¹ Manase aliherhe myaka makumi marhano n'ebiri, amango ayimag'e Yuda, arhambula myaka makumi marhano n'erhano e Yerusalema. Nina aliri ye Hefeziba. ² Ajir'ebishologoseze Nyamuzinda kuguma n'embaga Nyamuzinda ahigaga mwecho chihugo, achigabira aba Israeli. ³ Ashubi yumbaka galala mahero eshe ezekiya ashandaga, ayumbakir'eshushano ye na Baali, ashing'omutungo gw'enamakazi Ashera kuguma n'omwami Ahaba we Israeli, akazagi gashaniz'omwezi, n'ezuba, n'enyenyezi. ⁴ Ayumbak'agandi marherekero gahemukire omu ka Nyamuzinda k'e Yerusalema, aka Nyamuzinda yenin'aderhaga mpu: Omu munakaziyerekanir'okuba ho kwani esiku n'amango. ⁵ Ayumbakir'ezuba n'omwezi, n'enyenyezi omu mbuga zombi z'aka Nyamuzinda. ⁶ Chiro ahan'omugala nterekero y'oku sirezwa. Ajir'amashake. Ayinj'adosa amahano oku balaguzi. Ajir'ebigayisize Nyamuzinda. ⁷ Achula eshushano y'enamakazi Ashera ajiyirhabik'omu ka Nyamuzinda. N'oko Nyamuzinda abwiraga Daudi n'omugala Sulemani mpu: Aka Nyamuzinda kani kaja mwechi chishagala nachishogaga omu yindi milala ekumi n'ebiri y'aba Israeli: Mpu nkazi yerekaniramo okuba kwani omu bantu. ⁸ Ery'olubaga lw'aba Israeli lwakenga amarhegeko gani n'amahano gani n'amahano gani nahag'omwambali wani Musa mpu abahekere, ntakachilonza mpu baje bahulahula barheng'omu bihugo nahaga beshekuluza babo. ⁹ Abantu be Yuda barharhumikiraga Nyamuzinda. Alio Manase arhuma bahabuka, bajira kubi bwenene balusha zilala mbaga Nyamuzinda ashahulaga mpu ya aba Israeli babon'ahababera. ¹⁰ Ago mango Nyamuzinda aderh'omu balebi bage mpu: ¹¹ Buno mwami Manase we Yuda ajirir'eby'oku shologosa aba n'engeso zilushire ez'Abamori, arhuma chiro n'abantu be Yuda bajir'ebyaha eri kuhera eshushano zage kurhumire. ¹² Yunva oku Nyamuzinda w'aba Israeli aderhere: E Yerusalema n'e Yuda nahiray'obuhanya bube nka kulala omurazo guraza ku ngasi yeshi wankayunva ahaderha. ¹³ Nashereza Yerusalema, nka kulala nasherezaga Samariya n'omulala gwa mwami Ahaba. Nashuka Yerusalema mw'abantu, nka kulala bashuk'esahani eri baba bamamala kuyishuka banayiyubika. ¹⁴ Nalek'abakazi yorha omu lubaga lwani mbalikir'abashombanyi babarhambule, babahagule, babanyege n'echihugo. ¹⁵ Kunajira ntyo bun'olubaga lwani lurhashwiraga leka oku ngayisa, banjirir'oburhe gurhenga amango beshekuliza babo barhengaga omu chihugo che Misiri kugera zene. ¹⁶ Manase ayirh'abantu barhankaganjwa barhaherhe na bubi, eshagama yabo Yadek'omu chishagala che Yerusalema, choshi chayunjula. Echo chaha chiyushukir'oku bindi ahabulagam'olubaga lwe Yuda, abashumika mpu bagayise Nyamuzinda. ¹⁷ Ebijiro bya Manase byoshi, n'ebyaha ajirire biyandikirwe omu chitabu ch'ebyakazagiba ch'obwami bwe Yuda. ¹⁸ Manase afa bamuhamb'omwishwa lya liri omu burhwali, bakazagi liderha mpu shwa lya Uza, omugala Amoni ayima ahali hage. ¹⁹ Amoni aliherhe myaka makumyabiri n'ebiri amango ayimaga, arhambula myaka ebiri e Yerusalema. Nina yi wali Meshulemeti mwali wa Haruzi w'omu chishagala che Yotiba. ²⁰ Nay'ajira ebigayisize Nyamuzinda kuguma n'eshe Manase. ²¹ Ajira nk'okw'eshe Manase ajiraga naye akazi hera eshushano. ²² Arhajirag'ebisimize Nyamuzinda, aliko amuleka, nabo ye Nyamuzinda, wabashokuliza bage. ²³ Lusiku luguma abarhambo ba mwami Amoni bamujirir'erigi, bamuyirhir'omu burhwali bwage. ²⁴ Aliko abantu be Yuda, bayirha ngasi yeshi waliri mweryo erigi. Ly'okuyirha Amoni, bayimik'omugala Yosiya ahali hage, aba mwami. ²⁵ Ebijiro bya Amoni byoshi biyandikirwe omu chitabu ch'ebyakazagiba ch'abami be Yuda. ²⁶ Bahamba Amoni omu shinda yage omwishwa lya Uza, omugala Yosiya ayim'omu bwami ahali hage.