¹ Okubundi Petro na Yohane banali yinamukira omu ka Nyamuzinda omu nsa mwenda kugendi haramya. ² Lero erhi hali omuntu waburhagwa cirema. bakagi mulerha ngasi lusiku n'okumudamaza aha lunvi lw'aka Nyamuzinda luderhwa nakinja mpu ahune oburhabale okubadaha. ³ Erhi abona Petro na Yohane bakola mpu badahe omu ka Nyamuzinda, abarhega enfune. ⁴ Obwo Petro anacimulikira kwo amasu na Yohane anacimubwira erhi: rhulolekwo. ⁵ Naye abakolera kwo amasu erhi alangalire mpu hali eci banuha. ⁶ Ci Petro amubwira erhi: ensaranga n'amasholo ntabigwerhi, ci eci ngwerhe co nanakuha: Okw'izino lya Yezu kristu w'e Nazareti yimuka, ogende. ⁷ Anacimugwarha okuboko kulyo, amuyimusa. Aho honene amagulu gage n'enshando zage byazibuha. ⁸ Anacihama, anaciyimanga, arhondera alambagira. Oku handi aja omu ka Nyamuzinda bo na bo aj'agenda anahama anakuza Nnamahanga. ⁹ Olubaga lwoshi lwabona oku ali alambagira anakuza Nnamahanga. ¹⁰ Bamanyirira bwinjinja oku olya wakazidamala aha lunvi nakinja lw'aka Nyamuzinda oyo banaciyoboha, basomerwa banaci rhangala n'ebyabire. ^{12 11} Yehe arhacirhengaga kwo Petro na Yohane. Obwo mw'obulya boba olubaga lwoshi lwakunjukira emunda bali, omu mbaraza ederhwa ya Sulemani. Erhi Petro abona okwo, abwira olubaga erhi: Mwe bene Izraeli, gurhi mwakasomeragwa n'okwo? Cirhumire mwarhukonolera kwo amasu nkakuno buhashe erhi bwinja bwirhu rhwenene rhwagendesize mw'oyu muntu? ¹³ Nyamuzinda w'e Abrahamu n'Izraeli na Yakobo, Nyamuzinda waba larha ye wakuzize omurhumisi wage Yezu mwalenganyagya mwana muhakana embere za Pilato, n'obwo aliamatwa mpu alikwe. ¹⁴ Cimu oyo mwalenganyize omweru kweru na mwimana; mwahuna mpu balike ecishumusi. ¹⁵ N'omuluzi w'akalamo mwamuyirha. Ci Nyamuzinda amufula omu bafu, nirhu rhwe bahamirizi bage. ¹⁶ Na bulya ayemire izino lyage, oyo muntu mudwirhe mwabona, munayishi eryo izino lyage lyo lyamuhire amagala n'obuyemere ahana bwobufumize loshi oyu muntu omu masu ginyu mweshi. ¹⁷ Ci ntahabiri bene wirhu oku buhwinja bwarhumaga mwajira eco n'abarhegesi binyu ko nakuguma. ¹⁸ Ntyo Nnamahanga ayunjuzize ebi ali erhi adesire omu kanwa k'abalebi oku masiya wage anababale. ¹⁹ Lero muciyunjuzagye munahinduke zolyo eleyaha binyu bibabalirwa lyo analerha amango g'omurhula anarhuma olya amulaganyagya Yezu kristu. ^{20 21} Kukwanine empingu emuberane kuhika amango g'okuyumanyanya ebintu byoshi, kulya Nyamuzinda aderhaga kurhenga mira omu kanwa k'abalebi bage batagatifu. ²² Musa adesire mpu: Nyakasane, Nnamahanga anamuhe omulebi oli akani warhenga mulibene winyu, mukayunvirhiza ngasi eci ananamubwire. ²³ Ngasi owanaleke kuyunva ayo mulebi, ogwage gunahwe omu lubaga. ²⁴ N'abalebi balebire boshi kurhenga Samweli n'abakulikire balebire ezo nsiku. ²⁵ Mw'oyo muliu bana b'ababelebi na bana ba galya malaganyo Nnamahanga alagananaga na ba larha erhi abwira Abrahamu erhi: amashanja goshi g'igulu gagishwa omu iburha lyawe. ²⁶ Mwe barhanzi rhanzi murhumaga Nyamuzinda afula omwambali, amuurhuma mpu amuhe omugisho ly'arhenza ngasi muguma mulemwe omu bubi bwage.