¹ Nahano ashambala na Musa n'oku derha: Oshambale na bene Israeli n'oku derha: ² Amango omuntu amajira echaha arhanalilonzeze oku rhegeko liguma omu marhegeko ga Nyamuzinda, akajira ebintu birhakajirika; ³ Akaba mudahwa washigirwe amavurha wajirire ntyo, anarhuma olubaga loshi lwahemuka echo chaha chage chanarhuma arherekera Nahano empanzi y'omuchukira erhaherhe shembo, ya naba nterekero y'okushukulwa ebyaha banayikolese. ⁴ Nja nalerha empanzi aha lunvi lw'echihandiro ch'ehano, embere za Nyamuzinda, nja nalambulira kw'efune yage oku rhwe ly'empanzi nja bagira embere za Nyamuzinda. ⁵ Omudahwa washigirwe amavurha nja rhola eshagama y'empanzi nja na yilerha omu chihandiro ch'ehano. ⁶ Nja dubika changwa arhogeze omudoke gwage omu shagama, anabobeza kali mushanvu embere za Nyamuzinda, emalangambere g'omu mushangi g'obuchese. ⁷ Omudahwa nja heba eshagama oku mahembi g'oku mbagwa n'amalashi ga bya bwinja embere za Nyamuzinda omu lunvi lw'echihandiro ch'eheno n'oku kushukira eshagama y'empanzi yoshi oku magulu g'embagwa yo luherero luli oku mahulukiro g'echihandiro ch'ehano. ⁸ Nja kula amashushi moshi g'empanzi g'oku shukululwa, n'amashushi ga shukire ebyo munda, n'ebishwekerwe byoshi; ⁹ Esiku zombi, n'amashushi ga zungulukire, n'okushukira obuhira bw'amagulu n'echiviringo chinene ch'obudiku, njakula hofi n'esiku zombi. ¹⁰ Omudahwa nj'akula ebigabi nka kubalala bakula eby'empanzi omu nterekero kusimisa Nyamuzinda, nja na biyosa oku mbagwa yo luherero. ¹¹ Aliko oluhu lw'empanzi n'eminyofu yoshi, n'erhwe lyayo n'amagulu gayo, n'eby'omunda byayo, n'ebifu, ¹² eyola mpanzi oku enali yoshi ngumaguma, banayibarhula banayiheka omu hantu hachere, aha bakabulira oluvu, banayiyosa n'omuuliro oku shali, oku chisahani ch'oluvu nji bayoseza , basireze. ¹³ Akaba chigusho cha bene Israeli bajirire echaaha barhanalilonzeze barhanali bwene, omu kujira kubi erhegeko omu marhegeko ma Nahano okujira ebintu birhakajiribwa, n'oku chichira olubanja. ¹⁴ Echaha wajirire chamenyikene, echigusho nji cha rhula empanzi y'omurhuba rhuba, nterekero y'okushukulula, nja nayilerha embere ye chihandiro ch'ehano. ¹⁵ Abashamuka be Israeli banalambulira efune zabo oku rhwe ly'eyola mpanzi embere za Nahano. ¹⁶ Omudahwa washigirwe amavurha machesizwe nja lerha eshagama y'empanzi omu chihandiro ch'ehano; ¹⁷ Njana rhogeza omudoke gwage omu shagama, anayishukize kali mushanvu embere za Nyamuzinda emalangambere g'omushangi. ¹⁸ Nja naheba eshagama oku mahembi gali oku mbagiro luli embere za Nyamuzida omu chihandiro ch'ehano, nja nashukirza eshagama yoshi yashiba oku magulu g'embagiro y'oluherero, luli oku lunvi g'echihandiro ch'ehano. ¹⁹ Nja na kula amashushi goshi g'empanzi, nja namayoseza oku lubagiro. ²⁰ Nja jira eyola mpanzi nka mpanzi y'okushukula, nja na jira okola kuguma. Na ntyo omudahwa nja jirirabo okushukulula na nji bana babalirwa. ²¹ Nja na heka eyola mpanzi enyuma y'olugo, nja nayiyosa nka mpanzi y'embere eri nterekero y'okushukulula olubaga loshi. ²² Akaba ali murhambo wa jirir'echaha buzira bulonza, okuhemuka oku rhegeko liguma omu marhegeko ga Nyamuzinda, Namahanga wage, oku bintu birhakajiribwa nja na chija lubanja, ²³ N'oku menyirira echaha ajirire, nja na rhula enterekero y'omushakalume gurhaherhe shembo. ²⁴ Nja lambula efune yage oku rhwe ly'ogola mushakalume, nja nabagira omu hantu banabagira emperero embere za Nyamuzinda. Eri nterekero ya kushukulula. ²⁵ Omudahwa nja rhola haguma n'omudoke gwage eshagama y'omuntu bashukulula nji banaheba oku mahembi g'embagwa g'oluherero n'okushukiza eshagama oku magulu g'embagwa g'oluherero. ²⁶ Nja na yosa amashushi goshi okumbagwa, nka mashushi g'enterekero y'oku simisa Nyamuzinda. Na ntyo kw'omudahwa agenda ajirira omurhambo oku chaha chage bashukulula, nja namubabalira. ²⁷ Eri akaba muguma w'omu lubaga wajirire echaha buzira bulonza bwage, n'okuhemuka oku rhegeko liguma omu marhegeko ga Nyamuzinda oku binru birhakajiribwa n'oku chija lubanja, ²⁸ N'oku menyirira echaha ajirire nja na rhula enterekero y'empene erhaherh'eshembo oku chaha ajirire. ²⁹ Nja na lambula efune yage oku rhwe ly'omuntu bashukula, nji banabagira omu hantu banabagira oku mperero. ³⁰ Omudahwa nja na rhola n'omudoke gwage eshagama y'empene y'omuntu, nja nayiheba oku mahembi g'embagwa g'emperero, n'okushukiza eshagama yoshi oku magulu g'embagwa. ³¹ Omudahwa nja kula amashushi goshi nka kula bakula amashushi g'enterekero y'okusimisa, na nji bamayoseze oku mbagwa, yanaba mpumulo ekwirire emwa Nyamuzinda. Na ntyo kw'omudahwa agenda ajirira omuntu w'okushukulwa, oku handii anababalirwa. ³² Akarhula echibuzi nterekero y'okushukulula, nja narhula eye chikazi chiguma buzira shembo. ³³ Nja nalambula efune yage oku rhwe ly'omuntu, nja nabaga enterekero y'okushukula omu hantu nja bagira oku mperero. ³⁴ Omudahwa nja rhola haguma n'omudoke gwage eshagama y'echibuzi ch'oyola muntu, nja nayiheba oku mahembi g'embagwa g'eyo enterekero, n'okushukiza eshagama yoshi oku magulu g'embagwa. ³⁵ Omudahwa nja kula amashushi goshi, nka kula bakula amashushi g'echibuzi omu nterekero y'okusimisa, na nja na mayoseza oku mbagwa nka nterekero eyosezwe n'omuliro embere za Nahano. Na ntyo kw'omudahwa agenda ajira omuntu w'okushukulwa echaha ajirire, nja na mubabalira.