¹ Njimumenye mwakachijirir'abazimu, mwakazi baharamya, murhahira mwamanika eshushano bakwizize, eri mabale babejere, omu chihugo chenyu, harhabonekaga ebale liriko eshushano mwakazi fukamira embere zalyo. Bulala nye Nahano, Nyamuzinda wenyu. ² Mulolereze, n'okugendekerera esiku zani z'e Sabato, n'omu buchesibwa bwani omu Ka-Nyamuzinda mukengemo. Nye Nahano, Nyamuzinda wenyu. ³ Nka mwaka kulikira amarhegeko gani n'okulanga enyigirizo zani nji munazihebe omu kalamo kenyu. ⁴ Nji na barhumira envula omu mango ga kwanene, n'obula nji bwabaha amalehe, n'emirhi y'omu mashwa nji yabaha emburho. ⁵ Omukurhama nji mwahula engano, nji munahume oku shalulo, n'oku shalulo nji kwa bahisa omu kurhwera; nji mwanalya omugati gwawe n'okuyugurha, nji mwanalama, mubere n'omurhula omu chihugo chenyu. ⁶ Njina heba omurhula omu chihugo na ntaye nji wabahangala omola; nji naheza eby'elubala bikalihire, na nta kere nji kagera omu chihugo chenyu. ⁷ Nji mwakulikira abashombanyi benyu nji bakumbagala embere zenyu oku Kere. Barhano omu kagarhi kenyu nji bakulikira egana, n'egana omu ka garhi kenyu nji bahima, bihumbi ekumi, na bashombanyi benyu nji bakumbagala embere zenyu oku Kere. ⁹ Hindamukira emunda oli, nji muburhe, muyushuke, nji nabagwarhira oku nywana kwani. ¹⁰ Mwagenda mwalya ebimwahebaga omu nguli mira, na nka bya mabiha mwanabikula mwanaheba hebihyahya. ¹¹ N'acha echumbi lyani omu charagati chenyu, n'omurhima gwani nji gurhashologorha nenyu. ¹² Nji nalambagira omu charagati chenyu, nji naba Namahanga wenyu n'enyu mwanaba lubaga lwani. ¹³ Ndi Nahano, Nyamuzinda wenyu, wabakulaga omu chihugo ch'e Misiri, li murhenga omu buja; nachagulanga enkoba zali bashwekere, mwagenda mwaniganiga n'okuheba erhwe omu chanya. ¹⁴ Aliko nka murhayunvirhe, murhana shimbire ago marhegeko goshi, n'eri mwakagayaguza amarhegeko gani, ¹⁵ nka mwakagaya oburhegesi bwani, na nka n'omurhima gwenyu gwa mashologorha n'oborhere bwani,murhashimba amarhegeko gani, mubone kuvuna endagano yani. ¹⁶ Lolaga ebi nji nabajirira: Nji barhumira obuba bw'okubula obushiru, okuyonda n'endwala zinene zidarhabere, zirhana fuma, n'amesho galobokere, n'emirhima yenyu erhaherhe murhula, nji mwarhwera na nta mburho mwabona, abashombanyi benyu nji babirya. ¹⁷ Nji nahindamula amalanga gani eri mu mwarhuma, nji mwashurhwa embere z'abashombanyi benyu, barhabasimire boshi nji babarhambule, nji mwajichibisha na ntaye obakulikire. ¹⁸ Ery'akaba enyuma zaho murhachiyunvirize, nji na bahana kali mushanvu kalushire okola eri byaha byenyu birhumire. ¹⁹ Nji navunangula obuchibone bw'emisi yenyu, nji nahindamula amalunga genyu nka chuma, n'edaho libe nka chumuchumu. ²⁰ Emisi yenyu nji yahwera busha, n'obudaka bwenyu burhakahana emburho, n'emirhi y'obudaka erhakabona amalehe. ²¹ Nka mwachihamba, n'okuganganyala mpu murhanyunviriza, nji na bashurha kali mushanvu kulusha oku byaha byenyu binali. ²² Nji nabarhumira ebirhungano by'elubala by'omumashwa, byanahanza abana benyu, n'okubihya ebirhungano by'eka oku luganjo lugeke, n'enjira zenyu nji zaba mpinga. ²³ Nk'obola buhane burhachibahindamwire, nka murhaleka, ²⁴ nani nji nabalahira na nji bashurha kali mushanvu kulusha oku byaha byenyu. ²⁵ Nji na barhumira, kachiholere endagano amango mwachiheba haguma omu bishagala, nji narhuma endwala y'ebibenzi n'okubaheba omufune y'abashombanyi. ²⁶ Amango nji mwachagulanga olushali lw'omugati omu masiga maguma bakazi ekumi nji balerh'emigati minene ezidohere, nji mwagenda mwalya aliko murhayugurha. ²⁷ N'akaba kandi enyuma y'okola, murhayunvirhe, munachiyumangireko, mwandahirira, ²⁸ nji na balahirira nani n'obukali nji na bahana kali mushanvu kulusha oku byaha byenyu. ²⁹ Nji mwalya oluhu lw'abarhabana benyu n'oluhu lw'abanyere benyu. ³⁰ Nji nabihya emperero zenyu ahantu hali oku ntondo, nji nashandaza eshushano zenyu z'obuche oku zuba, nji na heba emifu oku yindi mifu y'abazimu benyu, n'omurhima gwani nji gwa bashologorhwera. ³¹ Nji na hindamula ebishagala byenyu mw'empinga, nji na shandaza emperero zenyu, nji na nayisa empumulo ekwirire y'amalashi genyu. ³² Nji na kehya echihugo, na bashombanyi benyu nji balamamo, mwasomerwa na ntacho mwajira, na nta mwazi mwaderha. ³³ Nji na bashandabaganya mw'obuko, n'okubakulira engorho enyuma zenyu, echihugo chenyu cha shandazwa n'ebishagala byenyu byaba mpinga. ³⁴ Ago mango echihugo cha haramya eSabato zacho, n'amango goshi nji gashandazwa, nji mwaba omu chihugo ch'abashombanyi benyu, ago mango echihugo nji chahumuka n'oku haramya e'Sabato zacho. ³⁵ Amango goshi nji cha shandazwa nji mwaba n'omurhula g'okuhumuka obu murhaliherhe omu Sabato zenyu, nabo mwaliyumbakiremo. ³⁶ Nji na hindamula abarhaherhe bushiru omurhima g'obuba baguma omubo nji baba balamire, omu chihugo ch'abashombanyi babo; olwamo lw'omuhusi gw'ebirhi nji lurhuma bagenda balibirha; nji banachibisha kulala bachibisha oherhe engorho. Banagenda bakubagula na ntaye obakulikire. ³⁷ Nji bakumbagazanya, n'okushunikana baguma oku babo, nka kulala bali embere z'engorho, na ntaye obakulikire, na nta bashombanyi benyu bayumangire ahamuli. ³⁸ Nji mwafa omu buko changwa omu mashanja, n'echihugo ch'abashombanyi benyu nji babamiramira, ³⁹ n'abola baguma omu mwabo nji balama nji bashurhwa n'akalamo k'obubulirwa oku bubi bwabo, omu chihugo ch'abashombanyi babo, nji bashurhwa kandi n'akalamo k'obubulirwa oku bubi bwa b'eshe bwarhuma. ⁴⁰ Nji bahungama obubi bwabo n'obubi bwa b'eshe, oborhere bubi bajirire emunda ndi; n'okunyumangira, n'oku ndahirira, ⁴¹ ebyaha birhumire nyono, nani nabalahirira na nji nabaheka omu chihugo ch'abashombanyi babo; n'omurhima gwabo gukomere, gurhachesezwe nji bajuh'omwinda g'obubi bwabo. ⁴² Nji nayibuka endagano yani na Yakobo, nji nayibuka endagano yani haguma na Isaka, n'endagano yani na Abrahamu, nji nana yibuka echihugo. ⁴³ Bowe nji baleka echihugo, nji baharamya e'Sabato zabo amango bowe bashandazizwe, nji bajuh'omwinda g'obubi bwabo, bulala barhakengaga amarhegeko gani, Omurhima gwabo gwaliherhe amarhegeko n'okushologorhwa nago. ⁴⁴ Aliko amango nji baba omu chihugo ch'abashombanyi babo, nta kabakabulira nta kanabashologorhira, kuhika bahwe, kuhika nche endagano yani haguma nabo; bulala nye Nahano Nyamuzinda wabo. ⁴⁵ Nji nashubiyibuka aminja g'endagano ya bashokuluza, garhumaga n'abakula omu chihugo ch'e'Misiri, omu mesho g'obuko, mpu ye Nahano wabo, nye Nyamuzinda. ⁴⁶ Eyola y'emihigo, enyigirizo z'oborhere, n,amarhegeko, Nyamuzinda achijiriraga n'abana be Israeli, oku ntondo ye sinayi, na Musa.