¹ Nahano ashambaza Musa, amubwira ntya: ² Ogende ojibwira Haruni n'abagala oku bachilange oku bwanga buchesezwe bw'ebi abana be Israeli bankanterekerera, banamenye bankahemukira ezino lyani lisshinganyanya, nye Nahano. ³ Onababwire oku ngasi muntu w'omu mulala gwenyu yeshi wankaba azingire, akachihanyagaza mpu ashegerera obwanga buchesezwe bw'ebi abana be Israeli banterekerera,oy'omuntu nabera eri ali mushwekwe embere zani. ⁴ Nta muntu w'omu mulala gwa Haruni w'omubenzibenzi changwa ow'olukurujo wakalya oku bwanga buchesezwe arhanazi chesebwa. Kona kuguma n'owindi muntu wankahuma oku ngasi kantu omufu gw'ahemusize, changwa omuntu ageza emburho , ⁵ ngasi yeshi wankahuma oku mirhumba y'ebinyagarha oku daho bilala byankarhuma omuntu azira changwa eri muntu ozirire aka muhemba omuziro gwage gulebe, ⁶ kw'okuderha oku ngasi ochihanyagaza mpu ahuma kw'ebyola, anayorha ahemukire kuhika egolo, arhankalya obwanga buchesezwe, aliko anarhangi jiyoga omubiri gwage n'amenji. ⁷ Hano ezuba lizika, anaba bwinja, nantyo anabonilya oku bwanga buchesezwe, bulala biri bilyo byage. ⁸ Arhankalya echirhungano cha chifiraga, changwa echanigwa n'echinyalubala, li chirarhuma azira, nye Nahano nderhereko. ⁹ Bakulikire amarhegeko mani li barhajira echaha, balekifa bunola bamavunire banahemukire obwanga buchesezwe, nye Nahano mbajira bachesebwa. ¹⁰ Nta muntu orhali w'omu mulala gw'Abalawi wankalya oku bwanga buchesebwa; owolwahanda wankahanda emw'omudahwa n'omulimi, barhankalya oku bwanga buchesebwa. ¹¹ S'aliko omuja omudahwa agombolaga n'efuranga, yewe anabilyako, n'omuja waburhiragwa omu mwage; aba bankalya oku bwanga bwage. ¹² Mwali w'omudahwa erhy'akashabwa n'omuntu orhali w'omu mulala gw'Abalalwi, arhankachilya ebiryo bakulaga oku bwanga buchesebwa. ¹³ Oyola mwali w'omudahwa, eri ankaba mukana changwa eri akahuluswa omu mwage nkarhagwerhe bana akagaluka aha mwabo, akanaberaho kulala analiri amango alichiriri munyere, akanagalirya oku biryo by'obwanga bw'eshe, chi nta muhisi wankabiryako. ¹⁴ Eri omuntu ankahabuka, alye oku bwanga buchesezwe bw'omudahwa, anahongera omudahwa chilala chintu chichsezwe, anayushuleko echiguma cha karhano. ¹⁵ Abadahwa bashinganene okuchilanga oku hemukira obwanga buchesezwe, bwa banya Israeli, bulala barherekereraga Nahano; ¹⁶ bamenye bankababarhuza omuzigo gw'echaha, chilala bankajira omu kulya obwanga buchesezwe, chanarhuma bahana enterekero y'okuchishukulula, bula nye Nahano, nye mbijira bichesebwa. ¹⁷ Nahano abwira Musa, anaderha ntya: ¹⁸ Ojibwira Haruni n'abagala haguma n'abana be Israeli boshi, wanka babwira ntya: Ngasi muntu w'omu mulala gw'e Israeli changwa omushumba oli omubo, amango g'okurhula enterekero, ebe ya kuhikiriza echiragane, eri ya kuhema konine, changwa eri yakaba ya kumulakirira, Nyamuzinda; ¹⁹ Ly'omugomi wage ayemerwa , oyo muntu abage endume erhaherhe shembo, empanzi, engandabuzi changwa echishakalume. ²⁰ Murhahira mukarhula enterekero eherhe eshembo, bulala erhankayankirirwa. ²¹ Eri omuntu ankarhulira Nyamuzinda enterekero y'omu birhungano byage ebizibuzibu changwa eri bigekegeke mpu bibe bugashanize b'okuvuga omwonkwa, changwa eri ya kuhikiriza echiragane chilebe. ²² Nji murharhula chintu abe muhurha, owachikire echirhumbu, owavunikire bwenene, abaherhe endwala z'oku chikoba ch'omubiri, amahere, changwa ow'enkovu, nji murharhula oku luherero enterekero esirezwe n'omuliro embere za Nyamuzinda. ²³ Nji wakajira enterekero nka ntulo y'empanzi nguma, chibuzi chiguma biherhe ebirumbu bilehere changwa ebiyofohere oku bulonza bwawe wenine, aliko nji ba rhabiyemera nk'oku walaganyaga Nyamuzinda. ²⁴ Nji murharhuliraga Nyamuzinda echirhungano chiherhe amachebe mahengamire, aga basinyogere, changwa bamahagula, changwa okumacha; Nji murhagarhulaga nterkekero omu chihugo chenyu. ²⁵ Nji murhayemeraga muhisi changwa omubunga, muguma wabola bantu, mpu arhula nka biryo bya Namahanga wenyu bulala bavunikire, baherhe obubi, barhakayemerwa. ²⁶ Nyamuzinda abwira Musa: ²⁷ Enkavu, echibuzi changwa empene, amango chamaburha, nji chanabera siku mushanvu haguma na nina oku lusiku lwa munane z'ezindi, nji banabiyemera mpu babirhulire Nyamuzinda nterekero esirere n'omuliro. ²⁸ Empanzi, chango echibuzi, nji murhabibaga echirhungano n'omwana gwacho mw'olola lusiku. ²⁹ Amango nji mwarhulira Nahano enterekero y'okusimisa, nji mwanajira okwenyu koshi eyemerwe. ³⁰ Omuntu nja nalya olola lusiku, nji murhamulekera chintu kuhika esezi. Ndi Nahano. ³¹ Nji mulang'amarhegeko gani, muna mashimbulire, ndi Nahano. ³² Nji murhahemukiraga ezino lichesibwa lyani, buzinda nanacheswa omu kagarhi k'abana be Israeli. Ndi Nahano wa bachesa. ³³ Nyi nabakulaga omu chihugo che Misiri mpu mbe Namahanga wenyu. Nye Nahano.