuba anga mwiti,ali mwimbi,ali mukiti wa mabi,ali ukwimbikagha mu bitondo bya bango . ¹⁶ Tondo ndi umoyi anuba anga eli Mukilishitu,akwaghe nsoni,tondo aghanule Ghongo kubushi bw'ishina lyaghe. ¹⁷ Kubuno bindi bya kwaghibwa bi kulingila mu numba sa Ghongo.Nu ndi byalingila kwitu,buni bukaba bindi bishinda kweli babo batekwongwa musaghu musogha wa Ghongo? ¹⁸ Nu ndi wa bulili ionia mu kunuba,buni bukaba mubi nu mwisa bwaghi? ¹⁹ Ubo,babo bakunuba kuyangana na bwashima Ghongo babika mitima sabo mu ghoso wabumbile bantu weli wa bulili,mu kukita byeli bisogha.