¹ Nahano abwira Musa n'okuderha: ² Orhegeke abana be Israeli balerhe esimikiro y'okurhabika kw'amavurha g'oliva bahindamwire, buzinda bakwize mw'amatara bagendekeza. ³ Embuga y'omushangi guli embere z'omuhamirizi,omu ka Nyamuzinda, Haruni arheganya enyenge zikolerere zagendeker'egolo kuhika esezi haguma na Nyamuzinda, liri rhegeko ly'esiku zoshi oku burha lenyu lyoshi. ⁴ Akaziyumanza enyenge okusimikiro bachulaga n'ehoro ekwirire, mpu zikazi kolera n'okugendekera embere za Nyamuzinda. ⁵ Nji warhola omulengo gw'eshano, na nji wanajira mu rhugati ekumi na rhubiri: ngasi higati nji hyaba higati hyakabiri oku chigabi ch'ekumi. ⁶ Nji warhurhabika rhubiri rhubiri rhukulikirene, changwa ndarhu rhukulikirene oku lwibo lw'ehoro ekwirire embere za Nahano. ⁷ Nji warhabika oku chintu chilerha ehumulo ekwirire ku ngasi lukere nji warhabika oku mugati nka bya kuyibukirako, nka ntulo esirerere esingonyokere n'omuliro embere za Nahano. ⁸ Ngasi lusiku lwa Sabato, eyola migati yakaziyorha bayidekereza, omu kugendekeza: Chihango ch'esiku zoshi nji rhwalolereza abana b'e Israeli. ⁹ Eyola migati nji yaba ya Haruni n'abagala bage, nji bagenda bayirya omu hantu hachesebwa, bulala oku bowe chiri chintu chichesezwe bwenene, chiguma ntulo esirerere n'okusingonyoka n'omuliro embere za Nahano,liri rhegeko ly'esiku zoshi. ¹⁰ Mugala w'omuyuda-kazi muguma aliko eshe eri munya Misiri, ayinja omu kagarhi k'abana be Israeli analerha entonganyi omu kambi na haguma n'omulume w'omu Israeli. ¹¹ Mugala w'oyula mukazi w'omu Israeli ojachira ezino lya Nahano, bamulerha emwa Musa Nina bamuhamagala Shelomiti, mwali wa Diburi w'omu buko bwa Dani. ¹² Bamushweka kuhika hano Musa aderha oku Nyamuzinda amujirage. ¹³ Nyamuzinda abwira Musa n'okuderha: ¹⁴ Nj'omukule omu kambi oyola ojachira ezino la Nyamuzinda, ngasi yeshi wayunvaga nj'amuhebe kw'amaboko okurhwe lyage, na kola kadeko koshi k'abantu bamukwebe amabale. ¹⁵ Nj'oshambale n'abana be Israeli n'oku derha; ngasi yeshi nji wajachira ezino lya Nyamuzinda nj'aheka echaha chage yenine. ¹⁶ Oyola nji wajachira ezino lya Nyamuzinda nja hanwa omukufa, n'endeko y'abantu emukwebe kw'amabale abe mubunga mubulirwa nj'afa bulala ajachire ezino lya Nahano. ¹⁷ Owagenda washurha owindi muntu kuhika okufa, nja hanwa kuhik'okufa. ¹⁸ Oyula nji washurha echirhungano kuhika okufa nj'agalula echizene oku chizene. ¹⁹ Nka muguma wenyu akavuna mwalungwe wage naye banamujira ntyo. ²⁰ Buvune oku buvune; lisho oku lisho, linyo oku linyo, bakujiria kuguma nk'oku wajirire mwalungwe wawe. ²¹ Oyula nji wayirha echirhungano agalule echindi aliko oyula nji wayirha omuntu ahanwe afe. ²² Eryo liri rhegeko lyenyu mweshi abe muhisi nka mubulirwa: Bulala nyono nye Nahano, Nyamuzinda wenyu. ²³ Musa ashambala n'abana be Israeli: Bakulire omu kambi ojachira ezino lya Nahano banamukweba amabale: Abana be Israeli bajira nk'oku Nyamuzinda arhegekega Musa.