¹ Elisha aderha mpu: Muyunve oku Nyamuzinda aderhere, omu sezi nka bino bisanzi, bilo ekumi na bibiri by'eshano byagulwa chicheri chiguma ch'efuranga, na bilo makumyabiri na bine by'eshano y'ebikorojo byagulwa chicheri chiguma ch'efuranga. ² Omukulu w'engabo ya mwami, mwami akazagi chimogera, aderha mpu: Chiro Nyamuzinda achingul'amadirisha g'empingi, ebyoderhere byanka jirika si? Elisha amubwira mpu: Wabibona n'amasu gawe aliko orhabiryako. ³ Oku lunvi lw'echishagala kwaliri babenzi bane, babwirana mpu: Karhubere hano kuhika aharhwangafira? ⁴ Rhukaj'omuchishagala, rhwafiramo n'eshali, rhukabera hano chirhabuzarhurhafa; rhuchihane rhuj'omu bilalo by'aba Suriya, bakarhuyirha ntachibazo kandi bakarhuleka, rhulame. ⁵ Ember'emiseke erhambike baj'omunjira, bahikir'omu bilalo by'aba Suriya, barhabonaga chiro n'enyunyi. ⁶ Nyamuzinda ayunvisa aba Suriya emidindiri eri nka nkundukane y'abantu banene n'emituga n'efarasi babwirana mpu: Mwami w'aba Israeli arhurherere ajiri yamba mwami w'Abahiti n'owe Misiri mpu: Bamurhabale barhulwise. ⁷ Embere w'emiseke erhambike aba Suriya bayaka bulibirha bayas'amagala, baleka ebilalo byabo, amahema n'efarasi zabo z'okulwa n'amapunda. ⁸ Bala babenzi baj'omu bilalo, baj'omu hema liguma, balya ebiryo byalirimo bananywa, barhol'efuranga zalirimo n'ehoro, n'emishangi bajibisha. Bashubi galuka baj'omulindi hema barhola byoshi byalirimo bajibisha. ⁹ Enyuma lyaho abo babenzi babwirana mpu rhurhajirire bwinja! Olusiku lwaz'ene rhwamameny'omwazi gwinja rhwamanasira, rhukasira ntya kuger'omusezi Nyamuzinda arhushahula. Rhujibwira mwami omu burhwali bwage oku ntya kubyabere. ¹⁰ Bajibwir'abantu bayinjaga balang'olunvi lw'echishagala ch'e Samariya mpu: Rhwamanj'omu bilalo by'aba Suriya, rhurhabwene n'omuntu chiro n'enyunyi na nta mulenge g'omuntu rhwayunvirhe farasi zonine n'amapunda zishwekerwe n'amahema. ¹¹ Abo balanzi babwirabo mpu bajibwira mwami omu burhwali bwage. ¹² Mwami azuka budufu abwir'abantu mpu: Nababwira gurhe aba Suriya bajirire, buno bamanyere oku rhushalikire, barhenger'omu bilalo byabo, bajire chibisha omu luchiga, mpu hano rhuyinjilonz'ebiryo omu chilalo chabo, banarhugwarha, bagwarhe n'echishagala cherhu. ¹³ Murhambo wage muguma amubwira mpu: Rhurhole farasi erhano mwezi ziyorhere omu chishagala rhuzihire kw'abantu bakulikirebo, balole gurhe byabere. ¹⁴ Mwami ashumula mituga ebiri, ayihira kw'abalanguzi, mpu bagende balonza Aba Suriya, balole n'oku byabere. ¹⁵ Bagenda bakulikira olugere lwabo bahik'oku lwinji lw'e Yorodani,bashimana aba Suriya bayinjire bakweba emishangi n'ebintu omu mulimbwa emunda bayakiraga. Ezo ntumwa zagaluka za bwira mwami ntyo. ¹⁶ Abantu b'e Samariya bayinja boshi bahagula ebyaliri omu bilalo by'aba Suriya byaba nka kula Nyamuzinda aderhaga oku bilo ekumi na bibiri by'eshano na makumyabiri na bine by'ebikorojo byagula chikoroti chiguma ch'efuranga. ¹⁷ Mwami waba Israeli ahir'oyo mukulu w'engabo achingira oku lunvi lw'echishagala. Lero abantu bafukirana bamulabarha n'okufa nk'oku Elisha anaderhaga ,amango ayinjag'abwira mwami. ¹⁸ Elisha ali abwirire mwami oku omusezi nka mweno saa bagula bilo ekumi nabibiri by'eshano na makumyabiri na bine by'ebikorojo chicheri chiguma ch'efuranga omu chambu ch'e'Samariya. ¹⁹ Ago mango murhambo muguma w'engabo za mwami aderha mpu: Chiro Nyamuzinda achingul'amadirisha g'empingu, eby'oderhere birhankaba. Elisha naye amubwira mpu: Wabibona n'amasu gawe aliko orhabiryako. ²⁰ Byaba ntyo. Abantu bamulabarha afa.