¹ Mulume muguma ye Ananiya na mukage Safira, baguza ishimwa lyabo. ² Anacishiga obwenge bona mukage mpu bayorhane bw'eyo ngulo n'ecindi cigabi acihekera entumwa. ³ Petro anacimubwira erhi: Ananiya cirhumire shetani akurhola omurhima, anakushumika mpu ongwerhere Muka Mwimana? onayorhanage ecigabi c'engulo y'ishwa lwawe? ⁴ Ka lirhalilyawe? k'orhanagwerhe oluhuma lw'okuliyorhana? n'ewe oliguza, k'orhaligwerhe oluhuma l'okuliyorhana? Mgahi omurhima g'okujira ntyo gwacirhenzirage? Arhali bantu warhebire ci Nnamahanga. ⁵ Erhi Ananiya ayunva ezo nderho acishurha oku idaho arhenga mwo omuka Abayunvagya okwo boshi bakajuguma. ⁶ Abana b'emisole bayimuka baboha gulya murhumba, bajigubisha. ⁷ Erhi kazanzi nka ka nsa zisharhu kagera, mukage ayisha arhamanyiri luhi na luhi ⁸ Petro anacimudosa erhi mbwira: kayo ngulo mwaguzize ishwa linyu eyi? Nyaye erhi: '' neci y'eyo''. ⁹ obo Petro amubwira erhi: kurhi oko mwasinzire obwenge mpu murhangule Muka Mwimana? lola abarhengibisha bablo baciri oku magulu ahah luso: nawe bakujana. ¹⁰ Honaho aci rhimba aha magulu gage, arhengamwo omuka. balya bana b'emisole erhi baja omu nyumpa bashimana amafa, bamuheka, bamubisha aha burhambi bw'iba. ¹¹ E Ekleziya yoshi yayoboha bwenene na ngasi boshi bayunvirhe okwo, bakageramwo omusisi. ¹² Entumwa zakagejira ebimanyiso n'ebisomerine binji omu lubaga, boshi haguma bakagibera omu mbaraza ya Sulemani, ¹³ Na nta wundi muntu waderhaga mpu abajamwo, ci erhi n'olubago lwoshi ludwirhe lwabakunga. ¹⁴ Bantu banji, abalume n'abakazi, ¹⁵ bakayemera Nyakasane na ntyo abemezi bayushuka nvingo n'omu bushiro ciru bakabahira n'omunjira, mpu lyo hano Petro agera, ciru ecizunguzungu cage cigerekwo muguma mulibwo. ¹⁶ Engabo y'abantu yakarhenga omu bishagala ly'eburhambi bw'Eyerusalemu, bakalerha abalwala n'abantu balimwo shetani na boshi bakafuma. ¹⁷ Oku bundi omudahwa mukulu n'ababaliboshi bobalya b'omurhwe gw'Abasaduseyi, babijamwo, banayunva balumirwe. ¹⁸ Banacigwarha entumwa bazihina omu mpamikwa y'abantu boshi. ¹⁹ Erhi kuba budufu malahika wa Nyakasane ayigula enyunvi z'empamikwa zoshi, n'erhi abahisa embuga ababwira erhi: '' ²⁰ gendagi omu ka-Nyamuzinda mukayigiriza olubaga ebinwa byoshi by'obo buzine. ²¹ Bayunva ako kanwa n'erhi buco baja omu ka Nyamuzinda, barhondera okuyigiriza. Lero omudahwa mukulu anaciyisha bon'ababaliboshi, bahamagala abashamuka b'ihano likulu na ngasi bagula b'omu bene Izraeli okubundi barhuma abacilerha entumwa omu mpamikwa. ²² Ci abobaganda erhi bahika mpu bayigule empamikwa, bababula banacigaluka aderha mpu: ²³ Rhwashimanyire empamikwa erinyigale bwinja, nabalanzi ayimanzire aha nyunvi, ci ene rhuyigula rhurhashimanyiremwo ndi. ²⁴ Erhi bayunva ntyo, omurhambo w'aka Nyamuzinda n'abajinji b'abadahwa bazanwa, bakadosanya mpu lero kw'okurhi oko? ²⁵ Obwo hanaciyisha muntu muguma ababwira erhi: '' balya bantu mwashwekaga, bonabo bali omu ka Nyamuzinda bayigiriza olubaga. ²⁶ Omurhambo w'a Nyamuzinda anaciyija n'abambali; alerha entumwa, ci nta kubi abajirire. Bulya baliyobohire olubaga mpu lwakababanda amabuye. ²⁷ Erhi baba bamabahisa banacibayimanza ekarhi kihano. Omudahwa mukulu abadosa erhi: ²⁸ Ka rhurhamuhanzagya n'okwalagale nti murhakagiyigirize enyigirizo zinyu omu Yerusalemu. Wabona mwalonza omukolo gw'oyo muntu rhuberhwe gutumuzibwa. ²⁹ Petro n'ezindi ntumwa bashuza erhi: ku kwanine okuyunva Nnamahanga kulusha abantu. ³⁰ Nyamuzinda wa balarha afuzine Yezu mwayirhaga erhi mumumane ka oku murhi, ³¹ Y'oyo ye Nnamahanga ekubuhashe bw'okulyo kwage ajijire mwami na muciza lyo Izraeli aciyunjuza, anababalirwe ebyaha. ³² Rh'ono rhuli bahamirizi b'ebyorhwe na Muka Mutagatifu Nyamuzinda ashobozagya abamuyunva. ³³ Erhi bayunva okwo, bakunira kwenene, ciru balonza okubayirha. ³⁴ Obwo, mufarizeyi muguma mpuye Gamaliyeli anaciyimuka omu ihano. Ali mulenga omu marhegeko, anali mukengwa omu lubaga lwoshi anacirhegeka mpu barhangihulusa hikya abo bantu. ³⁵ Oku handi anacibwira abagula b'ihano erhi: Bene Izraeli, mucirhonde mumunye bwinja oku mwajira aba bantu. ³⁶ Harhacigera nsiku Tohondozi anacizuka aderha mpu ali muntu muzibu. Bantu magana nka ani anacimushimba. Anaciyirhwa n'abalibama muyemera boshi bashandabala, bahirigirha. ³⁷ Enyumpa z'oyo galya mango baganyaga abantu bayisha Yuda w'e Galileya n'abantu barhali banyi bamushimba naye kufa afire n'abashimbulizi bage boshi bashandabana. ³⁸ Na banola, leki mubwine: murhashi mbululaga aba bantu, mubaleke, bulya, ebibali emurhima, n'ebibadwirhe bajira, akaba biri bya bantu, bya fananda, ³⁹ Ci akaba kobinali biri bya Nyamuzinda, murhahashe okubishaba: mumanye mwankaba nka Nyamuzinda ye mukozize: Bayunva ihano lyage. ⁴⁰ Banacihamagala entumwa, erhi baba bamazishurha emikoba bazihanza okucibija bayigiriza izino lya Yezu; bazilika. ⁴¹ Bohe barhenga aha kagombe bajabacishinga bulya baligwerhe iragi ly'oku bonesibwa nshonyi. izino lya Yezu lirhumire. ⁴² N ngasi lusiku omu ka-Nyamuzinda n'omu nyumpa barhahusagya okuyigiriza n'okuhanula emyanzi y'akalembe ya Yezu- kristu.