¹ Aba Israeli bazimba echintu chidarhi chihehererwe na Nahano abaga abalahize eyo e Yeriko. Muntu muguma ezino lyage ye Akana mwene Karmi,munjukulu wa Zabudi,munjukuluza wa Zera,w'omu mulala gwa Yuda,yewe arhola kw'ebyo bintu,lero arhuma Nahano akalihira aba Israeli. ² Yoshuwa abere ali e Yeriko,arhuma abantu e Ai ebwa chishagala ch'e Beteli,hofu n'e Beti-Aveni mpu,bagend'eyola mwecho chihugo chiyorhere. Bagaluka emunda Yoshuwa ali, ³ bamubwira mpu : Waliha orharhumaga engabo zesh'eyo munda,orhume bihumbi bibiri byonyine,kandi eri bisharhu,bulala abantu bayo bali bageke bwenene. ⁴ Balume bihumbi bisharhu bajagayo, s'aliko abantu b'e Ai babalibirhako. ⁵ Abantu b'e Ai babayirhamo hofu bantu makumi masharhu,abayorhaga babahiga kurhenga oku chishabuko ch'echishagala,babahisa e Shebarimu bayinja babayirha bwandagala. Olubaga lwayubaha,bachika omurhima omunda. ⁶ Yoshuwa n'abagula b'aba Izraeli babera emishangi yabo eri burhe bwarhuma,bakumbagala dubaduba embere z'esanduku y'Endagano ya Nahano kuhik'egolo,bachilagiza kw'oluvu omwirhwe. ⁷ Yoshuwa aderha mpu : Mani Nahamwerhu Nnamahanga, Bichi byarhumaga warhushabusa olwinji lw'e Yorodani ? Ka kwaliri kulonza mpu orhuhe Aba Amori barhuyirhe ? Kw'orhaka rhulekere eshiriza ly'e Yorodani ! ⁸ Waliha,Nahamwerhu gurhe na chiderha na aba Israeli bamahimwa n'abashombanyi babo? ⁹ Hano aba Kanani n'abantu b'eno boshi bamenya ntya,barhushimba,barhuheza omu gulu,gurhe lero wachiyerekana oku we mugala byoshi ? ¹⁰ Nahano abwira Yoshuwa mpu : Yumuka ! Bichi birhumire wakumbagala dubaduba ? ¹¹ Aba Israeli bajirir'echaha,bavunire erhegeko lyani. Balekere oku jira oku rhwalagananaga nabo,barholere oku bintu byalilahizwe babizimba,babibisha omu charagarhi k'ebindi byabo bintu. ¹² Aba Israeli barhaka chirindira abashombanyi babo,bakazibayaka,bagendekera oku yirhwa ntachiba haguma nenyu kuhik'amango mwa yosa ebi bintu na bahanzaga mpu murharholaga. ¹³ Ogendage orheganye olubaga olubwire luchichese omusezi. Bulala nyono nye Nahano Nnamahanga,imbwirire aba Israeli ntyo : Omu kagarhi kenyu muli ebitnu na balahizaga oku murharholaga,murhahima abashombanyi benyu murhanazi kabula ebyo bintu nabahanzaga oku murharholaga ! ¹⁴ Omusezi esezi muchiyerekane embere zani buko oku buko,obuko naja nachishoga buchiyerekane. Eshanja oku lindi, n'eshanja nakana chishoga lyana chiyerekana,mulala oku gundi,n'omulala na ka chishoga gwana chiyerekana,muntu oku windi. ¹⁵ Owa kalya kw'ebyo bintu bilahizwe,bana muyosa n'omulala gwage goshi,na ngasi kantu agwerhe,bulala avunire erhegeko omu chiragane rhwalagananaga na nenyu kandy'anajirire ebyo busire omu Israeli. ¹⁶ Eri bucha sezi,Yoshuwa ayerekana aba Israeli, buko oku bundi, achishoga obuko bwa Yuda. ¹⁷ Bayerekana obuko bwa Yuda,eshanja oku lindi, achishoga eshanja lya Zera. Bayerekana eshanja lya Zera mulala oku gundi, achishoga omulala gwa Zabuloni. ¹⁸ Bayerekana ogo mulala muntu oku windi,lero achishoga mo windi muguma,ezino lyage ye Akana mwene Karmi,munjukulu wa Zabudi,munjukuliza wa Zera w'omu buko bwa Yuda. ¹⁹ Yoshuwa abwira Akana mpu : Mwana wani,oderhe bwinja embere za Nahano Nnamahanga w'aba Israeli,ombwire okuli koshi oku biwajirire,orhabishaga hintu. ²⁰ Akana abwira Yoshuwa mpu : Nechi,nyono najiriire Nyamuzinda Lulema w'aba Izraeli echaha,intya ku byaliri : ²¹ Omu bintu byahagulgwa,nabona biri mw'echishuli chikwirire bwenene cha lukirwaga e Mezopotamiya,na bicheri magana mabiri g'efuranga,n'elopo ly'ehoro lizidohere,nabisima lero naba nabirhola. Mwabibona,bulala na bihumbir'omwidaho,omu chirhala chani,efuranga zeziri eshishi. ²² Eri Yoshuwa ayunva ntyo,arhuma entumwa emwa Akana,balibirha babishigana ebyo bintu arhindire omwidaho,n'efuranga ziri eshishi zabyo. ²³ Babirhola,babihekera Yoshuwa n'Aba Israeli boshi,byoshi babihira embere za Nahano. ²⁴ Yoshuwa n'aba Izraeli,barhola Akana mwene Zera na zilala furanga na chilala chishuli,n'ehoro,n'omulala gwage,n'enkavu,n'ebibuzi,na bapunda,n'empene,n'ehema lyage,na ngasi kantu koshi ali gwerhe,babihek'omu lubanda lw'e Akori. ²⁵ Yoshuwa abwira Akana mpu : Bichi byakurhumaga warhuma rhwalibuka ntya nani nawe ene Nyamuzinda akulibuza hon'aho aba Izraeli boshi bamukabula kw'amabale,bamuyosa haguma n'omulala gwage,n'ebintu byage. ²⁶ Bamulunda kw'echilundo ch'amabale kuhika ntya hachinachiba. Cho chirhuma aho hantu hachihamagalwa Akori, kuhik'ene; kw'okuderha Lubanda lw'amalibuko . Enyuma ly'ebyo,g'amang'oburhe bwa Nahano bwana hwere.