¹ Amango muntu muguma, bamamala ku muheba aha bacha olubanja nka muhamirizi, nja jira echaha nka rhaderhere ebya bwene n'ebya yinji, echola chaha chana muyorhako, ² Amango omuntu muguma chiro akaba arhabwene, nja kahuma oku chintu chizingire, nka murhumba gw'echirhungano chirha chesezwe chiro akaba chirhungano ch'eka changwa chirhungano chibululuka oku daho, anahindamuka mubi anaja lubanja. ³ Amango, orharholere, orhabwene, nji wahuma ezinga ly'omuntu muguma orhamenyere okaja wabona enyuma, nji wanaja lubanja. ⁴ Amango, omuntu muguma, ya shambala kubuyabuya, ya chigasha okujira amabi, changwa ebikwirire, buzira oku menya embere, akaja amenya enyuma nja naja lubanja. ⁵ Oyula bachira olubanja mu higuma mw'ebyola bintu, njaba eyarhabona echaha chage. ⁶ Kandi nja narhula enterekero y'echaha ajirire, echirhungano chigeke geke, chibuzi changwa empene nka muntu w'okushukululwa; n'omudahwa nja na mushukulula oku chaha chage. ⁷ Nka ntacho aherhe akabona mw'echibuzi changwa empene; nja rhula mw'enterekero y'oborhere bw'okuyaga enyanya w'echaha emwa Nyamuzinda oku chaha chage. Nyunyi z'endyabusoki ebiri changwa nguku ebiri, nguma y'okumushukulula n'eyindi y'oku luherero. ⁸ Njarhanga zilerhera omudahwa washukulula oyola muntu w'echaha, omudahwa nja ahana erhwe, n'olunu hofi n'egosi, buzira okuzihumanula. ⁹ Nja jira lunda luguma lw'oku mbagwa, anashukiza kw'eshagama y'omuntu y'okushukulula, n'eshagama ya yorhaga banayiheba oku magulu g'embagwa, eri nterekero y'okushukululwa. ¹⁰ Nja jira akandi kanyunyi oku luherero, nk'oku birhegekerwe nantyo kw'omudahwa nja jiriraa omuntu w'okushukululwa oku chaha ajirire, nja nababalirwa. ¹¹ Nka ntacho aherhe ahana, ndyabusoki ebiri changwa nguku ebiri z'emisole. Nja lerha ntulo oku chaha chage, na chekumi ch'okuguza eshano, nka ntulo y'okushukulula; nja na heba amavurha enyanya na ntachindi achiyushulako y'empumulo. Bulala eri ntulo y'okushukulula. ¹² Nja na lerhera omudahwa n'omudahwa nja narhola efune y'eshano nka lwibuko, nja na yosa oku mbagwa, na ntulo basirezeze n'omuliro embere za Nyamuzinda: Eri ntulo y'okushukulula. ¹³ Intyo kw'omudahwa nja jirira omuntu w'okushukululwa echaha ajirire oku chintu chiguma ch'ebyola bintu, na nji banamubabalira. N'entulo nji ya yorha yaba y'omudahwa nka omu ntulo y'oluhembo. ¹⁴ Nyamuzinda ashambala na Musa n'oku derha: ¹⁵ Amango muntu muguma ahemuka arhanamenyere oku bintu bicheswa bya Nyamuzinda, nja rhula enterekero y'oborhere y'ozingire embere za Nyamuzinda oku chaha chage chibuzi chiguma chirhaherhe shembo, y'omu buso bwage y'engulo ekwirire y'efuranga, nk'oku achesibwa bwinja. ¹⁶ Nja ahana ana yushule chigabi chiguma cha karhano, olukengo lw'echintu lwa kayoboheswa obuchese nja luhereza omudahwa, n'omudahwa nja na mushukulula haguma n'echibuzi arhulire ch'enterekero y'oborhere buzingire nja nababalirwa. ¹⁷ Amango muntumuguma nja jira echaha arhanamenyere oku rhegeko liguma omu marhegeko ga Nyamuzinda, oku bintu birhakajiribwa, nja naja lubanja n'obubi bwage abarhwire. ¹⁸ Oyo muntu nja nalerhera omudahwa enterekero arhaherhe oborhere buzingire chibuzi chiguma chirhaherhe shembo, arholere omu buso naye akanasima. N'omudahwa nja na mushukulula oku bubi ajirire buzira okumenya, nja na mubabalira. ¹⁹ Chiri chaha cho borhere buzingire ali muntu w'olubanja embere za Nyamuzinda.