¹ Lola mano makwana babo bakungu beli ku mweli,ine mukungu anga bo, muteneneki wa minubo sa Kilishitu,nu ukusangila lukumbu lukamoneka ko. ² Mulange ighimba lya Ghongo limweleshibwe,ta mu kukakishwa tondo mu busogha bwa mitima sinu,anga bwashima Ghongo ;ta indigho libi,tondo ghamoi na kukatilila busogha mulimo; ³ ta anga kw'ikalila bamweleshibwe,tondo kuba nsila nsogha kwely'ighimba. ⁴ Nu ghakika Mungele mukulu,mukeleshibwa nkumbu sa lukumbu lutakashila. ⁵ Ububo,benywe mucheli basikila,mwongwilile bakungu.Nu benywe bansai mu binsai bimukukita,mwimbotye; kubuno Ghongo ntakushima batumbitumbi,tondo akwelesha bimbotya mpanga'inene. ⁶ Mwimbotye mu maboko ma naka ma Ghongo,buno abimaluche mu bindi byatunganana; ⁷ nu mu mwikishe nkasa sinu insai,buno w'inene u kubakunga. ⁸ Mube benge,muyamaghe.Mughini winu Kahinga,akutotela anga mbunga si kwama,sikulonda olya walye. ⁹ Mulwane nawe ghamoi na lukatisho lunene,mu kumana buno eso minubo u sikutinga mo bisakwinu mu kisi. ¹⁰ Ghongo wa mpanga'inene,olya wabamanagha mu Yesu-Kilishitu ku lukumbu lwaghe lwa milyalya,mu kushila kunuba bindi bikeke,w'inene akabakita bashililila,akabimika busogha,akabelesha maghala, nu tamukayungwayungwa lingo. ¹¹ Kweli kubhe bwangato nkiko nu nkiko!Amina! ¹² Nti kutingila Silive,u nalola ko mwisakwitu wa bulili,ubuna batilila bino bitondo bikeke,buno nibane nu kubalosha busogha buno mpanga'nene sa Ghongo si mwinkatisha mo u sa bulili. ¹³ Kanisa ka basombolwa keli kuko ku Babiloni kabakasha samba, Maliko nuwe musikila wani. ¹⁴ Mukashane samba kutingila beshi sa lutundo. Nu boolo bube ghamoi na benywe bansai beli mu Kilishitu.