¹ Nahano abwira Musa, aderha mpu : ² Amango omuntu ajira echaha n'okujir'obuhushi embere za Nahano, omukuheb'omwalungwe omu mpumukiro, echintu ahabwagwa, echintu chayibwagwa changwa charholwagwa oku bituliyo, ³ n'okulahira ku ntachintu alibwene, changwa okujira obuhamiri bw'obubeshi enyanya wa chintu chiguma chakalerh'oku jira echaha; ⁴ amango ajira echaha chiri ntya njana chirwa olubanja, njana galula echintu ayibaga changwa ahabwagwa nka chituliyo, echintu ahabwaga mpw'abike, echintu chaheraga chanabonekana.. ⁵ changwa echo chintu achigashiragako kubi. njana chigalula choshi, n'okuyushula kuchiguma cha karhano, n'okugalulira ninacho, olo lusiku lonolo achihanaga nchungulo yage y'obubi. ⁶ Njayilerha emo mudahwa nka nterekero y'obubi emwa Nahano enyanya w'echaha chage omwana buzi orhagwerhe shemb, arholaga omu birhungano byage nk'okwalonzeze. ⁷ N'omudahwa njana mushukulula embere za Nahano, njana babalirwa, chiro akaba bubi buchi ajiraga. ⁸ Nahano aderha na Musa, amubwira: ⁹ Ohe Haruni n'abagala lino rhegeko, n'oku derha: Lolaga lino rhegeko ly'enterekero. Enterekero nji yayorha oku lurhamba obudufu boshi kugera esezi, n'omuliro gukolerere oku lurhamba. ¹⁰ Omudahwa nja yambala echuli chage ch'oboya, n'okuheba mw'oluchimba oku mubiri gwage, njakula n'oluvu l'omuliro gwayosaga enterekero oku lurhamba, n'okulubika hofi n'olurhamba. ¹¹ Na ntyo njakula emishangi yage n'okuyambale eyindi, omukukula oluvu omu kambi, omuhantu hachesibwa. ¹² Omuliro nji gwakolerera oku lurhamba, gurha kanazima chiro; ngasi sezi, omudahwa nja chana kw'omuliro gw'eshalii, n'okukwiza enterekero, njayosann'amashushi g'enterekero zebijiro by'obukuze. ¹³ Omuliro nji gwayorha gukolerere oku lurhamba, na ntakuzima chiro. ¹⁴ Lolaga erhegeko ly'entulo. bagala ba Haruni bakazi lilerha embere za Nahano, embere z'olurhamba. ¹⁵ Omudahwa akazi rhola echigasha ch'obwaso bw'eshano n'amavurha, ahaguma n'obuku anayushula oku ntulo, n'okubuyoseza oku lurhamba nka lwibuko lukwirire emwa Nahano. ¹⁶ Haruni n'abagala njibalya ebi njibayorha oku ntulo; nji babilya buzira levire, omu hantu hachesibwa, omu hantu harhanzi h'ehema ly'embuganano. ¹⁷ Barhakabiyendera haguma n'elivayi. Chiri chigabi nabahereze omu ntulo zani z'okuyoswa n'omuliro. chiri chintu chichesibwe, nka Nterekero y'okukula obubi nka nterekero y'okuchishukula. ¹⁸ Ngasi chishakalume nji chaba ch'abagala ba Haruni bakazi kulya. Liri rhegeko ly'esiku n'amango okuburha lyenyu, oku ntulo z'oku sirezwa oku muliro embere za Nahano: Ngasi nji wayihumako nja chesibwa. ¹⁹ Nahano abwira Musa, aderha: ²⁰ Lolaga entulo Haruni n'abagala nji bajirira Nahano, olusiku nji bahabwa obuchesibwa: Chiguma ch'ekumi ch'Epha y'obwaso bw'eshano, nka ntulo y'esiku n'amango, chichira ch'esezi n'echichira ch'egolo. ²¹ Njiya rheganyizwa omunaga haguma n'amavurha, njiwa mulerhera Ebirashi biyenderwe omu mavurha; nji wamulerhera byo bihire nka bichira biri ntulo yakahumbulo kinja emwa Nahano. ²² Omudahwa nji waba, omu bagala ba Haruni, nja shigwa mpu ya yima hali hage, njajira naye entulo, liri rhegeko ly'esiku n'amango embere za Nahano: Nji yayoswa yoshi. ²³ Ngasi ntulo y'omudahwa nji ya yoswa yoshi; na nta kunalibwa chiro. ²⁴ Nahano abwira Musa, aderha: ²⁵ Obwire Haruni n'abana bage oderhe: Lino lili rhegeko ly'entulo y'echaha; oku hantu h'entulo y'oku sirezwa ena bagirwa h'entulo y'ebyaha ya bagirwa embere za Nahano; echesibwe bwenene. ²⁶ Omudahwa nji wayirhula enyanya w'ebyaha anayilya; nji yalibirwa ahantu hachesibwa, omu mbuga z'ehema ly'embuganano. ²⁷ Ngasi chintu nji chahuma kw'eyo nyama yage nji chaba chichesibwa; n'amango eshagama yayo yashukizwa enyanya w'omwambalo goshi, wana hogola ogo mwambalo gwa sheshekeragako omu hantu hachesibwa. ²⁸ Aliko echintu ch'obudaka enyama ya yenderagwamo, chanaberwa; n'ekayenderwa omu chintu ch'eshaba, chanashukwa n'amenji. ²⁹ Ngasi mulume omu badahwa analya echichira chage; chiri chichesibwa bwenene. ³⁰ Aliko nta kulya ngasi ntulo yoshi y'ebyola eshagama yayo elerhwe omu hema ly'embuganano, omu kujira obunvikane omu hantu hachesibwa, erhalibwa ya sirezwa n'omuliro.