¹ Bakashi mwimbotye kweli banakinu ,kubuno ndi bamoyi tabongwilila kitondo,bakatishe ta bitondo tondo kutingila myanya sa baghole babo, ² mu kulola bweli myendeshi sinu nsogha , sa tunganana. ³ Tamubaghe na bu mbangilwa bwa kumbugha,bwa kushukwa nshuli,bwa kwitonda na nolo,ali kushwala nshulu sa kulhuta, ⁴ tondo bu mbangilwa bwinu bwa munda nu bwabiswa mu mutima,u mutima wa bulili nu wa boolo,u mutima wa boghyaboghya Ghongo. ⁵ Ubo u bwitondagha kalayi bakashi basanana ,babo balelamilagha mu Ghongo,bimbotyagha ku banachabo, ⁶ anga Sala,wongwililagha Bulaimu nu amumanagha mukota waghe.Muwe u mumwaghalukile bakinga,mu kukita cha cheli kisogha,ta mu kwishighilila mu boba. ⁷ Balume,ku mweli,muloshe bwenge kweli baghole binu,anga kweli basoshu;Mubaanse,anga mwasanginde nabo mwandu wa mpanga'inene sa kalamo .Bube ubo kubuno masegho minu maninda kwongwililwa . ⁸ Agho,mube benywe bansayi na milenganya emoyi,nu kughanilila bimoyi ,kuba na lutundo lwa mubuto,nu chombo,nu kwimbotya. ⁹ Mukuluchaghe bubi ku bungo ,ali kilingo ku kingo;tondo mukasanile ,kubushi ku bo u kumwamanindwe , inga mwaba na mwandu wa lukasanilo. ¹⁰ Bulili,ndi umoyi akulonda kushima kalamo ,nu kwikila bindi bisogha,atendaghe bubi,nu ntengelelaghe, ¹¹ Imb'embuche na bubi nu akite kisogha,alonde boolo nu abuyangilile; ¹² Kubuno miso ma Mukota meli ku babo ba bulili.Nu matuyi maghe makwongwilila masegho mabo.Tondo ntakushima babo bakukita mabi. ¹³ Nu nayi ukabanubya, ndi mwasaghalukila byeli bisogha? ¹⁴ Gha mukanuba ku bya bulili,munakasanindwe. Mubakwaghe boba ,nu muyungwayungwaghe; ¹⁵ Tondo,musananie Kilishitu Mukota mu mitima sinu,mu kuba bindi binsayi kwitendela ,ghamoyi na kwimbotya nu kwongwilila busogha, mu miso ma ghoso ukubabusha ku malelamilo ma mwite, ¹⁶ nu mu kuba na mulenganya musogha, kubuno ghalya gha babatulanya anga munabinde bakiti ba mabi,babo bakwenegha myanya sinu nsogha mu Kilishitu bakwe nsoni. ¹⁷ Kubuno,bweli busogha kunuba,ndi u bwashima Ghongo, mu kukita bisogha nu ta mu kukita bibi. ¹⁸ Kilishitu nuwe anubagha limoyi ku bwaghi,we wabulili ku beteli ba bulili,buno atwiche kweli Ghongo,we wakwagha mu mubili,abinde gho mu Muusa, ¹⁹ mwa mu Muusa endile kusansila kitondo cha Ghongo kweli mitima sakandwa , ²⁰ so sabagha kalayi tasakatisha, ghabagha kulindila kwa Ghongo kwindisha,mu bindi bya Noa,mu kubasa bwato,munda nabo mwinginde bantu bakeke,ukutenda buno munani ,bonagha mu masi. ²¹ Amo masi mabagha anga lupatisho,matakutucha nkuna sa mubili,tondo kwikatilisha busogha mu Ghongo,nu lelo u bwa t'onia,nu benywe,kutingila Yesu kutuka kwaghe ku bakuyi , ²² weli kw'indume lya Ghongo,kwikila ghendinde kw'ighulu,nu baghenshi , bakulu nu bansayi bite maghala mw'ighulu,eleshibwe bo.