¹ Lusiku luguma, mukazi muguma w'omu bana babalebi abwira Elisha mpu: Omwambali wawe, bani afire: Aliko omenyere bwinja gurhe akengaga Nyamuzinda; muntu muguma rhwaligwerhe omwinda ayinjire mpu akola aheka bagala bani babiri ajibajira baja bage. ² Elisha amudosa mpu: gurh'olonzeze njirage? Kantu kachi wankabona ahamwawe? Aderha mpu: Ntacho nankayimpwako, aliko nankabona supa liguma lyonine ly'amavurha. ³ Elisha amubwira mpu: Ogend'ochihoze ebikunguru by'emikungulu binene oku balungwe bawe. ⁴ Han'orhenga kuchihoza, ochichingire omu mwawe n'abana bawe, ogunje ago mavurha mu ngasi chikunguru, echayunjwire wanachihir'emusike. ⁵ Oyo mukazi agenda achichingira omu mwage n'abana bage, abana bayinja bamushumbiriza ngasi chikunguru anachigunja. ⁶ Aber'ayunjuza bilala bikunguru byoshi abwira omugala mpu: Mpag'echindi chikunguru; amu bwira mpu: Ntachindi chichiriho; amavurha gacha. ⁷ Ashubira emunda Elisha ali, kumu ganulira oku byabere. Amu bwira, gend'oguze, orhol'efuranga ojuhe omwinda gwabene ezankayorha zikurhabale n'abana bawe. ⁸ Lusiku luguma kandi, Elisha agera omulugo lwe Shunemi eyo munda yaliri omukazi w'omugale. Lero ahamagalira Elisha ebiryo na ngasi mango eri Elisha akagerere eyo munda oyo mukazi ana muherez'akalyo. ⁹ Mango maguma oyo mukazi abwira eba mpu: Oyu muntu ogera hano aba mulebi wa Nyamuzinda. ¹⁰ Rhumuyumbakire echumba chigeke oku dali yerhu, rhuhire mw'enchingo n'ameza, n'echirhi, n'etara hano ayinja analalamo. ¹¹ Kandi Elisha ashubirayo, alala mwecho chumba. ¹² Elisha abwira Gehazi, ohamagale oyu mukazi nina hano, ayinjire ayumang'omu lunvi. ¹³ Elisha abwira Gehazi omudose bichi rhumujirirage oku binja byoshi amarhujirira, chango rhumuderhere emunda mwami ali eri emunda omumangizi w'engabo zage! Oyo mukazi aderha mpu: Ntacho mbulire. ¹⁴ Elisha aderha: Lero gurhe rhwamujira! Gehazi ayibuka, aderha mpu: Arhajira mwana, n'eba akala mushaja. ¹⁵ Elisha aderha mpu: Hamagalaye Gehazi amuhamagala ayinja ayumang'omu lunvi. ¹⁶ Elisha amubwira mpu: Omu mwaka gwayinja nkabuno, eryoherh'omwana w'omurhabana. Oyo mukazi aderha mpu: Mani waliha orhambeshaga birhankab'ebyo. ¹⁷ Oyo mukazi ayalala, aburh'omwana w'obuzana m'ogola mwaka Elisha amubwiraga. ¹⁸ Hagerere siku zigeke, oyo mwana akola alambagira, lusiku luguma ashiman'eshe omwishwa; ¹⁹ Abwir'eshe mpu: Darha erhwe lyamanduma! Esh'abwira omwamabali muguma mpu: Omuhekere nina duba duba. ²⁰ Amuhekera nina; amubagalira kuhik'egolo, lero oyo mwana afa. ²¹ Oyo mukazi arheremera mwecho chumba ch'omulebi wa Nyamuzinda. Alyamiz'omwana oku nchingo ya Elisha. Aching'olunvi, ashimb'eba ebwashwa. ²² Ahamagal'eba amu bwira mpu : Waliha ontumire mwambali wawe muguma na Punda, naj'emunda Elisha ali n'oku galuka dubaduba. ²³ Eba amudosa mpu:Bichi washimba emwa Elisha zene? Ene, lurhali lusiku l'okuhumuka; lurhanali lusiku lukulu l'okuluhuka kw'omwezi. Mukage amubwira mpu: Orhakulikirag'ebyo! ²⁴ Bagoshola Punda, abwir'omwambali, mpu: Oyehuke, omenye wakagenda kubuyabuya enyanya zani kuhika ahananka kubwira. ²⁵ Bashunika baj'emunda Elisha ali oku ntondo ye Karemeli. Elisha amulangara hale, abwira Gehazi ola mukazi olira w'omu Shunemi. ²⁶ Bangul'oji mulinga, omudose myazi michi yage, n'eba, n'omwana, ka buholo? Oyo mukazi aderha mpu: Buholo. ²⁷ Abere ahika oku ntondo aha Elisha aliri, achikweba oku magulu ga Elisha. Gehazi amuyababira,aliko Elisha amubwira mpu: Lekaye mbwene aherh'omurhima gw'emiziga, aliko Nyamuzinda ambishire. ²⁸ Oyo mukazi amubwira, waliha, ntakuhemag'omwana, na kubwira oko menye wantebeka! ²⁹ Ago mango Elisha abwira Gehazi! Ochirheganye, ohek'agarhi kani. Oshumuke, orhalamusag'omuntu omunjira, akakulegamya, orhabike agarhi oku masu g'omwana han'ohika. ³⁰ Oyo mukazi abwira Elisha, mani ebango lya Nyamuzinda n'elyawe linyirhe, nkakuleka, bagenda naye. ³¹ Gehazi abarhang'embere arhabika agarhi oku masu g'ola mwana, aliko arhachidundaga arhanagoholaga chiro. Agaluka kubalinga, aderha mp'ola mwana arhazukir'okuli. ³² Elisha ahikire ahambuga, ashimana mira aganyaga, bamulyamize oku nchingo yage. ³³ Aj'omuchumba, achichingiramo yewe n'omwana, ahema Nyamuzinda. ³⁴ Aj'okunchingo, achilambika kola mwana, ananiz'obunu bwage okub'omwana, n'amasu n'amaboko, oyo mwana ayunv'echuka. ³⁵ Elisha amurhengako, achigezageza omola, ashubirira amufukamako. Oyo mwana ayasamura kali mushanvu alambul'amasu. ³⁶ Elisha ahamagala Gehazi amubwira mpu: Hamagala nina w'oyu mwana, Gehazi ajimuhamagala ayinja, Elisha amu bwira mpu: Rhola mugala wawe. ³⁷ Ayinja, afukama emalanga ga Elisha arhol'omwana wage agenda. ³⁸ Mango maguma eri eshali liri omu chihugo choshi, Elisha ashubira e'Giligali ashimana abalebi bali omu hano, abwir'omwambali mpu: Ohir'echungu okuchiko obayender'ebiryo. ³⁹ Muguma wabo balebi agend'omulubala, ashimana eshogo z'elubala azihumba, abumba emifuko ye mishangi yage, azilerha azikerera omu chungu,aliko barhamenyaga shogo zichi. ⁴⁰ Zabere zahya, bayuhulira abantu balya, honaho boshi baband'endulu bwenene, bahamaga Elisha, mpu: Mwechi chungu muli obulozi, barhachiryaga. ⁴¹ Elisha ababwira mpu: Mumperez'eshano, ayikweba mw'ezo shogo aderha mpu: Mugabir'abantu, balya bula bulozi bwahwa. ⁴² Kandi mango maguma, hayinja omuntu kurhenga e Bal-Shalisha,alerhera Elisha migati makumyabiri n'empungule y'engano omu mufuko. Elisha abwir'omwambali mpu: Ogabir'abana babalebi balye. ⁴³ Omwambali amubaza: Gurhe eyi migati yankayenera, obahereze konine, bayugurha, n'ebindi byakayorha buno ku Nyamuzinda aderhre. ⁴⁴ Abaherez'eyo migati, bayirya n'eyindi yayorha nk'oku Nyamuzinda aderhaga.