¹ Mwami Yabini w'e Hasoro aber'ayunva ntyo,arhum'entumwa emwa mwami Yobabi w'e Madoni,n'emwa mwami we Shimuroni,n'owe Akshafu. ² Arhumira n'abandi bami baliri ebwa lunda lwe ntondo ekulyo,arhumir'abaliri ekulembe n'olubanda lwe Yorodani ebwa nyanja y'e Galilaya n'omumbanda n'abali oku nyanja e Dori ebuzikiro bw'ezuba. ³ Abakanana baliri ebushoshsokero bw'ezuba n'ebuzikiro bwalyo,n'Abamori,n'Abahiti, n'Abaperizi, n'Abayebusi baliyumbakir'omu ntondo,n'Abahivi baliri eshishi oku ntondo ye Hermoni omu chihugo ch'e Misipa. ⁴ Abo bami bayinja basholomokere n'engabo zabo zoshi,baliri banene nka mushenyi g'omu nyanja,baliherhe n'efarasi n'emituga minene bwenene. ⁵ Abo bami boshi bashimanana, bagerer'e Meromu mpu balwis'aba Israeli. ⁶ Nyamuzinda abwira Yoshuwa mpu : Orhabayubahaga,omusezi nka mwenosa na kuhimirabo boshi. Aba Israeli babashalula n'oku bayirha,oche n'emisi y'entege z'e farasi n'okudwika n'emituga yabo. ⁷ Yoshuwa n'engabo zage babarhibukirako oku shoko ye Meromu. ⁸ Nyamuzinda ahimira aba Izraeli abo bantu,babashurha n'oku bahiga kuhik'e Sidona ebwa chishagala chinene,n'e Misrefoti-Maimu,babahis'omu lubanda lw'e Misipa ebushoshokero bw'ezuba,babayirh'eyo munda, chiro nta muntu wafulumukire. ⁹ Yoshuwa abajira kulala Nahano amu bwiraga,ach'emisi y'entege z'e farasi zabo,n'emituga yabo ayidwika. ¹⁰ Ago mango Yoshuwa ashubir'enyuma, agwarh'echihugo che Hasoro ayirha mwami wamo. Ago mango echishagala che Hasoro bwo bwali burhwali bw'ebyo bihugo. ¹¹ Aba Israeli bayirh'abantu boshi baliri mwecho chishagala,barhalekega chiro n'owobufumu,banayosa echo chishagala ch'e Hatisori. ¹² Yoshuwa agwarh'ebyo bishagala byoshi n'abami babyo boshi,balilungene. Ayirha'abami n'abantu baliri mwebyo bishagala,nka kulala Musa mwambali wa Nyamuzinda amu bwiraga. ¹³ Aliko ebishagala byoshi byaliri oku ntondo barhayosa chiro n'echiguma; eche Hasoro chonine Yoshuwa ayosaga. ¹⁴ Aba Israeli barhol'ebintu byabo byoshi n'enkavu zaba zabo,nta muntu w'obufumu balekere chiro. ¹⁵ Intyo ku Nahano abwiraga Musa,na Musa abwira Yoshuwa, na Yoshuwa ajira ntyo. ¹⁶ Ago mango Yoshuwa agwarh'echihugo choshi,agwarh'ebishagala byoshi byaliri omu ntondo,ebye kulembe n'eby'e Goseni,n'ebyaliri omu mbanda kuhik'omu lubanda lw' e Yorodani,n'ebyaliri oku ntondo n'omu lubanda lw'ekulyo. ¹⁷ Agwarha n'abami boshi b'omu ntondo z'e Halaki,kurharamira e Seiri kuhik'e Baali-Gadi omu lubanda lw'e Lebanoni eshishi ye ntondo y'e Hermoni,abayirha. ¹⁸ Yoshuwa alwis'abo bami boshi siku zinene. ¹⁹ Nta bantu balonzez'oku yunvikana n'aba Israeli,kulek'Abahivi bonine baliri Gabaoni. Aliko Aba Israeli bayinja bagwarh'ebindi bihugo omu ntambala. ²⁰ Bulala Nahano ajir'emirhima yabo midarhi mpu yibalwis'aba Israeli. Aba Israeli bayinja babayirha buzira kubabalira barhalekaga chiro n'omuguma nk'oku Nahano abwiraga Musa. ²¹ Ago mango Yoshuwa ayinja,alwis'Abanaki baliri omu ntondo y'e Heburoni, n'e Debiri, n'e Anabu,n'abaliri omu ntondo ye Yuda, n'omu y'e Israeli. Yoshuwa abayirha boshi,ashereza n'ebishagala byabo. ²² Nta Munaki wayorhere omu chihugo ch'aba Israeli,aliko bageke bayorh'e Gaza n'e Gati, n'e Asidodi. ²³ Yoshuwa arhol'echo chihugo choshi,achiherez'aba Israeli nk'oku Nyamuzinda abwiraa Musa,abagabira cho, ashimba nk'okw'emilala yabo yaliri. Echihugo chalongera entambala yahwamo.