¹ Omu samariya mwaliri bana makumi gali mushanvu bene Ahaba. Yehu ayandik'amaruba agarhumira abakulu b'engabo e Yezereheli, n'abagula bayo, n'abalemba bene Ahaba. Gali derhere mpu: ² Buno muchishwekere ku bene mwami wenyu Ahaba, muherhe n'emituga y'okulwa, n'efarasi, n'echishagala chenyu chikomere, n'amachumu. Hano mubona aga maruba, ³ muchishoge mu bene mwami wenyu olala mubwen'okwanene obwami mumuyimike abe mwami wenyu. ⁴ Bayubaha bwenene, baderha mpu: Mwami Yoramu na mwami Ahaziya barhamulingaga, gurhe rhwabano rhwamulindira? ⁵ Abakulu b'omu burhwali n'abalongozi b'engabo z'ebishagala n'abagula, n'abalemba bene Ahaba barhuma mpu bajibwira Yehu mpu: Rhwakushiga, ngasi koshi wankarhubwira mpu rhujire, rhwajirako, rhurhajira owerhu mwami, ojir'okonalonzeze. ⁶ Yehu ashubi yandika amandi maruba gaderhere mpu: Akaba mwa mashiga, mukazi kenga koshi na derha. Omusezi nka mw'enosa munderher'amarhwe ga bene mwami wenyu Ahaba boshi e' Yezereheli. Aliko abo bene Ahaba, oku banali makumi gali mushanvu bali omu mw'abarhwali b'omuchishagala, mubalemberwa. ⁷ Eyi nabo barhambo babona ago maruba, barhola bene mwami Ahaba bayirha, enyuma lyaho balunda amarhwe gabo omurhurhanda, bagarhumira Yehu e Yezereheli. ⁸ Bayinji mubwira oku baherh'amarhwe gabo. Yehu aderha mpu bagalunde. Bilundo bibiri oku lunvi lw'echishagala, gabereho kuger'esezi. ⁹ Bwabere bwamacha azuka, ahuluka omu chishagala aj'embere z'abantu aderha mpu: Muli berukweru, aliko nyono mbarhwire akahinda enyanya za Nahamwerhu, namuyirha; alikosi ndoyirhir'aba bantu boshi? ¹⁰ Mumeny'oku nta mwazi Nyamuzinda abwirire Ahaba gwagaluka busha. Amajira kul'aderhaga omulala gw'Ahaba omu bunu b'omulebi wage Eliya. ¹¹ Yehu ashubiyirha ngasi w'omu mulala gwa Ahaba baliyorhere. Ayirha abera n'abajinji baliyorhere,arhalekaga chiro n'omuguma. ¹² Enyuma lyaho Yehu ayumuka aj'e Samariya, aja haguma n'enju y'okushimanana y'abangere, abona bene babo Ahaziya mwami we Yuda; ¹³ Abadosa mpu: Mwebande? Baderha mpu: Rhuli bachi ba Ahaziya. Rhwaj'e Yezereheli kulamusa bene mwamikazi Yezebeli n'abaluzi boshi. ¹⁴ Yehu aderha mpu: Mubagwarhe banazene! Bagwarha makumi mane na babiri, babayirha, arhalekaga chiro n'omuguma. ¹⁵ Yehu arhenga eyo munda ashimana Yonadabu mwene Rekabu, amulamusa amudosa mpu: K'onsima nk'oku ngusima? Yonadabu aderha mpu: Nechi. Yehu amubwira mpu: Akaba onsima, mperez'okuboko. Yonadabu amuhako. Ago mango Yehu amushonez'omu mutuga gwage. ¹⁶ Aderha mpu: Oyinje rhugende rhwembi, wabon'obuzigire bunene nkolera mu Nyamuzinda. Ayinj'amuherhe m'ogo mutuga gwage. ¹⁷ Amuhek;e Samariya, aber'agera yo ayirha ngasi boshi baliyorhere omu mulala gwa Ahaba nka kulala Nyamuzinda aderhaga omu bunu b'omulebi wage Eliya. ¹⁸ Lusiku luguma Yehu ashimanyany'abantu be Samariya boshi haguma, aderha mpu: Mwami Ahaba agashanizaga Baali bugeke. Aliko nyono namugashaniza bwenene kumulusha. ¹⁹ Mumpamagalire abalebi ba Baali boshi, n'abamugashanizaga, n'abajinji bage, harhabulag'omuntu chiro n'omuguma, buno nkala najirira Baali olusiku lukulu muhereze n'enterekero. Omuntu wankabula hano ayirhwa! Yehu ajiraga n'obwenge mpu yamalisa abagashaniza Baali. ²⁰ Che chirhumaga aderha mpu bajirire Baali endeko nkulu. Bahamagala endeko yoshi. ²¹ Barhum'entumwa omu Israeli yoshi. Abagashaniza Baali boshi bayinja, barhabulaga chiro n'omuguma; Baj'omunju ya Baali yoshi yayunjula. ²² Yehu abwir'omujinji wakazagi langa emirhero y'okuhera, mpu agabire ngasi owaliry'aho, anajira ntyo. ²³ Ago mango Yehu aj'omu nju ya Baali haguma na Yenadabu mwene Rekabu, babwira abagashaniza Baali mpu: Mulole eri nta muntu ogashaniza Nyamuzinda we Israeli oli muno, buno bambali ba Baali bonine rhulonzeze baje muno. ²⁴ Yehu abaga ahebere enfola miherho gali munane embuga, ababwira mpu: Owankalika muntu muguma mwabala bali omu, afe ahali hage! Yehu na Yonadabu basheguka bajihana enterekero z'okusireza n'ezo okugashaniza. ²⁵ Babere bamala kuhan'enterekero, Yehu abwira abakulu b'enfola miherho mpu: Babwir'enfola miherho babo mpu: Baj'emo, mubayirhe chiro n'omuguma arhafumaga. Babayirha boshi, bakweba emirhumba embuga, baj'omu himana omunju ya Baali. ²⁶ Bakula mw'eshushano zoshi zalirimo baziyosa. ²⁷ Kandi basigul'ebale ly'olusho, bashandula n'enju yage, bayumbaka m'omusarani, gunachibaho kuhika zene. ²⁸ Ntyo ku Yehu amalaga abagashaniza Baali omu Israeli. ²⁹ Naye arhalekaga okujira ebyaha aka mwami Yeroboamu warhumaga aba Israeli bagoma bayinja barherekera eshushano y'akanyena n'ehoro yaliri omu Beteli ne Dani. ³⁰ Nyamuzinda abwira Yehu mpu: Buno wamajira ebinsimisize, wamanajira nk'oku nali, nk'oku nalonzaga oku mulala gwa Ahaba, omulala gwawe gwayorha gwayima omu Israeli kuhik'oku mwimo gwa kane. ³¹ Aliko Yehu arhakengaga erhegeko Nahano, Nyamuzinda w'aba Israeli amuhaga n'omurhima goshi, arhalekaga kujir'ebyaha nk'oku Yeroboamu abijiraga, lero naye ahira aba Israeli omu byaha. ³² Ago mango Nahano arhondera okukehya oku ba Israeli. Arhuma mwami Hazaeli we Suriya mpu abalwise omu chihugo chabo choshi. ³³ Echo chihugo chaliri eshiriza y'olwinji lw'e Yorodani, n'olunda lw'eshishi ye chishagala che Aroeri, n'oku mubunda gwe Arnoni n'e Galadi, ne Basani, n'emwa bene Gadi, n'emwa Rubeni, n'eshiriza ly'emwa Manase. ³⁴ Ebindi bijiro Yehu ajiraga, biyandikirwe omu chitabu ch'ebyakazagiba ch'abami be Israeli. ³⁵ Yehu afa, bamuhamba e Samariya, omugala Yoahazi ayima ahali hage aba mwami. ³⁶ Yehu arhambwire aba Israeli myaka makumyabiri na munane e Samariya.