¹ Yumvagi eyindi myanzi ndesire; omwana wayambala akashambala k'ishe, erhi kw'ali nka muja amango aciri murho, ciru aka ba mpu ye wayima muli byoshi. ² Amango aciri murho, erhi anaciri idako ly'obuhashe bw'obantu bamulera n'ababakolera kuhika omu kasanzi ishe atwire. ³ Nirhu kwo rhwali ntyo amango rhwaciri nka bana, rhwali baja b'obuhashe bw'abazimu b'en'igulu. ⁴ Ci erhi amango gâli matwe gahike, Nnâmahanga arhuma Omugala; aburhwa n'omukazi analerwa idako ly'amarheko* g'Abayahudi, ⁵ mpu lyo akûza balya bâli idako ly'amarhegeko mpu lyo rhuba bana ba Nnâmahanga nirhu. ⁶ Okumanya okw'okunali munali bana bage , Nnâmahanga ahebire Mûka w'Omugala omu mirhima yirhu; oyo Mûka anakâyakuza mpu"Larha!" ⁷ Na ntyo orhaciri aba muja, cikwone mwana; n'okuba oli mugala, Nnâmahanga akuha oku minja aba abîkire abana bage. ⁸ Mira, murhâyishigi Nnâmahanga, mwanali baja ba bîremwa birhali bannâmahanga ⁹ Cikwone buno mukola muyishi Nnâmahanga naye Nnâmahanga akola amuyishi, kurhigi kacishubira mwo birya bintunyanzi by'okulibuza na bulya buhashe bw'abazimu b'en'igulu? Kurhi mwakacilonza mpu mushub'iba baja? ¹⁰ Okwo mukushwekire kuli nsiku nguma nguma , na myezi miguma miguma, na mango maguma maguma, na myaka miguma miguma! ¹¹ Mmuyobohîre: ka ngasi mukolo namujirire gukolaga gwaba gwa busha? ¹² Bene wirhu mâshi, munshushe mwe mukasinga, nk'oku nani nanamushushaga. Nta kubi ciru n'okuguma mwanjijire. ¹³ Mukengire ecarhumaga namubwira Emyanzi y'Akalembe burhanzi. nali mulwala co carhumire. ¹⁴ Endwala yani yali ya muyereka okunali, na ciru akaba ntyo murhânganyaguzagya nisi erhi kundahira. Ci oku byabîre, mwanyakira nka malahika* wa Nnâmahanga, ciru nkaba Yezu kristu. ¹⁵ Mwashagaluka bwenene! Kurhi mwabîrage? Okuli nana muderhera kwo okw'acibaga byankahashikine, mwali mwacîrhomola amasu, mugampe! ¹⁶ Ewe; ka kushomba mmushombirage obwo okwenge namubwira eby'okuli? ¹⁷ Abo bantu bali bayorha nka bamusî,ire bwenene, cikwone arhali minja bamulongeza. Ebi balonza, kuli kumukûla kuli nie mpu mubayungule obunguke bwinyu boshi. ¹⁸ Okunali, omuntu okusîmwa kurhali kubi, cikwone oku binja , n'okwo kukâba ngasi mango, arhali amango ndi muli mwengone ¹⁹ Yaga bana bani, nshubir'yumva, ago malumwa kwo ganayosire kula ag'omukazi waburha ganayorha,kuhika hano kristu alemwa muli mwe ²⁰ Kanga nankalonzize mbone ndi hali mwe wani muli kano kasanzi, lyo mpasha okumubwira kundi kundi. Nyumvîrhe mpahîrhe bwenene erhi mwe murhuma! ²¹ Gwarhi, mwe mulonzize okurhegekwa n'amarhegeko*, mbwiragi nani, ka murhayumva okw'amarhegeko gadesire? ²² Gadesire oku Abrahamu âli agwerhe bagala babiri, muguma umuburha oku mujanyere; n'owundi amuburha kuli nnabana wage. ²³ Oyo mugala aburhaga oku mujanyere,abusirwe buzira ciragane*, cikwone omugala aburhaga kuli nnabana, abusirwe omu ciragane ca Nnâmahanga. ²⁴ Okwo kwanarhôlwa nka lwiganyo: abo bakazi bombi bayerekine biragane bibiri Ciragane ciguma (ciyerekinwe na Hagari), kwo oku Ntondo y'e sinayi, yo eburha abaja. ²⁵ Hagari ye ntondo y'e sinayi omu Buharabu. ashushine n'ecishagala c'e Yerusalami w'ene, yeri muja hage n'abantu boshi. ²⁶ Cikwone Yerusalami w'emalunga yehe arhali muja, yenali nyâma wirhu. ²⁷ Bulya Amandiko gadesire mpu: "Oshaguluke we ngumba! ohebe akabûli we orhasag'ifumba! Bulya omukazi walesirwe ye waba n'abana kulusha ojira omulume." ²⁸ Bene wirhu, muli bana babusirwe omu kushimbulira eciragane ca Nnâmahanga, aka isaka. ²⁹ Mira, omwana waburhagwa omu kukulikira ebyalemirwe ashimbululaga nnakuburhwa oku biyekire Mûka Mwimana, na buno ntyo kwo biri. ³⁰ Cikwone kurhi Amandiko gadesire obwo? Gadesire mpu:" Lîki omujanyere bo n'omugala, bulya omwana w'omujenyere arhagwasirwi ayime eb'îshe bo na mwene nnabana." ³¹ bene wirhu bakristu, ntyo kwo rhurhaligi mwo bana ba mujanyere, ci rhuli bana ba nnabana.