¹ Nahano abwira Musa oku ntondo ye Sinayi n'oku derha: ² Oshambale n'abana be Israeli n'oku babwira: Amango nji mwahika omu chihugo na bahereza, egulu nji lyanahumuka njaba Sabato oku renge lya Nahano. ³ Wakazirhwera amashwa gawe myaka ndarhu,myaka ndarhu wanahogolera; nji wana shalula emburho. ⁴ Aliko mwaka gwa mushanvu njaba Sabato, mango gakuhumus'obudaka, Sabato ku renge lya Nahano, nj'orharhwera eshwa lyawe, na ntakuhogolera emizabibu yawe. ⁵ Orhahira okashalula ebya chimezaga byonine by'emburho zawe, zahungumukaga amango g'okushalula. Nta kuhumbuza emburho z'emizabibu orhahogolere; nji gwaba mwaka gwa kuhumusa obudaka. ⁶ Ebinji byayera oku budaka amango g'e Sabato, nji byakurhabala oku biryo, w'oyo, oku mwambali wawe, oku muhisi wawe mulamire haguma naye. ⁷ Ebirhungano byawe, n'ebyo mulubala biri omu chihugo chenyu; byoshi bunguke bw'okukurhabala oku biryo. ⁸ Waganja Sabato mushanvu z'emyaka mushanvu kali mushanvu, n;'esiku z'ezola Sabato mushanvu z'emyaka nji zaba myaka makumi mane na mwenda. ⁹ Omu siku kumi z'omwezi gwa mushanvu, obuhe omushekera gushekereze bwenene,olusiku lukulu lw'obonjo, mugeregere omu chihugo choshi mwayinja mwabuha omushekera. ¹⁰ Muderhe guli mwaka gu chesibwa, mwaka gwa makumi marhano muderhe abalamire mw'echola chihugo boshi barheng'omubuja, bashagaluke, bashubirane echabo, ngasi muguma agaluke omu mulala gwage. ¹¹ Omwaka gwa makumi marhano gube mwaka gwenyu g'olusiku lukulu, gwa bushagaluke, murhahira mukarhwera emburho changwa okuhumumba emimerera, aga mashwa gamezaga gonine,murhahira mukahumbula amangaka oku myaka yenyu murhashovere. ¹² Bulala luli lusiku lukulu lwa bushagaluke bwenyu, nji mwalola nka chintu chi chesibwa nji mwalya n'emburho z'amashwa genyu. ¹³ Mw'ogola mwaka g'olusiku lukulu l'obushagaluke, ngasi muguma nja rhola ehyage. ¹⁴ Nka wakaguza mwalungwe wawe, changwa nka wakamugulira, muguma omu mwabo arhakwanene okurhebeka mwene wabo. ¹⁵ Nj'agulira mwalungwe wage omu kuganja emyaka kurhengerera olusiku lukulu l'obushagaluke, nja naguza, omu kuganja emyaka y'oku byoshi bya jirikirwe. ¹⁶ K'oku emyaka yiyashuka kuna nawe yiwayushula engulo, n'oku emyaka yiyakeha ku nawe yiwakehya engulo, bulala olola luganjo lw'emyaka luja kuguza. ¹⁷ Nta muguma omu mwabo nj'orhebekage mwalungwe wage, njo n'ayobohe Namahanga wawe; bulala nyono Nahano, Nyamuzinda wawe. ¹⁸ Mushimb'amarhegeko gani, mulange oborhere bwani, na ntyo mwanaba n'omurhula omu chihuggo. ¹⁹ Echihugo nji chanaba bahereza emburho zenyu nji mwanalya, muyugurhe mwanalama n'omurhula. ²⁰ Nka rhwachibazaga mpu: Bichi nji rhwalya mw'ogola mwaka gwa mushanvu, ebwa kuba nji rhurharhwera, rhurhashalula emburho zerhu? ²¹ Nji nabahereza omugisho gwani omu mwaka gwa ndarhu, nji nabahereza emburho mwanayeza nji mwalya myaka esharhu. ²² Omu mwaka gwa munane mwanashubi rhwera, nji mwanalya oku muhako gwa mira, kuhika mwaka gwa mwenda, kuhika mushubiyeza eri munaherhe mwalya ebi mwahakaga mira. ²³ Obudaka nji burhaguzwa loshi loshi, bulala echihugo chiri chani, muli emwani nka bahisi na nka bantu bachilamiremo n'okugera konine. ²⁴ Omu chihugo choshi oherhe chage. Nji mwajira erhegeko ly'oku chiyas'obudaka. ²⁵ Nka mwene wenyu akaba mukene akaguza echichira ch'eshwa lyage, olala oyimire ahali hage, changwa eri mwene wabo omuyegerere kulusha nja nayinja agombole chilala chichira aguzaga. ²⁶ Eri akab'omuntu arhaherh'owayima omu byage, chiyenine alonza agombole eryola shwa lyage. ²⁷ Nja naganja emyaka kurhenga baguzana, nja nagalulira owagulaga eby'enyanya, kandi njanagalulaka omu shwa lyage. ²⁸ Nk'arhaherhe echa mugalulira, kw'echola chigabi aguzaga, chanayorha omu fune y'owagulaga kuhika olusiku lukulu lw'obushagaluke, analigalulira ni nalyo,owagulaga n'achirhengera. ²⁹ Nk'omuntu akaguza enju alamiremo omu chishagala chizungulukire n'engurhu eyo nju yage kuhika oku buzinda bw'omwaka gukulikir'ogw'aguzagamo. ³⁰ Eri akaba eyola nju eri omu chishagala chizungulukire n'engurhu zizibuzibu erhagombwerwe embere za mwaka mugumagoshi, nji yanaba y'owagulaga loshi loshi, n'eburha lyage. Ntaye nji wachirhengamo n'okulusiku lukulu lw'obushagaluke. ³¹ Enju z'omubihanda zirhazungulukire n'engurhu zizibuzibu nji bazirhola nka za budaka buhyahya. Nji bwanagombolwa, n'owagulaga nja rhengamo omu lusiku lukulu lw'obushagaluke. ³² Ebiyerekere omu bishagala bya ba Lawi n'oku nju, Abalawi nji baba n'obuhashe bw'okuzigombola losho loshi. ³³ Oyula nji wagula enju nguma y'Abalawi, nj'arhenga omu lusiku lw'obushagaluke omu nju aguzaga n'omu chishagala aliyiherhemo, bulala enju z'omu bishagala z'Abalawi zabo omu kagarhi k'abana be Israeli. ³⁴ Amashwa gali oku burhambi bw'ebishagala by'Abalawi marhagenda maguzwa bulala biri bintu byabo esiku zoshi. ³⁵ Nka mwene wenyu akaba mukene, n'efune yage yi yakuhuna hofi nawe, wana murhabala, abe muhisi oli omu chihugo, oku buzinda alama haguma nawe. ³⁶ Nj'orhamulonzaga mw'obunguke, changw'obunguke bw'enyanya, nj'oyobohe Namahanga wawe, na mwene wenyu alama haguma nawe. ³⁷ Nj'omenye wakakaziyindika efuranga z'obunguke, orhahira okayiindik'ebiryo by'obunguke bunene. ³⁸ Nyono Nahano Nyamuzinda wawe, wabakulaga omu chihugo ch'e Misiri, mpu y'abahereza echihugo ch'e Kanana, limba Nyamuzinda wenyu. ³⁹ Nka mwene wenyu akaba mukene, hofi nawe, akuchinguze, orhamubwira oku wajirer'emirimo y'obuja. ⁴⁰ Nj'aba emwawe nka muhisi, nk'oyula nji wabera; nj'anaba mwambali wawe kuhik'omwaka g'olusiku lukulu lw'obushagaluke. ⁴¹ Nj'arhenga emwawe yewe n'abana bage, haguma naye, nj'agaluka omu mulala gwage, omu bintu bya b'eshe. ⁴² Bulala bali bambali bani, n'okulaga omu chihugo ch'e'Misiri, nji barha chiguzwa kulala baguza abaja. ⁴³ Orhamurhegekaga n'obukali haguma n'okulegema, nji wayoboha Namahanga wawe. ⁴⁴ Omu mashanja ga kuzungulukire muwakazi kula omuja wawe n'omwambali wawe aba wagenda warhola, abola banji wagulam'omuja n'omwambali wawe. ⁴⁵ Kandi mwagula omu bana babahisi balamire emwawe, n'omulala gwabo nji gwa burhira omu chihugo; obola bana nji baba bintu byenyu. ⁴⁶ Enyuma zenyu nji mwaleker'abana benyu akashambala, nka byabo; njibana balolereza nka baja esiku zoshi, aliko oku bene benyu, abana be Israeli, nta muguma omubo, nji warhambula haguma n'oku kaliha oku mwene wabo. ⁴⁷ Eri akaba omuhisi, nka yewe aba mugale, na mwene wenyu amaba mukene, hofi naye, n'okuchiguza oku muhisi olamire emwawe changwa muguma w'omulala g'omu muhisi; ⁴⁸ Oyula nji waba aherhe obuhashe bw'okujigombola, enyuma ly'okuguzwa: Muguma omu bene wabo nja naja mugombola. ⁴⁹ Eshe wage, changwa mugala w'eshe wage changwa muguma oshegerer'omulala, bana mugombola, changwa oku bwinja, nkaherh'ebintu akachigombola yenine. ⁵⁰ Nj'aganja haguma naye bamugula kurhenga omwaka achiguza kuhika omwaka gw'obushagaluke, n'echichiro ch'okugula chagerera oku myaka yage okolere, n'oku bunguke amulerhere nka mukozi wage. ⁵¹ Nka kandi hali emyaka minene, y'okuchigombola kwage kwa rhengerera n'echichiro ch'eyola myaka bamugulagamo. ⁵² Nk'emyaka yayorha migeke kuhika oku bushagaluke, nja naganja okujuha obugombozi bwage kugerer'eyola myaka. ⁵³ Akazi bera nka mulimi omu mwaka, n'oyola nja bera emwage arhagenda amukolesa n'obukali omu mesho mawe. ⁵⁴ Nka nta kuguma achigombweremo mw'okola koshi, nja narhenga changwa nji banamulika omu mwaka gw'obushagaluke, yewe n'abana bage haguma naye. ⁵⁵ Bulala nye nyono abana be Israeli bali baja bani: Bali bambali bani, nakulaga omu chihugo ch'e Misiri, nyono Nahano, Nyamuzinda wabo.