¹ Nahano abwira Musa, anaderha: ² Ojibwira abana b'e Israeli ntya: Ngasi mu Israeli changwa eri munyamahanga oba omu Israeli wankahana muguma w'omu bana bage emunda Moloki ali, afe; olubaga luli omu chihugo lumubande amabale; ³ Nani namagaya oy'omuntu n'oku mushweka, muje omu lubaga, bulala ahanire muguma w'omubana bage emunda Moloke ali, nabo ahemusize aka-Nyamuzinda kani gahuma n'ezino lyani lichesibwa. ⁴ Eri olubaga luli omu chihugo lwakalonza okumuchingira, lukafundi yirha oy'omuntu wahanaga muguma w'omu bana bage emunda Moloke ali, ⁵ nyenine nahana oy'omuntu, nahana n'omulala gwage, namuche okulubaga, nanche na balala boshi bahemukire eri Moloke orhumire. ⁶ Ngasi yeshi wakarherekera abafire n'abazimu n'oku chihemula eri babarhumire, nanamushweka n'oku mucha n'omulubaga lwage. ⁷ Muchichese munabe bachesebwa, bulala nyono ndi Nahano, Nyamuzinda wenyu. ⁸ Mulange amarhegeko mani, mukazi makulikira, Nye Nahano, nye mbajira bachesebwa. ⁹ N'eri omuntu akagayaguza eshe changwa nina, oy'omuntu afe, bulala ajachire eshe na nina, n'eshagama yage eje okurhwe lyage. ¹⁰ Eri omulume akabaraga na muka mwalungwe wage, oy'omulume n'oyo mukazi bombi bayirhwe. ¹¹ Eri omuntu akarhola muka eshe, eri amayambisa eshe busha. Oyo mulume n'oyo mukazi bayirhwe; eshagama yabo eje okubo. ¹² Eri omulume akalala n'omwazana, okubali babiri bayirhwe. Bakolere ebirhankakolwa. Eshagama yabo eje okubo. ¹³ Eri omulume akalala n'owabo mulume kulala balyma n'omukazi eri bamakola ebi bihire bwenene; enyanya zantyo, bayirhwe; eshagama yabo eje okubo. ¹⁴ Eri omuntu akashaba omukazi akanashubi rhola nazala, eri amahemuka. Bamuyose haguma na balala bakazi, n'okola chilala chihemu chana barhengamo. ¹⁵ Eri omuntu akalala n'echirhungano ayirhwe n'echo chirhungano chinigwe. ¹⁶ Eri mukazi akafumbarha echinyama mpu chimulale, yirha oyo mukazi n'echo chirhungano, byombi binigwe; bachibarhuze eshagama yabo bonine. ¹⁷ Eri omuntu akarhola mwali wabo, mwali w'eshe changwa mwali wa nina, eri akabona obutambara bwage n'eri olala mwali wabo naye akabona obutambara bwa musheja wabo, eri zamaba shoni zinene; bachibwe omu mulala gwa bene babo eri babona, bulala ayambisize mwali wabo busha, anabarhule omuzigo gw'obubi bwage. ¹⁸ Eri omulume akalala n'omukazi oli oku siku zage z'omwezi, n'eri ankabona obutambara bwage; okubona oku bashukwire halala elala shagama eri yarhenga, bachibwe bombi omu lubaga lwabo. ¹⁹ Orhahira okashukula obutambara bwa munyoko, changwa obwa nyokoshenge, bulala eri wamachileka butambara, mweshi mwanahanirwa obubi bwenyu. ²⁰ Eri omuntu akarhola muka eshe wage, akashukula obutambara bwa muka nalume; omuzigo gw'echaha chabo guje oku rhwe lyabo, banafage buzira kuburha omwana. ²¹ Eri omuntu akarhola muka mwene wabo, chiri chihemu, eri amashukula obutambara bwa mwene wabo; barhankabona mwana. ²² Mulange amarhegeko mani n'engeso zani zoshi; munakazi makulikira, ly'echihugo nji nabayerekezamo mpu muchirhambule chirhabashalaga. ²³ Murhakulikiraga amarhegeko g'amashanja nahiga embere zenyu, bulala balijirire amabi gali nk'agola, che chanarhumire bangayisa. ²⁴ Na babwiraga: Oku mwe mwanarhola echihugo chabo, nye nabahacho chibe chenyu: Chiri chihugo chiri chahulula mw'amarha n'obuchi! Nye Nahano, Nyamuzinda wenyu wababerulaga kw'ago mashanja. ²⁵ Muberule ebinyalubala byankahumanya n'ezirhankahumanya limurha chihemula n'ebyo binyalubala bihumanya, n'ezo nyunyi zihumanya na ngasi byoshi bilema byanyagarha oku daho, ebi mbabwirire mpu mubiberule mubirhole nka byaka hemula. ²⁶ Mube bachesibwa embere zani bulala ndi muchesibwa, nyono, Nahano, nababerulire kwagola mashanja limuba b'emwani. ²⁷ Eri omukagarhi kenyu mwakaboneka omulume changwa omukazi ohera changwa omulaguzi, abo bantu bayirhwe, bababande amabale. Eshagama yabo eje okubo.