¹ Amango muguma nja njrira Nyamuzinda enterekero y'okusima, Akaba akarhul'empanzi changwa endaku nj'ayirhula buzira shembo embere za Nyamuzinda. ² Nja lambulira efune yage oku rhwe ly'ola muntu. Nja baga aha lunvi lw'echihandiro ch'ehano n'abadahwa bene Haruni nji bashukira eshagama oku mbagwa erhongo lyoshi. ³ Kw'eyola nterekero y'okusima nja rhulira enterekero eyosezwe n'omuliro embere za Nyamuzinda, amashushi ga shukire enyunvi na ngasi hyoshi bananirize. ⁴ Esiku zombi n'amashushi ga zizungulukire, gana shukir'obuhira bwa magulu n'echirumbu ch'omuviringo ch'obudiku, bachire oku siku zombi. ⁵ Bene-Haruni nji banayosa ebyola okubagwa enyanya w'eshali oku luherero banaheba mw'omuliro yanaba nterekero eyosezwe, basirezeze n'omuliro mpumulo ekwirire emwa Nyamuzinda. ⁶ Nka akarhula ebirhungano by'empanzi changwa by'echikazi, nterekero y'okusimisa Nyamuzinda nja yirhule buzira zabyo. ⁷ Akaba arhula enterekero y'echibuzi, nja chiyerekane embere za Nyamuzinda. ⁸ Nja lambula efune zage oku rhwe ly'oyola muntu, nji banajira embere z'echihandiro ch'ehano; bene Haruni nji banashukira eshagama oku luherero boshi omu kulunzunguluka ⁹ Kw'eyola nterekero y'okusimisa Nahano, nj'arhula enterekero eyosezwe, basirezeze n'omuliro embere za Nahano: Amashushi n'ehunga lyoshi chango bagabire hofi gw'echibuzi, changwa gw'enkavu, n'amashushi gashukire n'ebyomunda n'ebyo byoshi bishwekerweko. ¹⁰ Esiku zombi, amashushi gazungulukire, gashukire obuhira bw'amagulu g'echirhungano, n'echihinga ch'omuviringo chinene ch'obudiku nji bakula hofi n'esiku zombi. ¹¹ Omudahwa nja yosa ebyola oku bagwa. Biri biryo by'enterekero eyosezwe, n'okuyisireza n'omuliro, embere za Nahano. ¹² Akaba enterekero yage eri ya mpene nja yiyerekana embere za Nyamuzinda. ¹³ Nja lambulira efune yage oku rhwe ly'oyola muntu, nja nabagira embere ye chihandiro ch'ehano; na bene haruni banashukira kw'eshagama oku burhambi rhambi boshi bw'oluherero. ¹⁴ N'oyola muntu, nja rhula enterekero esirere n'omuliro embere za Nyamuzinda, amashushi ga shukire eby'omunda n'ebindi byoshi bashwekereko. ¹⁵ Esiku zombi, n'amashushi ga zizungulukire, ga shukire obuhira bw'amagulu n'echiviringo chinene ch'obudiku, nji bashwekula hofi n'esiku zombi. ¹⁶ Omudahwa nja yosa ebyola oku luherero. Amashushi goshi biri biryo by'oluherero bisirezezwe n'omuliro, mpumulo ekwirire emwa Nyamuzinda. ¹⁷ Liri rhegeko ly'esiku zoshi, n'oku luburha lwenyu, n'omu ngasi hantu hoshi nji mwayumbaka, nji murhalyaga amashushi n'eshagama.