¹ Elisha abwir'omukazi w'e Shunemu afulag'omugala mpu: Orheng'eno n'omulala gwawe, oje aholonzeze obereho, buno Nyamuzinda ahamager'eshali omu chihugo myaka mushanvu. ² Oyo mukazi ajir'oku Elisha anaderhaga, ajiber'omu chihugo ch'Abafilisitini myaka mushanvu n'omulala gwage. ³ Eyo myaka mushanvu yabere yagera oyo mukazi arhenga emw'abafilisitini, agend'emwa mwami we Israeli mpu amugalulir'aha mwage amugalulire n'eshwa lyage. ⁴ Ashimana mwami y'ashambala na Gehazi ola mwambali wa Elisha. Mwami ayinjag'amudosa ebisomerene elisha ajiraga. ⁵ Gehazi aber'aba ali aganulira mwami gurhe Elisha afulag'omwana w'ola mukazi, oyo mukazi ahulukira mpu bamugalulir'aha mwage bamugalulire n'eshwa lyage. Honaho Gehazi abwira mwami mpu: Waliha ola mukazi oyu, n'omugala Elisha afulag'oyu balinaye. ⁶ Mwami ados'oyo mukazi, ayemera oku ebi Gehazi amuganulire kubinali. Honaho mwami abwira murhonyi wage muguma mpu akulikire olo lubanja aderha mpu: Ndonzeze ogalulir'oyu mukazi ahamwage. N'okumugalulir'obunguke boshi bwarhenger'omushwa lyage, kurheng'amango alirhengagamo kugera buno. ⁷ Lusiku luguma Elisha aja e'Damasiki eri mwami Benehadadi w'e Suriya ali mulwala. Babwira oyo mwami oku Elisha aliyo. ⁸ Mwami abwira Hazaeli mpu: Oheker'omulebi Elisha olu luhembo andoseze Nyamuzinda eri nafum'eyi ndwala. ⁹ Hazaeli arhol'ebintu bikwirire omu Damasiki, abihesa ngamiya makumi mane mpu abihekere Elisha luhembo. Aber'ahikaho mubwira mpu: Waliha Nakuno Benehadadi antumire mpu nkudose eri afuma eyi ndwala? ¹⁰ Elisha amushuza mpu: Ogend'omubwire okw'afuma, aliko Nyamuzinda ambwirire okw'afa. ¹¹ Enyuma zaho, Elisha atomolera Hazaeli amasu, achulika ayunv'eshonyi. Elisha arhoz'emiziga. ¹² Hazaeli amudosa mpu: Mulebi bichi oli walakira? Elisha amubwira mpu: Buno nkala menyere amabi goshi wajirir'aba Israeli. Wayos'ebishagala byoshi bizibuzibu, ayirhe n'emisole yabo, n'orhubonjo rhwabo, onabwagule n'enda z'abakazi bali makule. ¹³ Aliko Azaeli aderha mpu: Waliha nye muntu ntagwerhe kamaro gurhe nankajir'ebiri ntya? Elisha amubwira mpu: Okola waba mwami w'e Suriya. ¹⁴ Hazaeli asengaruka Elisha, ashubira emwa mwami Benehadadi. Mwami amudosa mpu gurhe Elisha akubwirire? Aderha mpu: Ambwir'oku wafuma. ¹⁵ Bwabere bwach'esezi, Hazaeli arhol'obulingiti abujabik'omu menji abushukira mwami omu masu, ahuba n'okufa. Hazaeli ayima ahali ha mwami Benihadadi we Suriya. ¹⁶ Yoramu mwene Ahaba abere ahisa myaka erhano oku bwami Yosafati ayima omu bwami bwe Yuda. ¹⁷ Aliherhe myaka makumi masharhu n'ebiri amango ayimaga, ayima myaka munane e Yerusalemu. ¹⁸ Ajira nk'okw'abami be Israeli bakazagi jira, na nk'oku bene Ahaba bakazagi jira buno alishabire mwali wa Ahaba. Ajira amabi embere za Nyamuzinda. ¹⁹ Aliko Nyamuzinda arhalonzag'oku bihya obwami bwe Yuda, enyanya z'omwambali Daudi, buno alimulaganyize okw'abana bage bayorha bayima omu Israeli esiku zoshi. ²⁰ Amango Yoramu ayinjag'arhambula abantu be Edomu bagomera e Yuda, bayumanz'owabo mwami. ²¹ Yoramu abere abona ntyo, arhol'emituga yage ye ntambala, n'engabo yage budufu, aj'e Seiri omu Edomu, balonz'oku shurha Edomu, lero babagorha, boshi balibirhira omu mahema gabo. ²² Kurhenga aho, abantu be Edomu bayorha bwami kwabo, barhachirhegekwaga n'echihugo che yuda. Ne Libuna nayo ya goma ago mango. ²³ ebindi Yoramu ajirire biyandikirwe omu chitabu ch'ebyakazagijirika by'abami be Yuda. ²⁴ Abere afa bamuhamba omu shinda z'abami be Yuda, omu chishagala cha Daudi; omugala Ahaziya ayim'omu byage. ²⁵ Mwami Yoramu mwene Ahaba we Israeli abere ajira myaka ekumi n'ebiri ali oku bwami, Ahaziya mwene Yoramu naye ayima omu Yuda; ²⁶ Elyaherhe myaka makumyabiri n'ebiri aburhirwe;arhambula mwaka muguma e Yerusalemu. Nina w'oyo mwana ye Ataliya w'oku buko bwa mwami Omuri we Israeli. ²⁷ Ahaziya ajir'ebi shologoseze Nyamuzinda kuguma na bagala ba Ahaba, buno analiri muhunga. ²⁸ Mwami Ahaziya we Yuda na Yoramu we Israeli bajilwisa Ahaziya we Suriya. Entambala ya kolera Eramoti ye Galadi, Abasuriya bakoromesa Yoramu mwene Ahaba. ²⁹ Yoramu agaluka, ajibukirwa echo chihulu e Yezereheli. Ahazi aji murhangul'eyo munda, bunola alilibukire bwenene.