¹ Galiri mango abami boshi baliri ewalunda lwe yorodani, oku ntondo n'oku chihugo ch'eshishi, n'oku chihugo chaliri hofu n'enyanja nkulu, embere ze Lebanoni, Bahiti, Baamori, Bakanani, Baperizi, Bahivi, na Bayebusi, bayunvaga; ² babuganana haguma na murhima guguma yi balwisa Yoshuwa na Baisraeli. ³ Amango abantu be Gibeoni bayunva gurhe Yoshuwa ajiriraga Yeriko na Ai, ⁴ bajiraga obubi, bagenda n'oku jira nk'oku bajiriraga entumwa, barhola ebigunira byamira enyanya z'epunda zabo n'empu z'amavu gamira zashandukire n'oku hangwa, ⁵ n'ebirato byashandukire n'amagulu gabo, n'emyambalo ya mira oku mibiri yabo, n'omugati goshi gw'ebiryo byabo gwaba gwayumire n'okuja kw'embubwe. ⁶ Bagera hofu na Yoshuwa, omu kambi eyo Giligali, bababwira yewe n'abantu be Israeli: Rhwarhenga omu chihugo ch'ahale, na ntyo jira echihango haguma nerhu. ⁷ Abantu b'e Israeli babwira Abahivi: Nkaba mwalama nerhu, na nka gurhe rhwakaja rhwajira echihango haguma nenyu? ⁸ Babwira Yoshuwa: Rhwabano rhuli bambali bawe, Yoshuwa ababwira: Mwabo mwe bande? Na ngahe mwarhenga? ⁹ Bamubwira: Bambali bawe bayinjire kurhenga omu chihugo ch'ahale bwenene enyanya w'ezino lya Nahano, Nyamuzinda wawe. Bulala rhwayunvirhe obukuzwe bwage na bichi ajirire omu Misiri, ¹⁰ na byoshi ajirire bami babiri b'Amori baliri ewa lunda lwe Yorodani, Sihoni, mwami we Hesiboni, na Ogi, mwami we Basani waliri emwa Asitaroti. ¹¹ Na ntyo abashaja berhu n'abantu boshi bw'omu chihugo cherhu barhubwirire, baderha: Murhole ebiryo muje omu lugenzi, mugende mubuganane nabo, n'oku babwira: Rhwabano rhuli bambali benyu, na ntyo mujage mwajira echihango haguma nerhu. ¹² Omugati gwerhu g'oguno rhuherhe guchidagarhire nka biryo byerhu, kurhenga olusiku rhwarhengaga emwerhu kugera emwenyu, aliko nantyo, mulolage oku gwa yumire n'okuba n'embubwe. ¹³ N'empu z'amavu rhwabumbaga, zaliri zihyahya, mulolage, zarhulikire, n'emyambalo yerhu chiro n'ebirato byavundire enyanya y'olugenzi lulehere bwenene. ¹⁴ Abantu barhola ebiryo byabo buzira kudosa hano oku bunu bwa Nahano. ¹⁵ Yoshuwa ajira omurhula haguma nabo, ajira echihango nabo mpw'abaleke n'akalamo, abakulu b'engabo bachigasha. ¹⁶ Galiri mango gazinda enyuma ya siku esharhu z'oku jira echihango nabo, bayunva mpu baliri balungwe bahofu nabo, balama omu kagarhi kabo. ¹⁷ Abana be israeli babalama, bagera omu bishagala byabo enyuma ya siku esharhu. Ebishagala byabo byaliri e Gibeoni, Kefira, Beroti, Kiriati-Yearimu. ¹⁸ Abana be Israeli barhabashurhaga bulala abakulu b'engabo babaga bachigashire emwa Nahano Nyamuzinda we israeli. Engabo yoshi yalubira abakulu. ¹⁹ Aliko abakulu boshi babwira engabo yoshi: Rhwachigashire emwa Nahano, Nyamuzinda we Israeli, na ntyo rhurhaka chibahumako. ²⁰ Rhwabajirira ntya, rhwabaleka n'akalamo, obuhanya burhabaga enyanya zerhu enyanya y'oku chigasha rhwachigashire. ²¹ Abakulu bababwira: Mubaleke n'akalamo aliko babe barhu bezeza eshali n'okudomera olubaga loshi amenji, ntyo kw'abakulu bali bababwirire. ²² Yoshuwa abahamagala, ababwira: Charhumaga mwarhurhebeka n'okuderha: Rhwabo rhuli bahale bwenene nenyu, n'obo mulamire omu kagarhi kerhu? ²³ Na ntyo mwa mavumwa harhanabulwa omu kagarhi kenyu omuntu waba mwambali, w'okubeza eshali n'okudoma amenji gw'omu nju ya Nyamuzinda wani. ²⁴ Bashuza Yoshuwa, baderha: Bulala abambali bawe babwirwaga emyazi mpu Nahano Nyamuzinda wawe abwiraga omwambali wage Musa okubahereza mwabo echihugo choshi, n'okuyirha engabo y'echihugo embere zenyu, na ntyo rhwayubaha bwenene enyanya w'akalamo kerhu enyanya zenyu, na ntyo rhwajira echintu chiri nk'echi. ²⁵ Na ntyo, lolaga, rhwabano rhuli omu fune zawe, orhujirire okw'obwene bwinja n'okushinganene oku mesho gawe. ²⁶ Abajirira ntya, abafumya omu fune z'abana be Israeli barhabayirhaga. ²⁷ Yoshuwa abajira kurhenga olo lusiku bantu baku beza eshali n'oku domera engabo amenji n'olurhamba lwa Nahano, kugera zene , oku hantu akachishoga.