¹ Mwami Hezekiya abere ayunva ntyo aber'emyambalo yage enyanya z'oburhe, ayambal'eye mishibo, alibirhira omu ka Nyamuzinda. ² Arhuma Eliakimu, n'omwandisi Shebuna, n'abagula bakulukulu b'abajinji eri bayambere ey'emishibo, mpu baj'emunda omulebi Isaya mwene Amozi ali; ³ Bamubwira mpu: Mwami Hezekiya aderhere ok'olusiku lw'ene luli lwa malibuko kandi lwa kubon'eshonyi, rhukola rhuli nka mukazi waburha aliko abulir'emisi y'okuburh''omwana. ⁴ Mwami we Asuriya arhumir'omurhambo wage Rabashake mpu: Ajachire Nyamuzinda ozene. NKa Nyamuzinda wawe ankayunv'ebi bijachi byoshi, amushumbize. Mani ohemerag'olu lubaga luyorhere. ⁵ Omulebi Isaya aber'ayunva oku mwami Hezekiya amurhumiraga! ⁶ Isaya ababwira mpu: Mubwire Nahamwenyu oku Nyamuzinda aderhere ok'orhayubahaga ebyo byoshi wayunvirhe, okw'abambali bamwami we Asuriya banjachire. ⁷ Lero, namurhabika m'omurhima gw'obuba, ayunv'oku mahire; agaluk'omu chihugo chage yenine, agend'achishukir'engoko. ⁸ Omwambali wa mwami we Asuriya Rabashake aber'amenya oku nahamwabo arhenger'e Lakisi ajigorh'echishagala Libuna, eyo yajagi mushimana. ⁹ Ago mango babwira mwami we Asuriya oku mwami Tiraka we Etiyopiya ayinjire kulwa naye. Naye arhumira mwami Hezekiya we Yuda eyindi ntumwa. ¹⁰ Mubwire Hezekiya mwami we Yuda oku Nyamuzinda wage achivugire ameny'amurhebeka mpu ntarhol'e Yerusalema. ¹¹ Omenyere guh'abami be Asuriya bajir'ebindi bihugo byoshi n'okubishumbiza, nawe ka wafuma? ¹² Abami baliri embere zani bashahula ebishagala by'e Gozani, Harani, ebye Resefu, n'oburhwali bw'aba Edeni n'e Telasari, enama z'ago mashanja zirhabafumyaga. ¹³ Ngahe mwami we Hamati ali, n'owe Arpadi, n'owe Sefrvaimu, n'owe Hena n'owe Iva? ¹⁴ Mwami ezekiya arhol'ago maruba agasoma, azamukir'omu ka Nyamuzinda agalambul'emalanga ga Nyamuzinda. ¹⁵ Ahema mpu: Mani Nyamuzinda waba Israeli, oyikere ahagarhigarhi k'ebiremwa baderha Makerubi, oba Nyamuzinda w'amami goshi g'egulu, we walemag'enyanja n'egulu. ¹⁶ Mani Nyamuzindaoyunve onabone oku Senekerubi arhumag'abambali bage mpu bakujachire. ¹⁷ Kubinali waliha, abami be Asuriya babihiz'amashanja goshi n'ebihugo byabo. ¹⁸ Bayos'eshushano z'enama w'okuli zali zakubejwa n'emirhi n'amabale bantu bonine bazibejaga. ¹⁹ Waliha Nyamuzinda, orhukul'omu menyo g'oyu mwami we Asuriya y'abantu ba mahanga goshi bamenye oku woyo wenine we Namahanga w'okuli. ²⁰ Ago mango Isaya mwene Amozi arhumira mwami Hezekiya entumwa mpu emubwire : Yunv'oku Nyamuzinda wa ba Isreli aderhere mpu : Nayunvirhe oku wahemaga eri senekerubi mwami we Asuriya warhuma. ²¹ Oyunve emyazi nderhere, ekulolere : Abantu b'e Sayuni kukubonerere mpw'oli wabusha. Abantu b'e Yerusalema badund'erhwe enyanya zawe. ²² Nd'olala wachishombanyagako mpuwamulogaherako n'oku mukenyula? Karhali nyono nye mwimana we Israeli? ²³ Bun'oli wanjachira ntya nyono Nyamuzinda, warhuma abambali bawe waderha mpu : Nyono Senakerubi ntaho ntangabihya, buno emituga yani elugire, na nteremir'oku ntonda nahik'oku luchiga lwe Lebanoni. Nakubi ebyeteri byoshi birehukire n'esindani zikwirire, nagwarha n'erango lyage ly'obuzinda. Nagera bwenene. ²⁴ Nachimbwir'ebisima n'okunywa amenji y'embaga. Nayumy'olwinji lwe Misiri n' ebishando by'engabo zani, hano mpika omu chihugo che Misiri. ²⁵ Muza Senakerubi we! K'orhayunvag'oku yina rheganyaga ebi byoshi kurhenga mira? Ebinahigaga kurhenga mira, nkola nabiyerakana. Nyenine na kurhumaga ok'oshereze ebishagala bizibu Bihindamuke mushaka. ²⁶ Abantu baliri mwebyo bishagala barhaherhe misi, obuba bwabagwarha n'eshonyi. Baba nka musihe y'omu budike, na nka bukere b'okunju ely'omuhusi gugera bwanayehuka. ²⁷ Eri wayikala nana menya, nkokala wagaluka nana menya, oburhe bwawe enyanya zani mbumenyere. ²⁸ Okubona wachimpebereko, nyunvirhe n'omwibono gwawe, nakuhir'omugozi omu gosi, nkubangikire akabangiro omu zulu, nku galule omu njira wayinjagamo. ²⁹ Nawe muza Ezekiya, echimenyiso chiri chechi, ogu mwaka goshi, abantu baly'eshogo zachimezaga, omwaka gwakasharhu, mwahinga munashalule : Engano n'emirhi ye emizabibu mulye amalehe gayo. ³⁰ N'abantu bashugunukag'e Yuda baba nka mirhi eshube lik'emizi n'amarhabi gashulik'amalihe. ³¹ Nechi, olubaga lwayorh'e Yerusaluma n'oku ntondo ye Sayuni, kwaboneka abafulumukire, buhashe bwa Nyamuzinda bwakola ebi byoshi. ³² Che chirhumire Nyamuzinda abwira mwami we Asuriya mpu : Orhachihisa mwechi chishagala, na nta myambi washurhamo, orhashingiramo mw'empenzi orhanayumbakiramo amashonezo mp'orhogeremo. ³³ Enjira wayinjagamo, yiwanagalukako, chiro orhahisa mw'ebishando, nye Nyamuzinda oderhere ntyo. ³⁴ Nafungir'echishagala che Yerusalema nchifumye buno mba Nyamuzinda n'okuhikiriza echilaganechani n'omwambala wani Daudi. ³⁵ M'obula budufu, malaika wa Nyamuzinda aj'omubilalo by'engabo ya ba Asuriya ayirha abantu chihumbi chiguma na gali munane n'abarhano abayorhaga babere bazuka. Bashimana mirhumba yonene. ³⁶ Honaho Senakerubi arhondoka ashubir'e Ninawi aberayo. ³⁷ Lusiku luguma Senakerubi aj'omu kagombe k'omuzimu wage Nisiroki mpu amuhere, abagala bombi : Adramaleki na Shareza bamugorhomez'engorho, bayakir'omu chihugo che Ararati. Omugala Asaradoni ayima ahali hage