¹ Nshimwa,tamukatishe muusa unsai,tondo mulingike myusa buno mumane ndi satuka kwa Ghongo,kubuno balenganya bengi ba bwisa bikile mu kisi. ² Muusa wa Ghongo ukumanililwa bubuno,Muusa unsayi wimila buno Yesu Kilishitu abutilwe mu mubili,weli wa Ghongo; ³ Nu Muusa utimila Yesu , ta weli wa Ghongo ,nu ghoso wa mughini wa Kilishitu ,umwongwagha ko buno ukashwa,nu lelo weli mu kisi. ⁴ Benywe ,bana bato,mweli ba Ghongo,nu mwakindile ,kubuno olya uli mwa munda na benywe aghimba weli mu kisi. ⁵ Bo ,beli ba kisi; uchasula bakutenda kuyangana na bya kisi;nu kisi ki kubongwilila. ⁶ Beshwe, tweli ba Ghongo,olya ukumana Ghongo akutwongwilila;nu olya utakumana Ghongo ntakutongwilila; nw'agho u ghatukumana Muusa wa bulili nu muusa wa bwisa. ⁷ Nshimwa,tushimana ghatusambana; kubuno lutundo lweli lwa Ghongo,nu olya washima abutilwe na Ghongo nu akumumana Ghongo. ⁸ Olya utashima, ntamanile Ghongo,kubuno Ghongo u lutundo. ⁹ Lutundo lwa Ghongo lwamonekile ko ku tweli kuobuno Ghongo asingagha mwana waghe wa ngomo mu kisi,buno tube na kalamo kutingila we. ¹⁰ Nu lulo lutundo lweli,ta buno beshwe u bashimagha Ghongo,tondo we u watushagha,nu asingagha Mwana waghe abe kinsasa cha kutucha bwaghi bwitu. ¹¹ Nshimwa ,ndi Ghongo atushimagha ubo,nu beshwe twemana kushimana gha tusambana . ¹² Takweli muntu walolile ku Ghongo;ndi twashimana gha tusambana,Ghongo eli munda na beshwe u,nu lutundo lwaghe lweli lwa bulili mu beshwe . ¹³ Tukumana buno tweli munda nawe,nu we eli munda na beshwe,kubuno atweleshishe Muusa waghe. ¹⁴ Nu beshwe twalolile nu tukutenda bwasi bwasi buno Tata asingile Mwana abe Monia wa kisi. ¹⁵ Olya ukimila Yesu buno eli Mwana wa Ghongo,Ghongo eli muwe, nu we eli mu Ghongo. ¹⁶ Nu beshwe ,tukumana lutundo lwa Ghongo lwite ku bershwe,nu twalukatishishe.Ghongo eli lutundo;nu olya weli mu lutundo ikala mu Ghongo,nu Ghongo itkala mu we. ¹⁷ Bubo bweli,u butweli nu beshwe mu kino kisi;agho lutundo lweli lwa bulili mu beshwe,kubuno tube na ndemalilo nsogha busi bwa kwaghibwa. ¹⁸ Boba tabweli munda na lutundo,tondo lutundo lwabulili lwatucha boba.Kubuno gheli boba nti gheli kwaghibwa,nu olya wakwa boba,nteli wa bulili mu lutundo. ¹⁹ Ku beshswe twamushima, kubuno u walingagha kutushima. ²⁰ Ndi muntu atenda:Nashima Ghongo, nu asomba mwisakwabo,eli mweki wa bwisa;kubuno olya utashima mwisakwabo wakumona ko,buni bwanakosha kushima Ghongo wata kumona ko? ²¹ Kweli twite luno lukakisho; Olya u kushima Ghongo akushima nu mwisakwabo.