¹ Nahano abwira Musa ntya: Ogende oshambalire abadahwa, bagala ba Haruni, obabwire oku nta mudahwa chiro n'omuguma omubo njochihemulage eri mufu gw'omu mulala gwabo gwarhuma; ² arhali ab'omu mwabo bonine nk'omufu gwa nina, gw'eshe, ogw'omugala, ogw'omwali , ogw'omulumuna changwa ogwa mukulu wage, ³ na kandi ogwa mwali wabo ochiri mubikira, orhasagishabwa, nk'achiri haguma naye, gw'anarhuma ahemuka. ⁴ Bulala okuba mukulu omu mulala gw'olubaga lwage, amenye ankachihemula ahemule n'echikono chage. ⁵ Abadahwa bachilange bamenye, barhakazagi gembesa enviri zoshi okurhwe, barhakazagi gembes'amanwa gabo gabe nka mishosho, bamenye barhakazagishakwa omubiri gwabo. ⁶ Bali bashinganyanya ba Nyamuzinda wabo, chaziga bamenye bankahemula ezino lya Nyamuzinda bulala bobalerhera Nyamuzinda entulo z'abantu; ebiryo bya Nyamuzinda wabo: Chechirhumirecho bakwanene okuba bashinganyanya. ⁷ Barhahira bakarhola omukzai w'embaraga, changwa orhakengwa; barhahira bakarhola omukazi eba ahulusize omu nju, bulala abadahwa bayorha baba bashinganyanya ba Nyamuzinda wabo. ⁸ Agwasizwe oku kenga omudahwa, bulala ye habirwe okurherekera entulo ya Nyamuzinda wawe, nka kalyo kage, okazi murhola nka mushinganyanya embere zawe, bulala nyenine ndi mushinganyanya, nyono nahano, nye mbajira bachesebwa. ⁹ Eri mwali w'omudahwa aka chihemula n'obubaraga, eri eshe ahemwire bamuchanire kw'omuliro. ¹⁰ Omudahwa mukulu, oba akulire bene babo, eyi badubuliraga amavurha oku rhwe, anayimikwa mpu akazi yambala emishangi egishirwe, arhankashandaza enviri zage, arhakaber'emyambalo yage. ¹¹ Oyola arhankashegerera ah'omurhumba chiro n'omuguma; arhanachihumanyaga mpu akasherer'omurhumba gw'eshe, changwa ogwa nina. ¹² Arhanahira akarhenga omu ka Nyamuzinda,ly'aleki hemukira aka Nyamuzinda wage, bulala galala mavurha ga Nyamuzinda wage ashigagwa oku rhwe lyena shungwe lyage, nye Nahano nderhereko. ¹³ Amango ashonda ashabe bishinganene arhole omunyere ochiherhe ebikira. ¹⁴ Arhahira akashaba omukana, arhankashaba omukazi muherula, arhankanarhola omukazi w'oborhere bubi changwa omuhushi; chi nka amalonza okushaba omukazi, arhole omubikira w'omu buko bwage. ¹⁵ arhanahira akakoza eburha lyage eshonyi omukagarhi k'olubaga lwage, bulala nye Nyamuzinda na muyimikaga na mujira muchesebwa. ¹⁶ Nahano aganiza Musa amubwira ntya: ¹⁷ Bwira Haruni ntya: Nta muntu chiro n'omuguma w'omu buko bwage wankaba aherhe obulema oku mubiri gwage, nj'ochihanyagazage mpu ashegerere olurhamba mpu arhulira Nyamuzinda wage. ¹⁸ Nta muntu wakaba aherhe obulema oku mubiri nj'ochihanyagazage ashegerera oluhya; empumi, enkunagizi, omuntu w'ezulu lihombokere changwa echingiringiri; ¹⁹ Changwa omuntu ovunikire okugulu eri okuboko; ²⁰ Omuntu w'enyonjo, engonyi, oherhe esu ly'amalera, ow'olukiriyo, omubenzibenzi, omuntu akonerwe. ²¹ Nta muntu chiro n'omuguma w'omu buko bw'omudahwa Haruni wankaba aherhe obulema oku mubiri, nj'ochihanyagazage mpu ashegerera Nyamuzinda mpu amurhulira entulo, bulala aherhe obulema oku mubiri gwage, arhankachihanyagaza mpu arhulira Nyamuzinda wage enterekero, nka biryo byage. ²² Nechi, ankachirya oku biryo bya Nyamuzinda wage, chiro n'oku bwanga bw'abachesibwa,n'oku bwanga buchesebwa bonine. ²³ Chi arhankanyerekezera ebwa mishangi michesibwa, arhankanaja ebwa luherero, bulala aherhe obulema oku mubiri; lya arhazingisa ahantu hani hachesezwe, bulala nyono, nye Nyamuzinda mpajira hachesibwa. ²⁴ Musa ashambalira Haruni intyo, boshi n'abagala, n'abana bw'omu Israeli boshi.