¹ Omulebi Elisha mulebi muguma w'omusole g'omu murhwe gw'Abalebi, amubwira mpu: Ochirheganye orhole esupa ly'amavurha g'omuzetuni, oj'Eramoti ye Galadi. ² Han'ohikayo olonze Yehu mwene Yosafati munjukulu wa Nimushi. Omuhuluse omu nju bene babo bali, omuhek'ebusika yenine. ³ Orhol'ago mavurha, omushesherego okurhwe n'oku mubwira mpu: Nkugoshwere obe mwami we Israeli, enyuma lyaho ochingul'olunvi olibirhe, orhayumangaga. ⁴ Oyo mulebi aj'eRamoti ye Galadi, ⁵ Ashiman'abakulu b'engabo bali omu hano, eri na Yehu ali nabo. Amubwira mpu: Waliha mperh'omwazi na kubwira. Yehu aderha mpu: nde muguma mu rhwabo? Aderha mpu: Woyo waliha. Yehu ayumuka, aj'omu nju. ⁶ Yehu ayumuka, aj'omu nju, oyo muntu amusheshera amavurh'omurhwe, aderha mpu: Nyamuzinda w'aba Israeli aderhere mpu: Nakugoshwere mpobe mwami w'olubaga lwani lw'aba Israeli. ⁷ Wayirh'omulala gwa nahamwenyu Ahaba goshi, ochihole ku Yezebeli ku balala balebi n'abandi bambali bani boshi ayirhaga. ⁸ Nechi omulala gw'Ahaba goshi gwahena, naherahera abalume boshi balirimo. ⁹ Omulala gw'Ahaba na gukolera echiri nkechi nakoleraga ogwa mwami Yeroboamu we Israeli n'ogwa Baasha mwene Ahiya. ¹⁰ Orhubwa rhwalira Yezebeli omu luchiga lwe Yezereheli, arhabonaga chahamba. Oyo mulebi w'omusole abere amala derha ntyo achingul'olunvi alibirha. ¹¹ Yehu abere ashubira emunda abambali ba nawabo bali, bamudosa mpu: Myazi michi? Bichi ola musire ayinjaga kulonzeza? Yehu ababwira mpu: Ebij'omu bango! Mumanyere abo bantu, n'ebibaderha. ¹² Aliko bashubi mubwira mpu: Kubesh'oko! Mani orhubwire. Ababwira mpu: Amambwira oku n'oku ambwirire n'okwani oku Nyamuzinda anyimikire mpu mbe mwami waba Israeli. ¹³ Okuliguma bajira dubaduba bahogol'ebishuli babirhind'oku daho. Bayikaza ku Yehu. Abaziha babuha omu mishekera n'abantu boshi baband'empundu mpu: Mwami Yehu oganze. ¹⁴ Ntyo, Yehu mwene Yosafati, agwarhwa n'akahinda enyanya za Yoramu. Yoramu aliherh'alanga e Ramoti Giliadi haguma n'aba Israeli, enyanya za Hazaeli mwami we Suriya. ¹⁵ Aliko mwami Yoramu agaluka mpu yafuma ebihulu Abasuriya bamu koromesaga. Yehu aderha mpu: Nta muntu orhengage omu chihugo bangaheka ehwe e Yezereheli. ¹⁶ Ago mango Yehu aj'omu mutuga gwage, aj'e Yezereheli, buno Yoramu yajaga kuchibukisiza, na Ahaziya mwami we Yuda erhyajire murhangula. ¹⁷ Omulanzi aliyumangir'oku mulunga gw'e Yezereheli, abona echikunjo ch'abantu. Namalangira echikunjo ch'abantu. Yoramu amubwira mpu: Orhume nfola muherho muguma n'epunda ajidosabo mpu: Ka Buholo? ¹⁸ Eyo ntumwa yajilinga eyo ngabo ya Yehu, adosa mpu: Mwami antumire mpu badose akaba buholo. Yehu aderha mpu: Birhakulolere. Onshimbe konine. Ola mulanzi aderha mpu: Ola muntu rhwarhumaga ajir'emunda bali, aliko arhachigalukire. ¹⁹ Yoramu arhum'owindi nfola miherho agend'oku farasi, nay'abadosa mpu: Mwami antumire oku mbadose ka buholo? Yehu amubwira mpu: Birhakulolere, onshimbe konine. ²⁰ Olala mulanzi ayakuza mpu: Entumwa ya kabiri erhagalukire. Nabwene nka Yehu, munjukulu wa Nimusi; yeri mbere. ajatembez'omutuga nka musire. ²¹ Mwami Yoramu mpu: Bamurheganyize omutuga gwage, agushoneramo. Na mwami Ahaziya naye ashonera omu gwage, bajilinga Yehu. Bashimanana omw'ishwa lyaliri lya Naboti we Yezereheli. ²² Eri Yoramu ashimanana na Yehu adosa mpu: Ka Buholo Yehu? Yehu amubwira mpu: Gurhe wakandosa ntyo, amango nyoko Yezebeli achiri omu buhushi bwage n'obulozi. Nta buholo. ²³ Yoramu agaluka dubaduba ayaka, ayakuza mwami Ahaziya mpu: Rhuyake barhujirire kaligi. ²⁴ Aliko Yehu afol'omuherho gwage alashira Yoramu omu mbagabaga z'ebirhugo, omwami gwahulungukana omu murhima, Yoramu agalanjuka omu mutuga gwage. ²⁵ Yehu abwira Bidukari entwali yage, mpu: Orhol'omurhumba gwage ogukabule omu shwa ly'owali Naboti we Yezereheli. Oyibuke galala mango rhwaliri oku farasi rhwembi, eri rhukulikir'eshe Ahaba. Nyamuzinda amubwira mpu: ²⁶ Nji na bwene mulegolo wayirha Naboti n'abagala, nchigashire oku naguhana mweryo shwa. Yehu aderha mpu: Orhol'omurhumba gwage ogukwebe omwishwa nk'oku Nyamuzinda aderhaga. ²⁷ Mwami Ahaziya aber'abona ntyo ayaka, ager'omu njira egerere Beti-Gani. Yehu amukulikira, aderha mpu: Naye mumuyirh'omu mutuga gwage; Ahikire hofu ne Guri, bamulashira hofi n'echishagala che Ibeleamu; agenda ajifir'e Migido. ²⁸ Abambali bamuhek'omu mutuga bajimuhamba e Yerusalemu omu shinda ya bene babo, omu chishagala cha Daudi. ²⁹ Yoramu mwene Ahaba abere ajira myaka ekumi na muguma oku bwami Ahaziya ayima obwami e Yuda. ³⁰ Yehu aja omu chishagala che Yezereheli. Yezebeli aber'amenya byoshi byabere achishiga, alaba ebisike, achikwiza yeshi yeshi. Yehu aber'agaluka arhenga e Yezereheli, ayinj'ahenguziza omu dirisha. ³¹ Yehu abere ager'omu lunvi lw'echishagala, Yezebeli aderha mpu: Ka buholo Zimuri, wayirhaga nahamwabo? ³² Yehu akabagana alol'omu dirisha mpu: nde wani? Barhonyi babiri eri basharhu b'omu burhwali bayunam'omu dirisha. ³³ Yehu ababwira mpu: Mumugezez'omu dirisha, mumukweb'oku daho; bamurhozamo, Yehu alabarh'omurhumba g'oyo mukazi n'omutuga gwage n'efarasi; eshagama yage yaturukira oku bibambazi n'efarasi. ³⁴ Enyuma lyaho, aj'omu burhwali alya ananywa, abwir'abambali mpu: Mujilola ola mukazi muchibwa mumuhambe buno ali mwali wa mwami. ³⁵ Bajimuhamba. Aliko barhabonaga kantu, empanga yage yonine, n'amagulu n'efune, n'enjala hoshaho. ³⁶ Bagaluka babwira Yehu ntyo. Ababwira mpu: Nyamuzinda wayorhaga aderhere yenine omu bunu b'omulebi wage Eliya mpu: Orhubwa rhwalira Yezebeli omw'ishwa lye Yezereheli. ³⁷ Omubiri gwage gwaba nka mazi mweryo shwa, ntaye wachimenyere oku chiro Yezebeli oyo.