¹ Mwe Bagalatiya, ebi binganyi! Nndi wamugeresire mweki? N'obwo ciru mweki mwabune n' obwalagale olufu lwa Yezu Kristu oku musalaba. ² Nnonzize muxhuze eri xoxo liguma: kamwayankirire omukana gwa Nnâmahnga kwenge muba mukenzire amarhegeko, nisi erhi kwenge mwayunvire mwanayemera emyanzi y'Akalembe? ³ Co cirhumirage mwaba binganyi ntyo? Mwrhondire muli Muka gwa Nnamahanga, ka mulonzizagye muyuse bunya mubiri mwene? ⁴ K'ebyo byoshi mwjiraga bife busha? kirhânkahashikana mpu bife busha. ⁵ Amango Nnâmahanga amushoboza Muka gwage na gala mango ajira evisomerine muli mwe, ka kulya kuba muba mukenzire amarhegeko ko kurhuma, nisi erhi kuyunva n'okuyemera emyanzi y'Akalembe? ⁶ Yunvi oku amandiko gadesire kuli Abrahamu: "Acikubagira Nnâmahanga, naye Nnâmahanga amubona mushinganyanya erhi bwemere bwage burhuma," ⁷ Ho mwakashenga aho okw'abalama omu bwemere baba bana ba Abrahamu. ⁸ Amandiko gadesire oku Nnâmahanga ahindwire abarhali Bayaudi mpu babe bashinganyanya erhi bwemere burhumire. Co carhumire amanyisa Abrahamu eyi myanzi minja: "Nnâmahanga agisha amashanja goshi g'en'enigulu erhi we orhuma. ⁹ Abrahamu ayemera lero agishwa; make n'okwo,abayemire boshi bagishirwe nk'oku naye yene âli agishirwe ¹⁰ Cikwone abacîkubagira akukenga amarhegeko*, bahehêrirwe. Kandi amandiko gadesire mpu: "Mashi akahera omuntu orhakenga ebiyandisirwe omu citabu c'amarhegeko." ¹¹ Bibonekinage bwinja oku ntaye wakaba mushinganyanya emalanga ga Nnâmahanga mpu kwenge akenzire amarhegeko, bulya Amandiko gadesire mpu: "Oli mushinganyanya emalanga ga Nnâmahanga, alama oku bwemere." ¹² Cikwone obwemere burhayimangira oku marhegeko. Cikwone, nk'oku Amandiko gadesire mpu: "Okenga amahano g'amarhegeko go alama ko." ¹³ Kristu ahehêrirwe ahâli hirhu na ntyo arhukûla kw'obuhehêrere bw'amaregeko*. Amandiko gadesire mpu: "Ahehêrirwe ohh bamanika oku murhi." ¹⁴ Byabîre ntyo mpu lyo gulya mugisho Abrahamu alaganyibagwa guhâbwa abarhali Bayahudi erhi Yezu Kristu orhuma,lyo rhuyankirira obwemere bwa Mûka Nnâmahanga alaganyagya ¹⁵ Bene wirhu, narhôlaga olwiganyo muli kano kalamo ka buno: erhi ankaba omuntu ahânyire eciragane* c'okunali, ntaye wakavuna eco ciragane nisi erhi aciyushûle kwo akandi kantu. ¹⁶ Nnâmahanga ahire Abrahamu n'ibura lyage eciragane. Amandiko garhadesiri mpu: "N'ibura lyage," nk'oku byakabire kuli bantu boshi. Cikwone gaderha mpu: "N'ow'okw'iburha lyawe," gayerekana muntu miguma aho, ye Kristu. ¹⁷ Yunvagi ebi nalonza okuderha; Nnâmahanga ajira eciragane, arhanacivunaga. Amarhegeko gayishaga myaka maganani makumi asharhu enyuma, arhali go gakagicivuna eco ciragane nisi erhi gakula endagano ya Nnâmahanga. ¹⁸ Cikone, erhi ankaba enshokano y'omwimo Nnâmahanga ashobozagya kone eyimangira oku mahegeko erhi eyo nshokano erhayimangiri okuciragane. Bulya ciragane Nnâmhanga ayerekanaga mwo okw' arhonya Abrahamu. ¹⁹ Carhumaga amarhegeko nago gahaba? Gayushûlagwa mpu gakahânza gansi bijiro birhalinganini n'obulonza bwa Nnâmahanga: gâli gakwanine gabêre ho kuhika ow'okw'iburha lya Abrahamu ayishe, Olya wa murhumaga eciragane cahânwa. Ago maregeko gâdwirhwe na bamalahika*, gagerera omu koboko okw'omuntu ²⁰ Cikwone omulagizi Ali wa busha nka nna akanwa yene ho ali, na nna akanwa aligi Nnâmahanga yene ²¹ K'okwo kuligi kudera ok'amarhegeko arhali go maguma n'eciragane ca Nnâmahanga? Nanga la! Acibâge amarhegeko gakaha abantu obuzine.singa n'abantu bakabire bashinganyanya emalanga ga Nnâmahanga erhi ago maregeko go garhuma. ²² Cikwone Amandiko gâdesire okw'abantu boshi bahebirwe idako ly'obuhashe bw'ebyaha. mpu lyo enshokano Nnâmahanga alaganyagya ehâbwa balya bayemire. erhi bulya bwemere bagwerhe muli Yezu kristu burhuma. ²³ Amango akasanzi kw'obwemere karhâli kacihaba, amaregeko gâli garhushwesire, kuhika obwo bwemere bwalinda bufulwa. ²⁴ Amaregeko go gâli garhulanzire kuhika Kristu alinda ayisha. mpu lyo rhuba bashinganyanya embere za Nnâmahanga omu bwemere. ²⁵ Buno gakala mango ga bwemere, rhurhacilanzirwi n'ago marhegeko. ²⁶ Bulya bwemere burhumire muli bana Nnâmahanga omu bulungane haguma na Yezu Kristu. ²⁷ Mwezi mwabatizibibwe mpu lyo mulongana na Kristu. mwanaja omu borhere buhyahya buba muli kristu. ²⁸ Nta lubero lucihali, omu bayahudi n'omu barhali Bayahudi, omu baja na muli bantagengwa, omu balume n'omu bakazi; mukola muntu muguma yene omu bulungane haguma na Yezu Kristu. ²⁹ Akaba muli bantu ba Kristu, erhi muli iburha lya Abrahamu, mwayankirira na galya minja Nnâmahanga alaganyagya.