¹ Mulole lutundo ki lwatuloshishe Tata,buno tumanwe bana ba Ghongo!Nu tweli bo.Ndi kisi takikutumana,ta chamumanilinde . ² Nshimwa ,tweli lelo bana ba Ghongo,nu butukaba lingo ta bumanililwa nenshi;tondo tukumana buno gha bukamanililwa,tukamususa,kubuno tukamulola ko bwa bweli. ³ Olya wa mulemalila iyenje,anga w'inene bweli wa sanana. ⁴ Olya wakita bwaghi nti abunsa mulembe.Nu bwaghi u kubunsa mulembe. ⁵ Nu,mukumana ,Yesu ikile buno atuche bwaghi,nu bwaghi tabweli munda nawe . ⁶ Olya wikatilisha muwe ntakukita bwaghi;nu olya wakita bwaghi ntamulolile ko,nu ntamumanilinde. ⁷ Bana bato,muntu ntabengelele.Olya wakita bya bulili u wasanana,anga w'inene eli wa sanana. ⁸ Olya wakita bwaghi eli muntu wa musumbu,kubuno musumbu akukita bwaghi kulingila ndingililo.Mwana wa Ghongo ikile buno ashililishe mikolo sa musumbu. ⁹ Olya wabutilwe na Ghongo,ntakukita bwaghi,kubuno mbuto sa Ghongo seli munda nawe,nu ntanakosha kukita bwaghi, kubuno abutwile na Ghongo. ¹⁰ Nu agho u gha kumanililwa bana ba Ghongo nu bana ba musumbu.Olya wakita bite bya bulili nteli wa Ghongo,nu eli anga utashima mwisakwabo. ¹¹ Kubuno bimwabulwagha,nu bimwongwagha ko kulingila ndingililo,u buno twemana kushimana gha tusambana , ¹² nu ta kususana Kaini wabagha wa musumbu ,nu itagha mwisakgwabo.Ki chasulagha amwita? kubuno mikolo saghe sabagha mbi,nu sa munabo sabagha nsogha. ¹³ Mughanaghnaghe bisakwitu,ndi kisi cha basomba. ¹⁴ Tukumana buno twatukile mu lukwo nu kwingila mu kalamo,kubuno twashima bisakwitu.Olya utashima eli mu lukwo. ¹⁵ Olya wasomba mwisakabo nti eli mwiti, mukumana buno mwiti unsayi nte na kalamo ka milyalya. ¹⁶ Twamanile lutundo,kubuno esanile kalamo kaghe kubushi bwitu;nu beshwe twemana kwesana kalamo kitu kubushi bwa bishakwitu. ¹⁷ Ndi umoyi ite bisogha bya kisi nu alola mwisakwabo ite nkasa,nu anana ku mwelesha,buni bunaba lutundo lwa Ghongo mu we? ¹⁸ Bana bato,tushimaghe na kanywa ,tondo na mikolo ghamoi na bulili. ¹⁹ Agho tukamana buno tuli ba bulili, nu tukabobelesha mitima situ kweli. ²⁰ Buno ndi mutima witu watughaya ,Ghongo aghimba mutima witu,nu akumana bitondo binsayi. ²¹ Nshimwa ,ndi mutima witu tawatughaya ,twalelamile bubibu kweli Ghongo. ²² Binaba bitunasegha,tukweleshibwa byo nawe,kubuno twikatilisha mu nkakisho saghe nu tukukita bya boghelaboghela. ²³ Nu lunu u lukakisho lwaghe; buno tukatishe ishina lya Mwana waghe Yesu Kilishitu,nu tushimane gha twasambana,kuyangana na lukakisho lwatweleshagha . ²⁴ Olya wakatilila lukakisho lwaghe,eli mu Ghongo,nu Ghongo muwe;nu tukumana buno eli munda na beshwe,kutingila Muusa watweleshishe.