¹ Mw'ezo siku, mwami Ezekiya alwala hofi kufa. Omulebi Isaya mwene Amozi aji murhangula, abere ahika aha mwage amubwira mpu : Nyamuzinda aderhere mpw'osengaruke omulala gwawe, bun'okola wafa orhachilama. ² Ezekiya ayerekez'amasu omu chibambazi ahema Nyamuzinda mpu : ³ Mani Nyamuzinda w'obonjo, oyibuk'oku mba ndamire n'obushinganyanya embere zawe, n'okunakazagijira n'okolonzeze. Ezekiya ashesh'emiziga bwenene. ⁴ Oku Isaya arhazihik'eka, omu burhwali, Nyamuzinda amubwira mpu: ⁵ Galuk'obwire Ezekiya, mwami w'abantu bani, oku Nyamuzinda wa b'eshekulu bage Daudi aderhere mpu: Nayunvirh'omu sengero, n'emiziga nayibwene, nkola nakufumya n'olusiku gasharhu oj'omu ka Nyamuzinda. ⁶ Nakuyushulira yindi myaka ekumi n'erhano oku kalamo kawe, nakulikuza, ndikuze n'echishagala omu menyo ga mwami we Asuriya, n'echi chishagala na chilanga, buno mba Nyamuzinda mukubagirwa, enyanya z'omwambali wani Daudi. ⁷ Isaya abwir'abambali b'oyo mwami mpu : Barhol'omugati, gwa malehe g'etini, baguhir'oku hurhe afuma. ⁸ Ezekiya adosa Isaya mpu: Chimanyiso chichi chankanyerek'oku Nyamuzinda anfumya, n'oku lusiku lwa kasharhu nj'omu ka Nyamuzinda? ⁹ Isaya ashuza mpu: Echi chechimanyiso wamenyerako oku Nyamuzinda ajir'okwa kulaganyize. Echizunguzungu chasheguka makoro ekumi oku shonezo ly'oku gera agasanzi mwami Ahazi achulaga; ka walonza chij'embere eri chishubir'enyuma? ¹⁰ Ezekiya ashuza mpu: Okuj'embere kurhakomere, aliko nalonza chishubire enyuma. ¹¹ Ago mango Isaya ahema Nyamuzinda , Nyamuzinda ashubiz'echijuzu enyuma makoro ekumi, chayandagala oku ngazi ya Ahazi. ¹² Ago mango mwami Merodaki-Baladani, mwene Baladani we Babeli, arhumira mwami Ezekiya amaruba n'oluhembo buno aliyunvirh'oku Ezekiya alwere. ¹³ Ezekiya ayankirir'ezo ntumwa, aziyerek'obugale bwage: Efuranga, n'ehoro n'amavurha g'amalashi, n'agandi g'engulo ndarhi. Abaheka n'omwahakir'emiherho n'omw'abikira ngasi kantu. Mw'ebyo byoshi, ntacho mwami Ezekiya arhabayerekaga, ebyaliri omu mwage n'ebyali omu chihugo choshi. ¹⁴ Omulebi Isaya ashubir'emunda Ezekiya ali amudosa mpu: Bichi abo bantu baderhere, na ngahe barhenga? Ezekiya ashuza mpu: Barheng'erhali hofi ehanga omu chihugo che Babeli. ¹⁵ Isaya ashubi dosa mpu: Bichi babwene omu mwawe? Ezekiya ashuza mpu: Nabayerekere ngasi choshi ebinjira byoshi nabayerekere. ¹⁶ Ago mango Isaya abwira mwami Ezekiya mpu: Nyamuzinda aderhere ntya: ¹⁷ Lola, amango gayinjire, ebintu byoshi bashokulu bawe bakazagi lunda n'ebyoherhe kuhika zene, byahekwa omu chihugo che Babeli, na nta chintu chayorha chiro c'echiguma. ¹⁸ Bagwarha abana bawe wachiburhiraga babajire nkone z'omu burhwali bwa mwami we Babeli. ¹⁹ Ezekiya ashuza Isaya mpu: Omwazi gwa Nyamuzinda oderhere gurhali gubi, buno oderher'oku nalama omu murhula esiku z'akalamo kani koshi. ²⁰ Ebindi bijiro Ezekiya ajirire biyandikirwe omu chitabu ch'ebyakazagiba ch'abami be Yuda. Bayandikirem'oburhwali aligwerhe n'oku ahumbag'echisima n'omufulegi gwakazagi hek'amenji omu chishagala che Yerusalema. ²¹ Ezekiya afa, omugala Manase ayima ahali hage.