¹ Ene Yosiya ayima omu bwami bw'e Yuda, aliherhe myaka munane, arhambul'e Yerusalema myaka makumi masharhu na muguma. Nina ye wali Yedida mwali wa Adaya w'omu chishagala che Bosikati. ² Ajir'ebisimisize Nyamuzinda kuguma na shokuliza wage Daudi. ³ Yosiya aber'ajira myaka ekumi na munane ayimir'obwami, arhuma omwandisi wage omu ka Nyamuzinda, ye wali Shafani mwene Azaliya munjukulu wa Meshulamu, amubwira mpu: ⁴ Oj'emund'omujinji mukulu Hilikiya ali, omu bwir'aganj'efuranga zoshi bamalerha omu ka Nyamuzinda, n'ez'abajinji balalir'enyunvi barholere. ⁵ Ezo furanga, bazih'abantu bakol'omu ka Nyamuzinda, zikamase abaseremala na bamaso. ⁶ N'abandi bakozi, zigule mirhi, n'amabale gagoyirwe galala gana kwanene okulumula. ⁷ Aliko abo bantu barhadosagwa ezo furanga zaliri zinganachi bunola bayinjaga bazikolesa n'omurhima gurhali gwabulyalya. ⁸ Omujinji mukulu Hilikiya aber'ayunva ogo mwazi abwira Shafani okw'abwene echitabu cha marhegeko omu ka Nyamuzinda. Hilikiya aha Shafani echo chitabu achisoma. ⁹ Enyuma lyaho, omwandisi Shafani agaluka ajiganulira mwami ngasi byoshi aderha mpu: Abajinji barholer'efuranga zoshi zaliri omu sanduku omu ka Nyamuzinda baziher'abayumangir'emikolo y'okulumula. ¹⁰ Ashubi mubwira mpu: Omujinji mukulu Hilikiya ye wampag'echi chitabu. Shafani arhonder'okuchisomera mwami. ¹¹ Mwami aber'ayunva ebiyandikirwe mw'echo chitabu ch'amarhegeko, aber'emyambalo yage mpu ely'omurhima gwage gwamabirunduka. ¹² Abwir'omujinji Hilikiya na Ahikamu mwene Shafari, na Akibori mwene Mika, n'omwandisi Shafari, n'omurhambo Asaya mpu: ¹³ Mujindoseza Nyamuzida, rhweshi n'olubaga lwe Yuda, gurhe rhwajira kw'eyi myazi yamasimwa mw'echi chitabu, buno arhugayire bwenene okwenge bashokuliza berhu barhakengaga emyazi yali yandikirwe mw'echi chitabu. ¹⁴ Omujinji mukulu Hilikiya na Ahikamu na Akabori, na Shafari, na Asaya, bagenda emw'omulebikazi Hulida omu lugo luhyahya e Yerusalema. Eba w'oyo mulebikazi yi wali Shalumu mwene Tikiva,munjukulu wa Harasi, yiwakazagi lang'emirhero mimana y'omu ka Nyamuzinda. Bamubwira ebi baderha. ¹⁵ Hulida ababwira mpu bagende bajibwira mwami mpu: ¹⁶ Yunvaga, Nyamuzinda w'aba Israeli aderhere mpu: Nkola nakweb'obuhanya omu Yerusalema n'abantu balimo, nka kulala binayandikirwe omu chitabu mwami we Yuda asomaga. ¹⁷ Buno abantu b'e Yerusalema baderhere bakaziherez'enama enterekero, n'oku ngayisa n'emikolo yabo yoshi. Che chirhumire nkunire echi chishagala bwenene, ntanaleka lero. ¹⁸ Aliko mujibwir'oyo mwami we Yuda wabarhumaga mpu muji ndosa mpu: Yunva oku Nyamuzinda aderhere: Wayunvirhe emyazi eyandikirwe mu chilala chitabu. ¹⁹ Wayunvirhe ebi nderhere mo biyerekere echishagala che Yerusalema n'abantu bamo, bakola bahanyagala bwenene, chiro n'ezinolyabo libakazi hehereramo. Wachiyunjuzize wayibukir'amabi wanjirire, wabera eby'oyambere enyanya z'oburhe wahungumula n'emiziga. Nechi nani nakuyunvirhe. ²⁰ Che charhuma nalek'ofe bwinja. Wafa baguhambe, na bulala buhanya naderhaga nayolera ku Yerusalema orhachi bubona.