¹ Yosafati mwami w'e Yuda aber'ajiraira myaka ekumi na munane y'obwami, Yoramu mwene Ahaba ayima omu Israeli e'Samariya, arhambula myaka ekumi n'ebiri. ² Ajira ebigayisize Nahano aliko arhaliri mubi bwenene kuguma n'eshe na nka nina Yezebeli, buno ashandaza empero za Baali esh'ayumbakaga. ³ Aliko s'achishwekera oku byaha bya Yeroboamu mwene Nebati, ajirisag'aba Israeli. ⁴ Mwami Mesha w'e Moabu aliri murhunzi akazagi juha mwami w'e Israeli bibuzi bihumbi egana n'engandabuzi bihumbi egana n'oboya bwabyo. ⁵ Amango mwami w'e Israeli afaga mwami Mesha w'e Moabu achikula ku Yoramu wayimaga ahali ha Ahaba. ⁶ Mwami Yoramu arhenga e Samariya ahamagala engabo y'Aba Israeli yoshi. ⁷ Aji bwira Yosafati w'e Yuda mpu: Omwami w'Abamoabu achinkulireko, ka mwayinja rhujirhera echihugo chage. Mwami Yosafati amushuza mpu: Nayemerere nayinja buno woyo nani rhuba muguma n'olubaga lwani n'olwawe lluba luguma n'efarasi zani n'ezawe zena ziguma. ⁸ Ashubi mudosa mpu: Lunda luhe rhwagera? Yoramu ashuza mpu: Omunjira egerere omu mpinga y'Edomu. ⁹ Mwami Yoramu w'Aba Israeli, na mwami w'e Yuda, n'ow'Edomu, bagenda. Babere bajira siku mushanvu omu njira, babul'amenji g'okunywa n'agabahereza engabo naba Punda baligwehe. ¹⁰ Ago mango mwami Yoramu w'aba Israeli aderha mpu: Buhanya buno Nyamuzinda amarhuhira haguma bami basharhu mpu arhuhire omu maboko g'aba Moabu. ¹¹ Mwami Yosafati adosa mpu: Ka nta mulebi oli hofu wankarhudoseza Nyamuzinda? Mwambali muguma wa Yoramu ashuza mpu: Elisha mwene Shafati wakolaga n'omulebi Eliya aliho. ¹² Ago mango Yosafati aderha Mpu : Oy'omuntu agarhubwira oku Nyamuzinda aderhere. Oku banali basharhu bagend'emunda Elisha ali. ¹³ Elisha ados'oyo mwami w'Aba Israeli mpu: Bichi oli baza? Akaba hano, oji dosa abaliri balebi ba isho na nyoko. Yoramu ashuza mpu: Nanga! Nyamuzinda ahebere aba bami haguma mpu y'Aba Moabu babayirhe. ¹⁴ Elisha ashuza: Mbof'echihango cha Nyamuzinda, olala nshiga, nka ntalimenyere Yosafati mwami w'e Yuda, orhali wandola omu masu. ¹⁵ Aliko munderhere omuzihi w'olunanga abere akol'ali aziha, Nyamuzinda ayandagalira Elisha. ¹⁶ Aderha mpu: Nyamuzinda adehere oku muhumb'emina elehere m'olula lubanda. ¹⁷ Aderhere oku murhayunv'empusi na nta nvula ya rhoga. Aliko chirharhuma olubanda lurhayunjula amenji mwanywa, n'ebirhungano na bapunda banywe bagambwe. ¹⁸ Aliko oko kurhali kwa kusomezwa embere za Nahano, buno kandi amenyere yenine gurhe abahimira Aba Moabu. ¹⁹ Mwabona oku mwashanda ebishagala byabo, mukube n'emirhi y'amalehe yoshi mwafuka chiro n'eshoko zabo, mubihye n'amashwa, muhirike mw'amabale. ²⁰ Bwabere bwacha miseke, bakala bahan'entulo, amenji gayinj'omu njira y'e Edomu, gashandala oku daho lyoshi. ²¹ Na ntyo, Aba Moabu babere bamenya oku abo bami basharhu bayinjire, bahum'oku misole yoshi yankamenya kulasha n'abashamuka bakereka oku lubibi. ²² Bwabere bwamacha, Aba Moabu bazuka babon'ezuba lyashoshoka, lyabasha oku menji gadukwire nka shagama. ²³ Baderha mpu: Ka mubwene eyi shagama baza! K'okuderha oku bala bami basharhu bajirir'obuhaka bayirhene, Ba Moabu we! Rhugende rhubashokole. ²⁴ Bahikir'oku bilalo byaba Israeli, aba Israeli bavulumbuka. Barhonder'oku bakenyula. Balibirha gafe gafe magulu ogabe. Aba Israeli bachikweba omu Moabu. Bahima abantu bamo boshi. ²⁵ Bashandul'ebishagala byabo boshi bahirik'ebirimbi by'amabale omu mashwa gabo goshi bachukir'eshoko zabo; Bakuba emirhi y'amalehe yoshi, Babajira kubi. Hayorha echishagala ch'omurhwali che Kiri-Heresi, nacho bachigorha n'emizereti bachileka eri chikola mabale gonine. ²⁶ Mwami we Moabu aber'abona entambala yakalihire, arhol'abantu magana mushanvu, bajilwa na machumu, alonz'okuyakira emwa mwami w'Edomu, Aliko barhachigalaga. ²⁷ Arhola omugala mukulu wankayimire omu byage, amuhana nterekero yo kusireza oku lukuta lw'echishagala. Aba Israeli babere babona ntyo, bayoboha bayak'oyo mwami w'Aba Moabu bashubira omu chihugo chabo.