¹ Amango Nahano abarhulaga Eliya omuchanya omu kasururu; Eliya na Elisha barhengag'e Gilgali. ² Mango maguma Eliya abwira Elisha, mpu: Obere hano buno Nyamuzinda antumire e Beteli. Aliko Elisha ashuza mpu: Mbokuloga nk'oku Nahano alamire, ntakulika. Okuliguma bagenda haguma e Beteli. ³ Abana b'abalebi b'e Beteli ba bwira Elisha, k'omenyere oku Nahano zene abarhula nahamwenyu Eliya omu chanya? Elisha abashuza mpu menyere, musire. ⁴ Eliya abwira Elisha kandi mpu: Obere hano, buno Nyamuzinda antumire e Yeriko. Elisha amushuza mpu: Mbokuloga, oku Nahano alamire nawe, ntakulika, bagera e' Yeriko. ⁵ Abana b'abalebi b'e Yeriko babwira Elisha, k'omenyere oku Nyamuzinda zene abarhula nahamwenyu Eliya omuchanya? Elisha abashuza mpu: Menyere, musire. ⁶ Eliya abwira Elisha mpu: Obere hano buno Nahano antumire oku lwinji lw'e Yorodani. Elisha amushuza mpu: Mbokuloga oku Nahano alamire, nawe ntakulika. Bashunika haguma bagenda. ⁷ Balebi makumi marhano babakulikira e Yorodani, abo balebi bachiyeguza nke lira, nabo bombi bayumanga hofu n'e Yorodani. ⁸ Okuliguma Eliya ahogola egoti lyage, alizinga alishurha oku menji g'olo lwinji gagabana, enjira yabonekana ahagarhi, bashabuka bombi na magulu gakalire. ⁹ Babere bashabuka, Eliya abwira Elisha: Ompune ngasi hyoshi olonzeze nkujirire embere Nyamuzinda ambarhule. Elisha amubwira mpu: Ondeker'ogo muka olibamo kabiri gunj'emo. ¹⁰ Eliya amubwira, mpu wamahema akantu kadarhi bwenene. Aliko okayinji bona oku nabarhulwa na Nyamuzinda, wana habwa. Kandi akaba orhabyinjire mbona orhahabwa. ¹¹ Bayinja bashambala bunjiranjira, omutuga g'omuliro gwa hulukira, n'efarasi z'omuliro zabagaba, Eliya abarhulwa n'omuhusi gw'akasururu. ¹² Elisha abona, ayama n'omulenge gunene mpu: Darha, darha s'aliko wamalusha emituga y'entambala zoshi z'omu Israeli! Abere abona arhachimu bwene, Elisha asharhula emyambalo yage bichira bibiri. ¹³ Arhola chilala chishuli Eliya arhozaga okudaho agaluka ajiyimanga oku lwinji lw'e Yorodani. ¹⁴ Arhola echola chishuli achishurha oku menji aderha mpu: Ngahe Nahano, Nyamuzinda wa Eliya ali? Ashurha amenji gagabana kabiri, enjira yaboneka ashabuka. ¹⁵ Abana babalebi makumi marhano b'e Yeriko baliri nkerira munola babona oku Elisha ajirire baderha mpu: Elisha yekola ali akoleswa n'omuka gwaliri mu Eliya, baj'emundali bafukama emalanga gage. ¹⁶ Bamubwira mpu: Waliha, rhuli bihangange bya balume makumi marhano, oleke rhugende rhu kulonzeze nahamwerhu Eliya emunda muka gwa Nyamuzinda gwajire murhula oku ntondo chango omu lubanda. Aliko Elisha ababwira mpu: Nanga ntabarhumire. ¹⁷ Bagendekera oku mushigirira mpu: Aleke barhume abo balume bagende kumushonda, ayunv'eshoni ababwira mubarhume. Abo bantu makumi marhano bagenda bashondereza hoshi siku esharhu chiro barhamubonaga. ¹⁸ Bashubira emunda Elisha ali e Yeriko. Elisha ababwira mpu: Ka Ntali nababwirire oku murhajaga kumushonda? ¹⁹ Abantu b'e Yeriko baj'emunda Elisha ali, bamubwira mpu: echi chishagala chiba chinja nk'ok'onabwene, aliko amenji gamo gaba gabihire bwenene, che chirhuma chirhayera. ²⁰ Elisha ababwira mpu: Munderhere omunyu oku mbale mpyahya, bamulerherago. ²¹ Aj'omushoko akweba ogo munyu omu menji aderha mpu: Nyamuzinda aderhere mpu namabuka aga menji garhachikaziyirha, n'emyaka yaja yayera. ²² Agola menji gaba genja kuhika zene nk'oku Elisha anaderhaga. ²³ Lusiku luguma Elisha arhenga e Yeriko, eyaja e' Beteli; aber'ahik'omu njira, hayinj'abana rhabana barheng'omu chishagala, bamujachira, mpu: Kul'olo luhala aha kul'ola luhala aha. ²⁴ Elisha akabagana, abaheherera oku zino lya Nahano okuliguma Dubu ebiri z'echikazi zarheng'omu lubala zashashanyul'abana makumi mane na babiri. ²⁵ Na ntyo arhengaho, ager'oku ntondo ye Karemeli ashubira e'Samariya.