¹ Lusiku luguma abana b'abalebi babwira nahamwabo Elisha mpu: Hanola rhuli, hali hageke oku rhwabano. ² Orhuyemerere rhuj'e'Yorodani rhuche emirhi migeke, rhuyumbake aharhwayinja rhwashimanana, aba bwira mpu: Mugende. ³ Muguma wabo aderha mpu: Waliha orhuherekeze; Elisha aderha mpu: ⁴ Agenda nabo. Babere bahika e'Yorodani, barhondera bakub'emirhi. ⁵ Muguma wabo abere akola ali arhandul'omurhi, echuma ch'embasha chaharhuk'omu muhini gw'embasha, chabalalira omu lwinji, ayama aderha mpu: Lero gurhe, nahamwerhu, eyi mbasha yaliri ntizano. ⁶ Elisha amudosa mpu: Ngahe yarhogere? Amuyerekaho; Elisha acha echichira ch'omurhi, achikweba aho, ela mbasha yayerera oku menji. ⁷ Elisha amubwira mpu: Rholagayo, oyo muntu alik'okuboko ayirhola. ⁸ Mango maguma eri mwami w'e Suriya ali alwisa aba Israeli, ahamagala ebilongozi byengabo ababwira mpu: Rhulonze aha rhwayumbaka ebilalo. ⁹ Aliko Elisha ahanza mwami w'aba Israeli okw'arhageraga aho, buno ahola h'engabo yaba Suriya yalingire. ¹⁰ Mwami waba Israeli arhuma enfola miherho mpu: Zije aho Elisha ababwiraga, achirhegula, chiro arhali liguma changwa kabiri. ¹¹ Mwami w'e Suriya arhayemeraga, ahamagal'abambali bage abadosa: Ka murhakambwira, inde oli okulunda lwaba Israeli mu rhwabano? ¹² Mwambali muguma amushuza mpu: Ntaye waliha nakuno! Aliko omulebi Elisha yebwira mwami waba Israeli, chiro n'emyazi oli wachiveba oku nchingo yawe. ¹³ Oyo mwami aderha mpu: Mugende mulole ngah'ali; narhuma abajimugwarha. Bamwira oku Elisha ali e'Dotana. ¹⁴ Arhuma y'efarasi, n'emituga, n'engabo y'enfola miherho nene zagenda budufu bagorha echo chishagala. ¹⁵ Emiseke yarhambikire, mwambali wa Elisha aj'embuga, abona enfola miherho zinene zigorhere echishagala n'efarasi n'emituga. Abwira Elisha mpu: Waliha rhwamafa lero, gurhe rhwajira? ¹⁶ Elisha amubwira mpu: Orhayubahaga, engabo zerhu zezinene kulush'ezabo. ¹⁷ Elisha ahema Nyamuzinda mpu: Ozibul'oyu muntu amasu. Nyamuzinda azibula mwambali wa Elisha amasu, abon'entondo eyunjwir'efarasi, n'emituga eri nka muliro ezungulukire Elisha. ¹⁸ Bamuchimira, Elisha ahema Nyamuzinda mpu: Nyamuzinda ohumye amasu gabo, Nyamuzinda abahumya. ¹⁹ Enyuma z'aho, Elisha ababwira mpu: Mwahabukire, arhali ch'echishagala muli mwalonza chino, munkulikire nabayerek'omuntu muli mwalonza. abahek'e Samariya. ²⁰ Babere bahik'e Samariya, Elisha ahema Nahano mpu: Ozibul'amasu babone. Nahano abazibulago. Babona bakola bali e'Samariya. ²¹ Mwami w'e Samariya aber'ababona adosa Elisha, mpu: Darha Elisha ka mbashurhe, ka mbashurhe? ²² Elisha amubwira mpu: Nanga, orhabashurhaga, orhankashurh'abantu wagwarhaga mpiru! Obaherez'ebiryo balye n'amenji banywe, obalikule bagaluk'emwabo. ²³ Mwami waba Israeli abaherez'ebiryo birhali bigeke, balya, banywa, enyuma basengaruka, bagaluk'emwabo. Kurhenga ago mango aba Suriya bakaba okushesherera omu chihugo ch'e Israeli. ²⁴ Aliko enyuma lyaho, mwami Benehadadi we Suriya ashimanyanya engabo zage zoshi, bagenda kugorh'echishagala ch'e Samariya. ²⁵ Eshali lidarhi lyazuka mw'echo chishagala ch'e Samariya bwenene, chiro erhwe ly'epunda lyagulwa bicheri makumi gali munane by'efuranga. ²⁶ Mango maguma mwami we Israeli ayinj'agera oku lukuta, mukazi muguma amuyakuza mpu: Waliha ontabale nani! ²⁷ Mwami amubwira mpu: Akaba Nyamuzinda arhagurhabere, ntacho nani mperhe nakurhabalamo, buno ntagwerhe ngano, ntaherhe n'edivayi. ²⁸ Enyuma lyaho mwami amudosa mpu: Bichi walonza? Aderha mpu: Mukazi muguma ambwira mpu: Rhuly'omwana wani nkazene, n'omusezi rhuly'owage. ²⁹ Rhwayenda mugala wani rhwamulya. Bwabere bwacha na mubwira oku naye alerh'owage rhumulye, aliko amubisha. ³⁰ Mwami aber'ayunva ntyo, achishashanyulirakw'emishangi enyanya z'oburhe; Ago mango ayinj'agera oku lukuta; abantu boshi babona okw'ayambere emishangi y'emishibo. ³¹ Mwami we Israeli aderha mpu: Nyamuzinda anyirhe Elisha mwene Shafati akalala m'omuka zene! ³² Elisha abere ali ahamwage yashambala n'abashamuka b'omu chishagala chage; mwami amurhumira entumwa. Okw'eyo ntumwa echiri omunjira, Elisha abwir'abashamuka mpu: Kamubwen'okola mwisi w'abantu antumira omuntu mpw'ankule m'ogwayisa. Aliko mulole bwinja han'oyo muntu ahika hano, muching'olunvi arhajaga muno. Nyunvirhe nka nahamwabo nay'ali nyuma. ³³ Oku Elisha ababwira ntyo, ela ntumwa yayinja, eri na mwami ali enyuma zage, aderha mpu: Nyamuzinda ye rhumire obu buhanya. Bichi nachilingako?