¹ Sauli yehe aciromwo ecoba c'okushurhwa n'okunigwa kw'entumwa za Nyakasane, aja emw'dmudahwa mukulu, ² amuhuna amaruba g'okuja omu ekleziya z'e Damasi lya akarhimana abali mw'eyo njira aka balume erhi bakazi abalerhe bashwekerwe e Yeruzalemi. ³ Erhi aba akola ali omu njira ayegerire e Damaski, honaho obulangashane bwarhenga empingu; ⁴ bwa mufunika ahirima bubi okw'idaho anayunva izu lyamubwira, erhi: "Sauli Sauli gurhi oli wandibuza?" ⁵ Sauli ashuza, erhi: "Wendi Nyakasane?" Nyakasane amushuza, erhi: "Nie Yezu oli walibuza; ⁶ ci oyimangage ogende omu cishagala bakubwira oku wajira." ⁷ Abantu balimulusize basomerwa bwenene, bakayunva izu cikone barhabonaga ndi. ⁸ Sauli azuka okw'idaho, ciru akaba amasu gage gali yigusire arhakagi bona cici, bamugwarhira oku kuboko bamuheka e Damaski. ⁹ Abera yo nsiku zisharhu arhabona, arhalya arhananywa. ¹⁰ Eyo munda e Damaski yali entumwa yahamagalagwa Ananiya. Nyakasane amubonekera amubwira, erhi: "Ananiya" Ashuza, erhi: "lola ndi hano Nyakasane." ¹¹ Nyakasane ashubiza, erhi: :Yimuka ogende omu njira ederhwa 'nshinganine, olongeze omu nyumpa y'omuntu oderhwa Yuda, Sauli w'e Tarso. ¹² Bulya ali ashenga, ananabwine omu bilorho omuntu oderhwa Ananiya wadahaga anamulambulirakwo amaboko lyo acubi bona kandi." ¹³ Cione Ananiya ashuza, erhi: "NyKsane, Nayunvirhe binji enyanya ly'oyu muntu, amabigwoshi ajiriraga abashinganya bawe e yeruzalemi. ¹⁴ Alihabirwe obuhashe n'abakulu b'Abajinji mpu bashweke ngasi wankaderha izino lyawe." ¹⁵ Cikone Nyakasane amubwira erhi genda bulya oyo ciri combo cani nacagwire okuyalagaza Izino lyani omu mashanja, emberely'abami n'abana b'e Izraheli; ¹⁶ na nayishi muyereka amalibuko goshi ageramwo enyanya l'izino lyani." ¹⁷ Ananiya ahuluka agenda, aja omu nyumpa. Alambulirako Sauli amaboko, amubwira erhi Sauli mwene wirhu, olya Nawirhu Yezu Kristu wakubonekeraga omu njira, entumire emunda oli mpu lyo ocubi bona, oyunjuzwe na Muka Mutagatifu." ¹⁸ Honaho ebiri nka magamba byarhogera omu masu ga Sauli arhondera okubona, ayimuka agendi batizibwa; ¹⁹ erhi aba amalya emisi yagaluka.Sauli abera e Damasi haguma n'entumwa zayiri. ²⁰ Honaho arhondera okuyalagaza omu ngasi lurhamba oku Yezu ali mugala wa Nnamaanga. ²¹ Ngasi boshi bakagi muyunva bakasomerwa bwenene, banakaderha mpu: "K'arhali olya wakagi libuza abakagi derha er'izino omu Yeruzalemi, karhanakagi yisha abashwesire n'oku bahekera abakulu b'abajinji. ²² Cikone Saulo akayunjula misi ngasi mango, akahagalika aba Yahudi bali omu Damasi abayereka oku Yezu ye Kristu. ²³ Enyuma lya nsiku nsyungunu, Abayahuydi baja irhigi mpu bamunige. ²⁴ Lero Sauli amanya ihwe lyabo. Bakalanga enyunvi budufu na mushi mpu lyo bamumalira kalamo. ²⁵ Cikone budufu buguma entumwa za muheba omu lurhanda zamuyandagaza okucibambazi. ²⁶ Erhi aja e Yeruzalemi, Sauli ajira obulyo mpu arhimane e ntumwa, cikone boshi bakamuyoboha, barhayemeraga oku eri ntumwa. ²⁷ Baranaba amurhola amuhekera entumwa anazishambalira oku Sauli arhimana ga Nyakasane omu njira, amushambaza na gurhi ayigirizagya bwinja bwinja omw'izino lya Yezu e Damasi. ²⁸ Akagennda anagaluka nabo e Yeruzalemi, bakaderha buzira boba omw'izino lya yakasane Yezu, ²⁹ ashambala na balya Bayahudi cikone bohe bakalonza obulyo bankamunigamwo. ³⁰ Bene wabo erhi babona ntyo bamugerana e Kaizari acijira e Tarso. ³¹ Olurhamba lwaba n'ourhula omu Yudeya mwoshi omu Galilaya n'omu Samariya, lwazibuha haguma n'okuyoboha Nyakasane, lwakakula n'okulongozibwa na Muka Mutagatifu, omubale gwaluga omu lurhamba. ³² Petro akagi rhangula abatagatifu omu bworhere bwage, ayandagalira n'e Lidiya arhangula abayiri. ³³ Arhimana eyo muntu muguma wahamgalagwa Aeneya erhi aba oku nshingo myaka munani bulya alihozire ebirumbu. ³⁴ Petro amubwira, erhi: "Yezu Kristu akufumye, yimuka orhole enshingo yawe honaho ayimanga. ³⁵ Abantu bwoshi b'e Ludiya n'e Saro bayisha, bayemera Nyakasane. ³⁶ Hali mukazi muguma omu kagarhi k'entumwa wahamagalagwa Tabita kokuderha Dorika; akagi jirira abakenyi bijiro binji binja haguma n'okuhana entulo. ³⁷ Lero mw'ezo nsiku agwarhwa n'endwala anafa, erhi bamala bashuka omubiri gwage bamulambika omu cumpa c'enyanya. ³⁸ Bulya e Ludiya yali hofi n'e Yopa, abaganda erhi bayunva oku Petro ali eyo munda, barhuma yo bantu babirhi mpu bamubwire ayishe duba buzira kucerwa. ³⁹ Petro ayimuka agenda buba haguma na balya bantu, erhi ahika bamusosa mwecirya cumba c'enyanya. Abakana boshi bali bamuzungulusire bakamuyereka amaropo n'emishangi akagi bahangira amango aciri nabo. ⁴⁰ Petro ahulusa abali omu nyumpa boshi, afukama arhondera oku shenga, ahindukira omubiri aderha, erhi: "Tabita zuka, abumbula amasu erhi abona Petro atamala. ⁴¹ Amuhereza amaboko amuyimanza, buzinda ahamagala abemezi na balya bakana, abahereza ye akola azine. ⁴² Eyo myanzi yamanyikanahoshi omu Yopa na bantu banji bayemera Nyakasane. ⁴³ Kasanzi kasungunu Petro abera e Yopa aha mw'omuntu oderhwa Simoni ali mubinji.