¹ Enyunvi z'echishagala ch'e Yeriko zaliri eri zichingirwe bwenene, n'eri aba Israeli bwo barhuma,nta muntu wakajiremo eri kurhengamo. ² Nahano abwira Yoshuwa mpu : Nku here echi chishagala, ohime omwami wamo, n'entwali zage z'enfola miherho. ³ Woyo n'engabo zawe mukazi gorha echi chishagala ,mwana chizunguluka liguma ngasi lusiku, mujire ntyo siku ndarhu. ⁴ Bajinji mushanvu ba barhula mishekera mushanvu, bashokoler'e sanduku y'endagano,oku lusiku lwa mushanvu, bazungulukeho chishagala kali mushanvu,amango abajinji bali babuha emishekera. ⁵ Han'abantu boshi bayunva eyo mishekera ebuhwa n'emulenge yindiyindi,bayinji band'olwamo oku liguma. Oku handi olukuta lugorhere echi shagala lwa honongoka, n'abantu bajamo buzira buba. ⁶ Yoshuwa mwene Nuni ahamagala abajinji aba bwira oku : Barhula esanduku y'Endagano n'abandi bajinji mushanvu baheke mishekera mushanvu,bashokolere eyo sanduku. ⁷ Oku handi,abwira abantu mpu : Gendaga mugorh'echo chi shagala n'omurhwe gushokola gushokolere esanduku ya Nahano. ⁸ Byanaba nk'oku Yoshuwa abwirag'abantu,balala bajinji mushanvu baherhe mishekera mushanvu,bagenda bayinja bayibuha,esanduku y'Endagano ya Nahano ya bayinj'enyuma. ⁹ Omurhwe gw'okushokola,gwa shokolera abo bajinji bayinja babuha emishekera buzira kuhusa,n'enyuma y'esanduku ya yinja omurhwe gw'okuzinda. ¹⁰ Yoshuwa abwir'abantu mpu : Musire, murhachiderhaga kurhenger'ene, kuhika amango njina babwira muband'olwamo. ¹¹ Ago mango abwira abantu barhol'esanduku ya Nahano bazunguluka echo chishagala liguma. Enyuma ly'aho,bashubira omwishwa balyamamo. ¹² Eri bucha sezi,Yoshuwa azuka,na balala bajinji babarhula kandi esanduku ya Nahano. ¹³ Balala bandi bajinji mushanvu bagwerh'emishekera mushanvu, bashokoler'esanduku ya Nahano eri banayinja babuha emishekera burhahusa. Omurhwe gw'oku shokola,gwa bashokolera,n'abandi bayinja enyuma y'esanduku. ¹⁴ Bazunguluka echo chishagala oku siku ebiri,bashubira omwishwa. Bajira ntyo siku ndarhu zoshi. ¹⁵ Oku lusiku lwa mushanvu,bazuka sezi sezi,bazunguluka echo chishagala kali mushanvu nk'oku banakazigijira,olo lusiku kali mushanvu. ¹⁶ Oku lugendo lwa mushanvu okw'abajinji babuha e mishekera, Yoshuwa abwira abantu mpu : Muband'empundu, bulala Na amarhuha echi chishagala ! ¹⁷ Echi chishagala chikala cha Nyamuzinda,chasherera na ngasi byoshi birimo. S'aliko muleke ela mbaraga Rahabu yonyine n'omulala gwayo,bulala abishaga balala bunviriza rhwarhumaga. ¹⁸ S'aliko mu manye murharholaga ebintu bilahizwe,bulala eri mwakanabirhola,mwanalerh'obuhanya omu mashwa gaba Israeli,n'oku lerha mw'obusherera. ¹⁹ Efuranga zoshi,n'ehoro,n'ebintu bichulwa n'echuma ch'omulinga n'echuma chonyine byacheswa na Nahano, byahabwa omu mbikiro yage. ²⁰ Abantu bahamagaliza n'abajinji babuha emishekera. Okw'abantu bamanayunva emishekera,babanda n'orhululu bwenene, ebibambazi byahonongoka. Aba Israeli n'abasirika babo barherama,ngasi muntu agera embere zage,bagwarha echo chishagala. ²¹ Bayirh'abantu balimo boshi,abalume,abakazi,emisole n'abashaja,bayirha n'ebintu,enkavu,ebibuzi n'epunda. ²² Yoshuwa abwira balala bunviriza babiri bajagi lola okw'echo chihugo chaliyorhere mpu : Muje omu mw'ela mbaraga,mumukulemo,n'omulala gwage,nka kulala mwanachigashagaye. ²³ Abo bantu bajira ntyo,bajamo,bahulusa omulala gwage,eshe na nina,basheja bage n'abalumuna n'abandi bw'ogo mulala;bayinja babagwerhe,babahira emusike gw'amashwa g'aba Izraeli. ²⁴ Bayosa echo chishagala choshi,ebya lirimo byoshi byasingonyoka. S'aliko efuranga,n'ehoro,n'ebintu bichulirwe n'echuma n'eby'eshaba n'eby'echuma chonyne birhasireraga,babihira omu mbikiro ya Nahano. ²⁵ Yoshuwa aleka Rahabu,n'omulala gwage gwoshi, bulala abishag'abunviriza bayinjaga lola gurhe e Yeriko eyorhere. Rahabu abera omu ba Israeli,yewe n'omulala gwage gunachibamo kuhik'ene. ²⁶ Ago mango Yoshuwa achigasha aderha mpu : Nahano avume mani omuntu onji washubiriz'oku yumbaka echi chishagala ch'e Yeriko ! Owaderha mpu ashub'iyumbaka,afirwe n'efula,owaderha mpu ashub'iyimanza enyunvi zacho,afirwe n'omuziba ! ²⁷ Nahano ali haguma na Yoshuwa,aj'erenge omu chihugo choshi.