¹ Lolaga Abami aba Israeli bahimaga, n'okuba baligwerhe echindi chihugo ewalunda lw'e Yorodani, ewa bushoshokero bw'ezuba, babanyega kurheng'omu lubanda lw'e Arnoni kuhik'oku ntondo y'e Hermoni. Bagwarha n'ebihugo byali omu lubanda lw'ebuzikiro bw'ezuba. ² Omurhanzi ye mwami Sihoni w'Abamori aliri Eheshimoni. Alirhambwire kurhengerera Aroeri yaliri hofu n'olubanda lw'e Arnoni, n'echishagala chaliri ahagarhigarhi k'olubanda,n'echi chira ch'e Gileadi,kuhik'oku lwinji Yakobo,oku lubibi lwa wa Amoni. ³ N'omu lubanda lw'e Yorodani,n'oku nyanja ye Galilaya,n'eshishi y'e Beti-Yeshimoki,kuli kuderha oko kulunda lw'ekulyo lw'enyanja y'omunyu,na kuhik'oku ntondo y'e Pisiga. ⁴ Bahima mwami Ogi w;e Basani,aliri w'omu Barefaimu,alirhambwire Astaroti,n'Edereyi. ⁵ Alirhambwir'omu ntondo ye Hermoni,n'e Saleka,n'e Basani yoshi kuhik'oku lubibi lw'Abageshuri,n'Abamaaka,na lunda luguma lw'echihugo ch'e Galadi,ahik'oku lubibi lwa mwami Sihoni w'e Heshiboni. ⁶ Musa, mukozi wa Nahano, n'aba Israeli, babahima; Na Musa, mukozi wa Nahano, ahereza bene Rubeni echihugo mpu chibe chabo, na bene Gadi, n'echichira ch'omulala gwa Manase. ⁷ Aba ba bami Yoshuwa n'Aba Israeli bahimag'eshiriza yo lwinji lw'e Yorodani,kuhik'ebuzikiro bw'ezuba,kurhonderera e Bali-Gadi kuhik'omu lubanda lwe Lebanoni,n'omu ntondo ze Halaki kuyerekeza e Seiri. Yoshuwa agabira aba Israeli ebyo bihugo byoshi nk'okw'emilala yabo yaliri. ⁸ N'ebyaliri omu ntondo n'ebyaliri ekulyo, n'ebyaliri eshiriza y'olubanda lw'e Yorodani n'ebyaliri eshiriza y'empinga,n'ebyaliri ekulyo n'ebihugo byoshi bya Bahiti,n'eby'Aba Amori, n'eby'Aba Pirizi,n'eby'Aba Yebusi. ⁹ Aba ba bami aba Israeli bagwarhir'ebihugo byabo : Mwami w'e Yeriko,n'owe Ai,hofu n'e Beteli ; ¹⁰ Na mwami w'e yerusalemu,n'owe Heburoni, ¹¹ Na mwami w'e Yarmuti,n'owe Lakisi, ¹² n'owe Egloni n'owe Gezeri, ¹³ n'owe Debiri,n'owe Gederi, ¹⁴ n'owe Horma,n'owe Aradi, ¹⁵ n'owe Libuna,n'owe Adulumu, ¹⁶ n'owe Makeda,n'owe Beteli, ¹⁷ n'owe Tapuwa,n'owe Heferi, ¹⁸ n'owe Afeki, n'owe Saroni, ¹⁹ n'owe Madoki,n'owe Hasoro, ²⁰ n'owe Shimuroni-Meroni,n'owe Akshafu ²¹ n'owe Tanaki,n'owe Megido, ²² n'owe Kedeshi,n'owe Yokineamu omu Karmeli, ²³ n'owe Dori oku burhambi bwe nyanja n'owe Goyimu omu Galilaya; ²⁴ n'owe Tirsa. Abo bami boshi haguma,baliri makumi masharhu na muguma.